《光明之城,惡毒之城》:你敢願意為得tio̍h伊ê愛刣人?

冊ê資訊

若是你堅定否認為愛刣人,你敢會為權力刣人?
你iáu-koh否認你會為權放捒你ê良知,若是為tio̍h得tio̍h一个帝國,你敢願意刣人?
我毋知你ê答案,m̄-koh這本冊寫tio̍h ê人物,𪜶lóng願意為著家己ê慾望犧牲別人ê性命。這本冊ê作者Holly Tucker開四年走揣史料,17世紀ê毒殺案造成 210 次開庭,442 人受審,218 人入獄,28 人終身監禁,34 人死刑,將近 800 頁辦案筆記, 超過 2,500 具紅嬰仔屍體,上千份司法紀錄⋯⋯。

路尾濟濟ê證據指向皇宮,法王路易十四ê愛人相連紲死亡,kap伊關係親密ê亨麗葉塔(法王小弟ê某),伊ê情婦封當傑。仝時間Paris ê犯罪率不斷夯懸,法王想欲整頓治安,想袂到一案牽一案,最後有犯人講出法王上愛ê情婦是這毒殺案ê起頭。

一般來講歷史冊lóng真惡讀,人名濟關係複雜,真需要動腦筋。M̄-koh《光明之城,惡毒之城》讀起來親像推理小說,chìn娛樂,我tòng-bē-tiâu開一下晡ê時間讀到結局。作者kā這个牽連4百偌人ê毒殺案寫kah真好理解,tio̍h算你毋捌法國史,讀者mā有法度輕鬆看有所有人ê關係kap背景。

毒殺事件查到法王ê情婦時,法王tio̍h要求此案結束,雖罔法王無kā伊ê愛人送入法庭,上尾,法王kap情婦之間ê愛情因此煞去。涉案ê幾仔ê貴族女性lóng hōng流放輕判,法官koh呵咾𪜶出庭時冷靜ê態度,尊敬𪜶貴族身份ê優雅。可是,其他涉案ê女巫等ê百姓tio̍h無遐幸運,𪜶先經過生不如死ê刑求,才hōng燒死。Tī當時貴族ê身份真受人崇拜,就算貴族犯案留loeh明顯ê證據,法官iáu會為𪜶貴族ê身份求情講:「𪜶高貴ê身份kap受過ê教育無可能犯罪。」真正是死龜講kah成活龜。路易十四過身無偌久tio̍h發生法國大革命,強調「人人平等」ê觀念,確實是思想上ê大進步。

這本冊路尾一章koh講轉來情婦kap法王後來ê故事,情婦tī毒殺事件後ê八年繼續蹛tī皇宮,iáu-m̄-koh伊kap法王關係降到連朋友lóng做bē成。伊為法王生過11 ê囝,伊Í-chá蹛tī上倚法王房間ê位,伊所有ê房間數比皇后koh較濟,伊看tio̍h皇后時koh有特權免行禮。煞尾伊離開皇宮後,法王不但無愛挽回伊,soah liân-mī吩咐使用人kā伊ê用品kap生活痕跡lóng piàⁿ清氣。

情婦離開皇宮了,特別kāī厝內一間房間裝潢kah真奢華,伊kā這个房間予名做「法王寢室」,伊iáu koh期待得tio̍h法王ê心,tī伊在世時法王毋捌入去過彼个房間,mā無koh見過伊。法王知影伊過身ê消息時,伊無表現出悲傷,只是表示伊知影á,了後伊辭退所有人,一个人tī花園散步到天光。

這場毒殺案親像Bloody Mary彼个鬼故事hiah-nī血臊,讀到最後我無確定情婦是為著愛,猶是親像伊講ê咒語:「我召喚恁現身,收下我獻祭ê紅嬰仔,我koh愛法王ê愛……永遠愛意我,í-ki̍p宮廷ê地位,iáu-ū法王bē拒絕我任何ê要求,不論為tio̍h我家己,阮家族,ia̍h-sī我ê使用人。」

2 Likes