# 《少年葛瑪蘭》李潼——作者家己幻想ê 葛瑪蘭人 **URL:** \ **Category:** 文學著作 Bûn-ha̍k Tù-chok\ **Tags:** 讀册心得\ **Created:** [2021 二月 23 15:25 UTC](https://chiahpa.be/t/e/841 "2021-02-23T15:25:51Z")\ **Posts on this page:** 3\ **Page:** 1
**Author:** ![thooa0w0](https://chiahpa.be/user_avatar/chiahpa.be/thooa0w0/32/1179_2.png) [@thooa0w0](https://chiahpa.be/u/thooa0w0)\ **Post date:** [2021 二月 23 15:25 UTC](https://chiahpa.be/t/e/841/1 "2021-02-23T15:25:51Z")
這應該全台灣上有名ê原住民穿越小說。 ![photo_2021-02-23_15-33-04](https://chiahpa.be/uploads/default/original/1X/b2f38fb8fb70ca562c300963ca23602fcfdf3901.jpeg) 主角潘新格，為著家己親像平埔ê面容煩惱，伊驚人笑伊番仔。若是別人問伊：「敢是葛瑪蘭人？」伊tio̍h會掠狂拍人。有一工，伊一个人peh草嶺山，拄著風颱，天時地利下bih tī 大石頭縫，無張持穿越到一百五十年前，拄著伊ê祖先，見證先人ê生活方式，看tio̍h族人衰微ê前兆。伊叮嚀祖先保護土地，莫予漢人人占去。 我這幾個月lóng咧讀平埔ê史料，《少年葛瑪蘭》真濟段落予我出戲，這本小說親像是「作者家己幻想ê 葛瑪蘭人」， 冊中寫tio̍h ê葛瑪蘭人族風俗kap史料有一寡無仝，可能hit當陣iáu資料無夠濟，致使作者必須用想像填補。 比如講潘新格ê祖先叫巴布，葛瑪蘭查埔人ê名字無巴布這款名。主角kap伊祖先介紹家己，講家己ê名字是「潘．葛瑪蘭」，祖先講家己ê名字是：「巴布．葛瑪蘭」，葛瑪蘭人無姓，𪜶是親子連名制，無人ê名字是葛瑪蘭。Koh 有一个予做「春天」ê女主角，一个根本毋是葛瑪蘭人ê名字，我看kah bū-sà-sà。葛瑪蘭人使用ê器具、飲食方式mā有細節ê錯誤，比如𪜶彼當陣使用ê餐具是貝殼，毋是木碗。衫仔以烏色為主，袂有紅衫。冊中直接寫查埔無價值，mā-sī真奇怪ê講法，就算葛瑪蘭人是母性社會，無代表𪜶就會輕視男性族人。 小說尾解釋葛瑪蘭人衰微ê原因是「土地」，m̄-koh土地只ē-sái算是原因之一。歷史上公認加禮宛事件才是致使葛瑪蘭人稀微ê主因，漢人官員陳輝煌壓迫葛瑪蘭，族人起義失敗，死傷慘重，清朝政府流放葛瑪蘭人分裂部落，致使𪜶四界流浪，無法度組織族人傳承文化。ùi 清朝就揣無獨立ê葛瑪蘭人部落，真濟ê葛瑪蘭人ê部落是kap阿美族ê部落混合徛起。 我個人毋是真滿意一本小說，劇情無算是特別優秀，錯誤ê描寫真影響我閱讀ê感受。小說創作ê本意良善，90年代ê人可能真需要按呢ê想法kap認捌土地。 這算是真有名ê少年小說，真好玄敢有人tī細漢ê時陣讀過？ 我是因為好奇作者按怎處理族群衰微、漢人kap葛瑪蘭人對立ê關係才讀ê，這部份小說講kah真淺，主要是加強族群認同ê部份。 ---
**Author:** ![lesautres](https://chiahpa.be/user_avatar/chiahpa.be/lesautres/32/54_2.png) [@lesautres](https://chiahpa.be/u/lesautres)\ **Post date:** [2021 二月 23 17:14 UTC](https://chiahpa.be/t/e/841/2 "2021-02-23T17:14:47Z")
Chit pún sī góa tha̍k kok-hāu 4-nî ê sî-chūn ha̍k-hāu ê kong-khò, lāu-su chhōa goán thó-lūn mā-sī kiông-tiāu cho̍k-kûn jīn-tông ê pō͘-hūn. Hit-chūn Kavalan iáu m̄-sī Tiong-hôa-bîn-kok "jīn-chèng" ê goân-chū-bîn-cho̍k. Nā m̄-sī chit-pún chheh, góa hit-chūn kin-pún m̄-bat thiaⁿ ·kòe. Góa siūⁿ ha̍k-hāu lāu-su mā bô siáⁿ liáu-kái. Góa ē-kì-tit ka-tī hit-sî chiâⁿ kah-ì chheh lāi ê chi̍t-kóa jîn-bu̍t biâu-siá, koh-chài chi̍t-kóa tiûⁿ-bīn choán-ōaⁿ ê chhiú-lō͘ tī góa hit-ê nî-hòe tha̍k liáu kài sim-sek. Khak-si̍t bô te̍k-pia̍t su-khó lāi-té kóng-tio̍h Kavalan bûn-hòa ê mê-kak kám-ū káng-kiù. Kám-siā Thò͘-á ê chu-liāu pó͘-thiⁿ. ---
**Author:** ![thooa0w0](https://chiahpa.be/user_avatar/chiahpa.be/thooa0w0/32/1179_2.png) [@thooa0w0](https://chiahpa.be/u/thooa0w0)\ **Post date:** [2021 二月 26 14:03 UTC](https://chiahpa.be/t/e/841/3 "2021-02-26T14:03:05Z")
Chit-má kan-na hoa-liân ê Kavalan ū jīn-chèng, gî-lân ê cho̍k-jîn iáu bô QQ Lí-tông ū-sim siá pêⁿ-po͘ ê chok-phín, tio̍h chin kám-jîn--ah. Tio̍h-sǹg sè-chat bô káng-kiù, ín khí ha̍k-seng tùi goân-chū-bîn ê hèng-chhù mā chin hó