# 今敏个《Perfect Blue》佮《千年女優》 **URL:** \ **Category:** 亞年冥 Á-ni-meh\ **Created:** [2021 二月 4 16:05 UTC](https://chiahpa.be/t/perfect-blue/735 "2021-02-04T16:05:16Z")\ **Posts on this page:** 9\ **Page:** 1
**Author:** ![y7mp66](https://chiahpa.be/user_avatar/chiahpa.be/y7mp66/32/78_2.png) [@y7mp66](https://chiahpa.be/u/y7mp66)\ **Post date:** [2021 二月 4 16:05 UTC](https://chiahpa.be/t/perfect-blue/735/1 "2021-02-04T16:05:16Z")
舊年開始因為武漢肺炎，足濟電影舊片新修，動畫片嘛是，毋過日本動畫導演今敏个作品自舊年開始已經第三片上電影院矣。彼攏我定定聽著無看過个片，予我有機會看著《Perfect Blue》佮《千年女優》。 講實在我誠佮意彼當時个 2D 動畫片，《Perfect Blue》是 1997 年，《千年女優》是 2001 年，雖然講毋是成本足懸，就是愛苦毒員工，彼種平个畫面，「靜畫」佮「動畫」之間个流動，有真實以外个美感 。 兩齣電影講古个方法嘛有淡薄仔成，主角攏是演員，共𪜶拍个片佮真實个生活摻濫做伙，演出比事實閣較真个故事，但是兩片予人看了个感覺差足濟。 《Perfect Blue》是咧講對偶像轉型做演員个未麻，猶閣咧躊躇家己到底愛做啥物款个藝人？伊心內个家己、捌人看著个家己、家己向望个家己、捌人期待个家己……遮呢濟無仝个未麻，予伊毋知影欲按呢較好，人講「做戲空，看戲戇」，毋但少年演員揣無家己，踮邊仔看未麻个人嘛是共家己心內想个形影囥佇未麻身軀頂，若是發現著未麻佮期待个無仝，甚至無欲承認真正个未麻，這種想法引起一捾驚人个事件，無到點半鐘个電影對頭轉到尾，予你有時為著未麻煩惱，有時閣會驚未麻，算講是我平常時較佮意个彼款故事。 《千年女優》較無《Perfect Blue》遐呢複雜，但是我顛倒較看無，我講會出千代子个人生故事，毋過我無法度了解是按怎愛用一世人去揣一个熟似無幾工个人？了尾千代子講伊愛个是全心咧追一个人个家己，這我會當了解，但是我猶是感覺人生有足濟通好拍拚个目標，毋免開一世人个時間佇一个人身軀頂。後來我看著今敏予人訪問講个話，伊講千代子佮彼个鎖匙男就親像伊佮伊个作品，我就雄雄了解矣，原來這就是價值觀个無仝，對阮來講，阮个作品就是一世人上重要个方向，今敏共伊換作人人會當感受个愛情，來表現過程比結果較重要一項代誌。 看過這兩片了後，我嘛會想欲揣這个動畫導演个其他片出來看，進前《東京 Godfathers》重修我無去看，今仔閣看著《パプリカ》（毋知欲按怎翻）三月欲上，應該會去看。 ---
**Author:** ![Sabina](https://chiahpa.be/user_avatar/chiahpa.be/sabina/32/360_2.png) [@Sabina](https://chiahpa.be/u/Sabina)\ **Post date:** [2021 二月 5 08:42 UTC](https://chiahpa.be/t/perfect-blue/735/2 "2021-02-05T08:42:50Z")
看過”東京Godfathers.” 雖罔物語毋是足創新- -ê，毋過今敏さん予社會中較少人關心ê艱苦人做主角，共物語添光彩，值得欣賞。 ---
**Author:** ![CteaX55](https://chiahpa.be/user_avatar/chiahpa.be/cteax55/32/383_2.png) [@CteaX55](https://chiahpa.be/u/CteaX55)\ **Post date:** [2021 二月 5 10:17 UTC](https://chiahpa.be/t/perfect-blue/735/3 "2021-02-05T10:17:23Z")
> [@y7mp66](#): > > 講實在我誠佮意彼當時个 2D 動畫片 我mā是 我mā是！ \ (\>w\<)ノ 較早用[celluloid](https://ja.wikipedia.org/wiki/%E3%82%BB%E3%83%AB%E7%94%BB)畫 ê [anime](https://ja.wikipedia.org/wiki/%E3%82%BB%E3%83%AB%E3%82%A2%E3%83%8B%E3%83%A1)，我誠實足愛ê！ > [@y7mp66](#): > > パプリカ 《眠夢偵探》，抑是《眠夢暗探》？ 0w0 ---
**Author:** ![y7mp66](https://chiahpa.be/user_avatar/chiahpa.be/y7mp66/32/78_2.png) [@y7mp66](https://chiahpa.be/u/y7mp66)\ **Post date:** [2021 二月 5 13:45 UTC](https://chiahpa.be/t/perfect-blue/735/4 "2021-02-05T13:45:31Z")
聽你講甲我閣較想欲看 若有機會看著閣來佮逐家分享 ---
**Author:** ![y7mp66](https://chiahpa.be/user_avatar/chiahpa.be/y7mp66/32/78_2.png) [@y7mp66](https://chiahpa.be/u/y7mp66)\ **Post date:** [2021 二月 5 13:55 UTC](https://chiahpa.be/t/perfect-blue/735/5 "2021-02-05T13:55:48Z")
原來彼就是 celluloid！ 《パプリカ》這日語我看無，中文是翻作《盜夢偵探》，我毋知影原文敢有「偷」一个意思？ ---
**Author:** ![CteaX55](https://chiahpa.be/user_avatar/chiahpa.be/cteax55/32/383_2.png) [@CteaX55](https://chiahpa.be/u/CteaX55)\ **Post date:** [2021 二月 5 23:08 UTC](https://chiahpa.be/t/perfect-blue/735/6 "2021-02-05T23:08:13Z")
> [@y7mp66](#): > > 《パプリカ》這日語我看無， パプリカ（[Paprika](https://en.wikipedia.org/wiki/Paprika)）是隻款蘞椒á，mā是女主腳ê名。XD ---
**Author:** ![11119](https://chiahpa.be/user_avatar/chiahpa.be/11119/32/591_2.png) [@11119](https://chiahpa.be/u/11119)\ **Post date:** [2021 二月 7 02:06 UTC](https://chiahpa.be/t/perfect-blue/735/7 "2021-02-07T02:06:26Z")
我嘛足佮意千年女優，用一世人个時間去追求家己个夢是足浪漫ê ---
**Author:** ![y7mp66](https://chiahpa.be/user_avatar/chiahpa.be/y7mp66/32/78_2.png) [@y7mp66](https://chiahpa.be/u/y7mp66)\ **Post date:** [2021 二月 10 14:42 UTC](https://chiahpa.be/t/perfect-blue/735/8 "2021-02-10T14:42:01Z")
原來是按呢，這个名誠特殊 ---
**Author:** ![y7mp66](https://chiahpa.be/user_avatar/chiahpa.be/y7mp66/32/78_2.png) [@y7mp66](https://chiahpa.be/u/y7mp66)\ **Post date:** [2021 二月 10 14:51 UTC](https://chiahpa.be/t/perfect-blue/735/9 "2021-02-10T14:51:11Z")
我原本閣看無，想講彼个查埔有啥好XD