# \[Sin-si\] Ká-sú góa ū chi̍t tâi sin peng-siuⁿ

**URL:** <https://chiahpa.be/t/sin-si-ka-su-goa-u-chi-t-tai-sin-peng-siu/643>\
**Category:** 文學著作 Bûn-ha̍k Tù-chok\
**Tags:** 詩, 原創\
**Created:** [2021 正月 25 12:05 UTC](https://chiahpa.be/t/sin-si-ka-su-goa-u-chi-t-tai-sin-peng-siu/643 "2021-01-25T12:05:04Z")\
**Posts on this page:** 1\
**Page:** 1

<div class="post-metadata">

**Author:** ![lesautres](https://chiahpa.be/user_avatar/chiahpa.be/lesautres/32/54_2.png) [@lesautres](https://chiahpa.be/u/lesautres)\
**Post date:** [2021 正月 25 12:05 UTC](https://chiahpa.be/t/sin-si-ka-su-goa-u-chi-t-tai-sin-peng-siu/643/1 "2021-01-25T12:05:04Z")

</div>

Bô teh kóng siáⁿ-mih ká-sú  
In-ūi góa chin-chiàⁿ ū chi̍t tâi sin peng-siuⁿ  
Sûi kā góa chia̍h chhun ê chhài khǹg ji̍p-khì lāi-té  
Ū-lâng hoán-tùi, to̍h kā in tok-tok ·leh mā peng ·ji̍p ·khì  
Che sī góa ê sin peng-siuⁿ m̄-sī in ê  
Góa siūⁿ-beh té siáⁿ lóng sī góa ê tāi-chì

Góa chit-ê lâng chin hó-sim  
Ē tàu iúⁿ-chhī bô pē-bú ê gín-á  
Tong-jiân sī khò peng-siuⁿ lāi ê mi̍h-kiāⁿ  
Lí kóng chhàu-sng ê chhài bē-sái koh khǹg peng-siuⁿ?  
Góa ê hó-liāu ná-ē chhàu-sng ·khì?  
Lí kám bô khòaⁿ gín-á chia̍h kah gōa hoaⁿ-hí?  
Jî-chhiáⁿ che sī góa ê peng-siuⁿ  
Án-chóaⁿ ēng m̄-bián pa̍t-lâng kà-sī

Gín-á tōa-hàn liáu-āu hiáu-tit ti-un-pò-pún  
Bô, khò in pē-bú ê chhiú-bóe sī bô kàu la̍p tiān-hùi  
In ū-tang-sî-á siūⁿ-tio̍h ē ka-tī khì khui peng-siuⁿ  
Kā góa ê chhìn-pn̄g khêng kóa chhoăi tàn-tiāu  
Tān-sī góa kā in chhàng kah hó-sè hó-sè  
Chá to̍h hām pa̍t ê chhài lām chò-hóe  
In ta̍k-kang teh chia̍h mā m̄-bat hoat-kak  
Jî-chhiáⁿ góa ê chhài-sek tōa-pān koh chheⁿ-chhau  
Pún-lâi to̍h m̄-sī in só͘ kóng ê lah-sap-mi̍h

Chit-má in kóng he sī in ê peng-siuⁿ  
Góa kóng he iû-goân sī góa ê peng-siuⁿ  
Chiàu saⁿ-tǹg oan-ke sio-phah bô-liáu-sî  
Hiān-chhú-sî chóng-sǹg hō͘-siong ū chi̍t-ê kiōng-sek:  
Che sī lán ê peng-siuⁿ, lán tio̍h hó-hó-á khiā-khí

* * *

Góa sû-lūi khah chió, bûn-kù mā chin ki-chhó͘, si̍t-chāi bô-hoat ū it-poaⁿ sin-si cheng-liān ê giân-gí. Chóng ·sī sim-lāi ak-chak siūⁿ-beh siá ·chhut ·lâi.

Khòaⁿ chiok chē lâng o-ló 學測 chok-bûn tê-bo̍k, góa mā kám-kak nā-sī lūn chhòng-ì khak-si̍t chhut liáu bē-bái, m̄-koh Hôa-bûn kàu-io̍k kah khó-chhì to̍h-sī hō͘ lâng chin tò-tōaⁿ.

Ū-lâng kóng "sin peng-siuⁿ" ê ì-gī sī tùi sin seng-oa̍h ê goān-kéng. Góa to̍h teh siūⁿ, thiaⁿ-liáu sī chiâⁿ lo̍k-koan, m̄-koh nā-sī í-keng sit-khì sióng-siōng ê lêng-le̍k, kan-na ē-hiáu tòe si̍t-bîn-chiá kiâⁿ, án-ne sī beh án-chóaⁿ chiah hó ·neh?