# Ì-chì, Táⁿ-tì kap khì-phek

**URL:** <https://chiahpa.be/t/i-chi-ta-ti-kap-khi-phek/1379>\
**Category:** 講論 Káng-lūn\
**Tags:** 散文\
**Created:** [2022 五月 3 08:40 UTC](https://chiahpa.be/t/i-chi-ta-ti-kap-khi-phek/1379 "2022-05-03T08:40:01Z")\
**Posts on this page:** 7\
**Page:** 1

<div class="post-metadata">

**Author:** ![Aminegy\_Kho](https://chiahpa.be/user_avatar/chiahpa.be/aminegy_kho/32/241_2.png) [@Aminegy\_Kho](https://chiahpa.be/u/Aminegy_Kho)\
**Post date:** [2022 五月 3 08:40 UTC](https://chiahpa.be/t/i-chi-ta-ti-kap-khi-phek/1379/1 "2022-05-03T08:40:01Z")

</div>

Iú Lō͘ chiàn-cheng kàu taⁿ í-keng nn̄g kó͘ gōa goe̍h ah. Chi̍t lé-pài chêng gún ang kā tiān-sī chūn-khui, teh khòaⁿ EBC ê chiat-bo̍k "Koan-kiān Sî-khek". Chú-chhî-jîn kap lâi-pin kóng kah chhùi choân-choân pho, kóng Iúkhōliàn put-chí ū tòng-thâu, sòa--lo̍h-lâi, Bí-kok koh beh án-chóaⁿ kā in o͘-ián, tong-jiân m̄-sī hoah-siaⁿ niā-niā, sī kè-kiōng Tâi-oân nn̄g tang ê kok-hông kun-sū ū-sǹg ê bó͘-mih bú-khì, Iúkhōliàn thàn chit-chūn phah--khì-lâi, tú-hó kā So͘-liân sî-kî lâu--lo̍h-lâi ê chi̍t-kóa pháiⁿ-tâng-kū-siah siau-siau--leh, kun-pī kū-ōaⁿ-sin, chiū kap Pak Iok pêⁿ-chē-khiā... ... Tùi Putin lâi kóng, thiⁿ "O͘" chi̍t pêng！（Ukraine kiám-chhái mā thang e̍k-chò "O͘"-khek-lân.）

Thiaⁿ in saⁿ sì ê ê khùi-kháu, ná-chhiūⁿ teh khòaⁿ pò͘-tē-hí ê kûn-thâu-chhut, Aulôpa ê chiàn-tiûⁿ sī hì-tâi-téng teh thó͘-kiàm-kong, tiān-sī-tâi ni̍h hia-ê "piān-sū" kap hì-tâi-ē ê koan-chiòng mā sī kā-kā-kún, bē-su lióng-kun kau-chiàn sī siáⁿ-mi̍h thiⁿ-tōa tē-tōa ê hí-sū leh！

Chiok chē tang chêng, góa bat kap chi̍t-ê Kanáta ê pêng-iú khai-káng, i kóng, Ēlàkhuh（Iraq）ū tāi-chì, Bí-kok ē sûi kòe--khì, ah nā Iúkhōliàn ho͘ⁿh, eng-kai to̍h bô siáⁿ-mi̍h tōng-cho̍k, in-ūi thâu-chêng hit-ê ū in chio̍h-iû ê lī-ek. Chit-má kám sī Iúkhōliàn ū chio̍h-iû bùn--chhut-lâi ah neh？

Che hō͘ góa siūⁿ-tio̍h Sèng-keng lāi ò(koài)-biāu(koài) ê kà-sī,

"In-ūi Siōng-tè beh hō͘ ū ê lâng koh khah chē, chē kàu ū chhun；m̄-koh, bô ê lâng liân i só͘-ū ê mā beh chhiúⁿ--khì." Má-thài 13：12

"In-ūi ū ê, góa beh hō͘ i chē kàu ū chhun；bô-ê, liân i só͘-ū ê mā beh kā i chhiúⁿ--lâi." Má-thài 25：29

"..., in-ūi kiàn-nā ū ê lâng beh hō͘ i koh khah chē；bô ê lâng liân i ka-kī lia̍h-chò ū ê, mā beh kā i chhiúⁿ--khì." Lu-ka 8：18

"..., í-keng ū ê lâng góa beh hō͘ i koh khah chē；bô ê lâng, liân i só͘-ū ê mā beh kā i the̍h--lâi." Lu-ka 19：26

Jîn-seng ná-ē chiah-nī bô kong-pêⁿ ah？Thiⁿ-kong-peh-á......

Góa sûi-sî khai-sí su-khó, lán Tâi-oân-lâng sī "ū--ê", ia̍h-sī "bô--ê" neh？Hoān-sè ke siūⁿ ê, sî-kàu, siū-tio̍h chhì-liān chiū chai--ah.

Lán saⁿ-kap ūi Iúkhōliàn tit-tio̍h chòe-āu ê sèng-lī kap chèng-gī piàn-kiâⁿ thiⁿ-ē choân-tē lâi kî-tó！

---

<div class="post-metadata">

**Author:** ![Chùnsiâng](https://chiahpa.be/user_avatar/chiahpa.be/ch%C3%B9nsi%C3%A2ng/32/547_2.png) [@Chùnsiâng](https://chiahpa.be/u/Ch%C3%B9nsi%C3%A2ng)\
**Post date:** [2022 五月 4 20:20 UTC](https://chiahpa.be/t/i-chi-ta-ti-kap-khi-phek/1379/2 "2022-05-04T20:20:16Z")

</div>

Chit phiⁿ hó lâi tâu "Bóngpò" ia̍h che sin--ê "TOJ"--ah！  
↓

 ![279629951_10158864559994842_7849509852533920884_n](https://chiahpa.be/uploads/default/original/2X/2/235b71f8d334ea0e4b89b5e3a7932ef5576e481d.jpeg)

---

<div class="post-metadata">

**Author:** ![Aminegy\_Kho](https://chiahpa.be/user_avatar/chiahpa.be/aminegy_kho/32/241_2.png) [@Aminegy\_Kho](https://chiahpa.be/u/Aminegy_Kho)\
**Post date:** [2022 五月 5 02:53 UTC](https://chiahpa.be/t/i-chi-ta-ti-kap-khi-phek/1379/3 "2022-05-05T02:53:02Z")

</div>

Kám m̄-sī í-keng ū Bong Pò, che ū siáⁿ-mi̍h bô-kāng neh？

---

<div class="post-metadata">

**Author:** ![Chùnsiâng](https://chiahpa.be/user_avatar/chiahpa.be/ch%C3%B9nsi%C3%A2ng/32/547_2.png) [@Chùnsiâng](https://chiahpa.be/u/Ch%C3%B9nsi%C3%A2ng)\
**Post date:** [2022 五月 5 05:49 UTC](https://chiahpa.be/t/i-chi-ta-ti-kap-khi-phek/1379/4 "2022-05-05T05:49:04Z")

</div>

Ah lâng tō beh chò(?  
Ná(lú) chē ná hó--mah.

---

<div class="post-metadata">

**Author:** ![Aminegy\_Kho](https://chiahpa.be/user_avatar/chiahpa.be/aminegy_kho/32/241_2.png) [@Aminegy\_Kho](https://chiahpa.be/u/Aminegy_Kho)\
**Post date:** [2022 五月 7 09:44 UTC](https://chiahpa.be/t/i-chi-ta-ti-kap-khi-phek/1379/5 "2022-05-07T09:44:21Z")

</div>

😅 😅 😅 I know it may be a stupid question....  
Tong-jiân bô-kâng, PE̍H-ŌE-JĪ chiàm chi̍t pòaⁿ neh~ 💝 💝 💝

---

<div class="post-metadata">

**Author:** ![chhoaniau](https://chiahpa.be/user_avatar/chiahpa.be/chhoaniau/32/158_2.png) [@chhoaniau](https://chiahpa.be/u/chhoaniau)\
**Post date:** [2022 五月 19 14:58 UTC](https://chiahpa.be/t/i-chi-ta-ti-kap-khi-phek/1379/6 "2022-05-19T14:58:49Z")

</div>

Tâi Oân lâng chit sî sī ū ná bô

---

<div class="post-metadata">

**Author:** ![Aminegy\_Kho](https://chiahpa.be/user_avatar/chiahpa.be/aminegy_kho/32/241_2.png) [@Aminegy\_Kho](https://chiahpa.be/u/Aminegy_Kho)\
**Post date:** [2022 五月 24 00:56 UTC](https://chiahpa.be/t/i-chi-ta-ti-kap-khi-phek/1379/7 "2022-05-24T00:56:03Z")

</div>

Ài siū khó-giām chiah chai！
