大正五年，煙花未開。
.
三月日頭到中晝嘛是赤燄燄，覆佇咧磚仔壁頂的烏貓嘛曝甲軟膏膏，半瞑半醒之間，伊的鼻仔雄雄抽一下，目睭嘛擘金，然後跳落來土跤。
惜惜對壁角踅出來，一个大籃仔踮伊焦瘦的胸坎前，籃仔內點薄臭臊味若有若無，伊看著烏貓，就跍落來，籃仔囥佇伊的大跤邊，籃蓋微微開一縫。
「咪！」烏貓倚來籃仔邊，但是予惜惜搶做前，共籃仔拖來尻脊骿後壁。
「來。」惜惜共籃仔內上小尾的溪仔魚，擲佇咧烏貓面頭前，烏貓隨咬落，共猶閣有土味的魚仔食甲足好食款，一面食，一面予惜惜挲伊頭殼頂的毛。
惜惜的頭鬃尾垂落青衫前，烏頭蓋面的鉸剪眉下跤是烏肉瘦面，干焦目睭金爍爍咧看貓。
一支竹篙忽然間掃過來，烏貓一聲哀痛，目仔就走無去，賰半尾魚仔佇土跤。
「番仔婆閣咧毒貓矣！」
四、五个平平十幾歲的查埔囝，徛佇惜惜面頭前，笑甲比日頭卡燄。
惜惜徛起來，共籃仔攬佇咧胸坎前，伊雖然已經有十五歲，身懸體格猶閣成囡仔人，踮遮查埔囝中央若像狗仔圍貓。
「毋是番仔婆，是番婆鬼。」後壁一个囡仔講。
「番婆鬼是伊的阿娘啦！」頭前的囡仔講，「番仔婆，你的心肝盍會無予恁阿娘食去？」
「因為怹阿爹共怹阿娘刣做前矣。」另外一个囡仔講。
「阿爹刣阿娘，查某囝做歹人。」在先講話的囡仔開始唸歌。
惜惜頭犁犁毋講話，若是干焦按呢無算啥，逐工嘛咧聽，但是上大漢彼个查埔囡仔伸手甲惜惜搝過來。
「盍毋講話？做啞口呢？」
邊仔的囡仔欲共惜惜攬牢牢的籃仔搶過，惜惜跤手猛，但是氣力輸人，籃仔內的魚菜落落一土跤。
「媠啦！按呢林家就袂予番婆鬼買的菜毒死矣。」
惜惜氣著，規个人對講話的囡仔衝過，煞予人偃倒佇土跤，邊仔隨一跤過來，踢佇伊的尻川䫌。
目睭瞌瞌，彼暝的血色就染紅心肝，耳孔中除了笑聲，猶閣有回憶中的哀鳴，彼當時惜惜啥物也無做，干焦聽著阿娘的聲音愈來愈細，連伊的面也看袂著……
「曾惜惜是林家的人，這馬列位敢是咧佮阮林家做對頭？」
清如流水的少年聲倚來倚近，圍佇惜惜邊仔的囡仔隨散去，惜惜現此時才褫金目睭，攑頭看著一軀烏暝墨的詰襟（tsu̍-me-e-li）*，佮徛領頂頭標緻的笑面。
「林二少爺………」
「阮是咧……佮伊迌啦。」
高校的少年將車倒的籃仔捾起來。
「毋過阮兜阿惜當咧買菜，無閒佮恁遮猴囡仔辦公伙仔，猶毋緊閃！」
笑面少爺輕輕仔歹一聲，規大群囡仔走甲若飛，目仔隨無去。
「哼。」林知來笑面轉烏，「臭豎仔。」
「少爺……」惜惜對土跤爬起來，伸手共籃仔提轉來，然後共土跤猶閣會當食的菜抾起來，但是魚仔、豆腐……攏拍損去。
「阿惜。」林知來對橐袋仔提出一寡零星仔，「遮予你去買菜，乘紲幫我買一本尪仔冊，《台湾パック》（tâi uân phah ku）*你敢知？愛上新的喔！」
惜惜頓頭，林知來才展笑。
「緊去吧。」
.
轉來到林家已經是午時，灶跤的阿敏嫂看著惜惜就結屎面，新來的阿華姊仔一面燃火，一面偷笑。
「你是閣趖去佗位摸飛？去一咧菜市仔若拍去。」阿敏嫂共菜籃仔提過，看著內底的尪仔冊，「這啥？」
「少爺欲愛的。」惜惜細聲回阿敏嫂。
「人去買菜叫人買這五四三，時到就莫嘩枵。」講是按呢講，阿敏嫂共尪仔冊提予惜惜，「少爺的冊，你先共提過予伊吧。」
惜惜提了冊，趕緊離開灶跤。
這林家雖然無阿罩霧大房、太平四房遐呢出名，嘛是三落大厝，老夫人猶閣佇咧，林智恆佮林仁恆兩兄弟分灶無分家，兩家伙仔做夥徛踮祖厝，排第二的林仁恆蹛佇咧正廳西面，伊的大漢後生林知來的房間佇西護龍第一間。
惜惜行入二門，共房門前白布掀予開，知來坐佇桌仔前寫字，拄才的高校制服已經換做平常時的長衫。
「少爺。」
聽著惜惜的聲，知來越頭，手股扞佇椅撐，伸手共冊提過來。
「多謝。」
知來提著尪仔冊，也無越轉去冊桌，跤曲咧椅仔頂，隨共冊掀開，掀兩頁就微微仔笑，自出世干焦提過筆的指頭仔幼較若紙，毋過一个一个骨目嘛綴伊的年歲愈來愈粗，前兩冬猶閣略仔肨奶，這站面瘦落，真正是十七通歲的春風少年兄。
發現惜惜猶閣徛佇邊仔看，知來攑頭：「你嘛欲看呢？」
惜惜幌頭：「看無。」
「來。」知來共冊反一邊予惜惜看，「這个禿頭阿伯有看著無？伊就是台灣總督，邊仔這个台灣人是江定，就是進前才予掠著彼个噍吧年事件的頭人。」
惜惜一面聽一面頓頭，但是毋知影彼是啥物人，伊看著知來的目睭，綴伊的話聲金光爍爍。
「講起來嘛是真怪奇，這冊本來佇台灣印，舊年總督府講這違法，煞來徙去日本，印了閣坐三工船轉來台灣，若是講這冊無好，是按哪日本就會使印咧？」
知來的笑容干焦半邊，惜惜感覺伊毋是咧笑，但是毋知影原因。
這時，房門白布雄雄掀開。
「二兄，你今仔盍會無來？」來者是較知來差不多平歲的少年，雖然講矮小可仔，但是較有肉，一箍圓面誠古錐，伊踏入門才看著惜惜，「阿……阿惜嘛佇遮？」
「鑑青少爺。」惜惜頭犁犁，細聲仔叫。
這个林鑑青是知來大伯林智恆的第二後生，減知來一歲，人稱三少爺，蹛佇咧東護龍第二間，定定來揣知來。
「伊幫我提物件過來。」知來應話，「你咧？」
「毋是講好欲做夥去公學校陪知新練運動會的比賽？」鑑青大聲，聽起來誠委屈，「阮等足久呢。」
知來笑咧講：「遮大漢矣，閣愛人陪？」
「伊才讀公學校二年仔！」
「原來才公學校二年仔，我猶閣想講是十六歲矣。」
鑑青過一下才聽有知來咧共笑詼。
「毋管啦！你明仔載一定愛來。」鑑青喝了就走。
知來看三弟走去，越頭問惜惜：「我攏猶袂應，你講按呢敢有准算？」
惜惜攑頭看著知來的笑面，細聲應：「阿惜是夫人買轉來的人，知來少爺講的攏准算。」
知來的笑容無去。
「這馬的時代，人攏是自由的，哪有當買？」
惜惜無講話，知來嘆一聲。
「你先去無閒吧。」
「是。」惜惜應了，轉去灶跤。
猶未行到就聽著阿華姊仔的聲：「夫人是按哪會買彼个阿惜轉來？人槌槌閣袂笑。」
惜惜跤步停佇咧灶跤外口。
「夫人嘛是好心，怹阿爹曾二豹較早是踮關刀山幫林家剉樹仔的工人，啥知伊有一工會共怹牽手刣死，予警察大人掠去，賰阿惜一个，老爺毋焦幫怹爸母辦後事，閣收伊做查某仔。」
「盍會按呢？怹阿娘討契兄呢？」
「閣較害，聽講怹母仔是番婆鬼。」
「番婆鬼？敢是會偷嬰仔心肝彼个番婆鬼？」
「嘿啊，伊是關刀山遐守城分的番仔婆，嫁予二豹隔冬就生阿惜，了後落胎幾若遍攏無生，人講因為番婆鬼註定會孤貧夭，才袂生後生，嘛有人講是予伊家己食去。」
「做人的查某囝袂當揀老母，但是做翁會當揀某，明明知影守城分遐攏番婆鬼，盍會去娶彼个番仔婆？遮呢驚人。」
「著咩！老爺佮夫人欲收留阿惜彼當時，阮逐家驚較欲死，毋過六冬矣，無發生啥物代誌。」
「好佳哉。」
聽到遮，惜惜刁工出力踏兩步仔，然後行入去灶跤。
.
吭——
飯碗踮跤邊摔破，猶袂知驚就予一个白色的腰閘佇咧面頭前。
「你這馬是咧創啥？」
「拍某啊。」
「阮是你的人，予你拍是應該，但是袂當予你傷著囡仔。」
「我當時傷著惜惜？」
碰——
面前的大人應聲摔落，一時拳頭若西北雨，落甲伊目睭內做大水。
「你這个番仔婆就誠疼囝呢？一工到暗毋知影咧變啥物蠓，厝裡也無咧顧，番仔就是荏懶，算我目睭膏著蜊仔肉才娶你，你閣當做惜惜是你的！共你講，惜惜是綴我的姓，我愛欲……」
「閃開！」
查埔人的大手伸過來進前，就予撥開。
「你……」
菜刀捎起來，銀光逼來面頭前，白衫隨化做一葩青火……
惜惜褫金目睭，猶閣一片烏暗，今瞑也無看著阿娘的面，邊仔阿華姊仔睏甲鼾鼾叫。
惜惜偷偷仔爬起來洗面，攑頭天星佮守城分看著的仝款閃閃爍爍，惜惜面洗了，踮灶跤門跤口坐到天光。
天光開始閣是一工無閒，今仔日早頓收了，惜惜就出門去布店幫夫人提進前注文的西洋布。
頭家娘看著惜惜，一句話也無講，對櫃台下跤提一个包袱仔出來，擲予惜惜，惜惜細聲多謝，隨離開布店。
時間猶閣早，行到公學校邊仔，惜惜停落來，四界看一下，斡到後壁一欉榕仔邊，爬去入樹頂看學校內。
一个查埔囡仔坐佇咧運動埕邊仔，顛倒是大漢的兩个提竹仔咧相戰。
原來林家武官代出，雖然做官的族親踮割台以後攏搬去唐山，留踮台灣的查埔囝嘛是從細漢學武。
鑑青上聽話，徛馬勢的時陣無聽著師父一聲「好」毋敢起來，學拳學刀攏照起工咧操練；知來上無定著，逐擺凊采舞兩个就走去迌。
平常時的訓練戰一下就分明，竹仔舞佇咧鑑青手頭頂若劈刀斬風，敏如獐豹落樹，勢似烏熊出林，知來憑伊身懸加小可、竹仔長小可，但戰但退，無予鑑青倚身，毋過運動埕就按呢爾爾，閣賰兩三步就欲到牆仔邊。
惜惜看怹倚近，覕佇咧葉仔後，毋敢振動，啥知知來雄雄對頭殼頂挑一劍，樹尾搖一下這邊包袱仔落落地，彼邊樹子落大雨。
「著！」
趁鑑青閃樹子，知來的竹仔已經點著鑑青的嚨喉前。
「呼——」樹頂的惜惜吐出大氣，毋過伊猶袂赴歡喜，就發現拄才落落的包袱仔煞來予人抾著，偏偏閣毋是捌人，就是昨日予知來喝聲就走的查埔囡仔中的一个。
惜惜隨跳落去，查埔囡仔驚一下放手，予惜惜共包袱仔搶轉去。
「好大膽！」彼个查埔囡仔嚷出來了後，才看著是惜惜，「原來是番仔婆，盍毋轉去你的樹仔頂？」
惜惜欲走，但是領仔予搝牢咧。
「昨昏的代誌猶未佮你算數，這馬林二少爺無佇咧，看你欲按怎？」
話猶未講了，拳頭母就過來，惜惜共包袱仔抱予牢牢，跍佇咧土跤，隨在伊按怎拍，伊用舂的無夠，閣兼踢，踢著惜惜的喙䫌，血水甜味淹來到喙脣邊。
等伊舂甲滿意，歡喜離開，惜惜才爬起來，雖然包袱仔有淡薄仔腌臢，內底的布攏無代誌。
惜惜共面𫝻一下，緊來轉去，伊行來到公學校大門前，就看著兩个少年佮一个囡仔做夥行出來，惜惜猶未決定欲閃無，較懸彼个就越頭過來。
「阿惜？」
聽著知來咧叫，惜惜只好乖乖仔行過。
「遐呢拄好？」鑑青嘛影過來。
惜惜頭殼犁犁，但是感覺著知來猶閣咧共看。
「你的面是按怎會烏青？」
「跋倒。」惜惜隨應。
知來閣看兩下仔，然後越頭。
「看你物件攏提著矣，應該是欲轉去？做夥行吧。」
知來佮鑑青行佇咧頭前，惜惜行來知新邊仔，伸手共伊牽起來，四个人做夥轉去林家。
知新平常就無啥講話，路裡攏是知來佮鑑青的聲，知來講七句，鑑青才應有三句。
「公學校內底的比賽爾，遐認真是欲創啥？就算講得著冠軍，州內比賽嘛攏是會予日本人贏，咱舊年毋就是按呢？」
「毋過阿叔講，啥物代誌欲做就袂當凊采。」
「嘛是愛有機會的代誌才有算，裁判攏是日本人，是欲按怎比？當初怹戰贏大清，就一直看咱袂起，我就想無阿爹是按怎欲去看這款的運動會？」
「人佮邀請就罔看吧？聽講會放煙火呢。」
「上好是放袂出來啦！」講到遮，知來雄雄停落來。
惜惜看袂著伊的面，但是感覺伊有啥物拍算。
「鑑青，你敢知影公學校的倉庫有一面窗仔破去？」
「按怎？是你摃破的？」鑑青隨緊張起來。
「毋是啦！我是咧想講，煙火毋就是囥佇咧倉庫內底？」
「莫啦！阿爹會共我摃死，阿叔嘛是。」
「哪會有人知？」知來停一下，「敢講你會講出去？」
「我……啊喲，知新佮阿惜嘛咧聽呢。」
知來越頭，惜惜看著伊的笑容，隨共面藏佇咧鉸剪眉下跤。
「阿惜，你敢會講出去？」
「這……少爺你拄才有講啥？」
「齁！阿惜攏嘛聽你的話。」
知來干焦嘿嘿直笑，然後繼續挐鑑青，兩个人冤到林家大門口，忽然間做夥恬落來。
鑑青行東爿，知來佮知新行西爿，知新到灶跤就走入去，知來繼續行到伊的房間，惜惜綴佇咧後壁，看伊欲入去時，細聲佮叫。
「少爺。」
「按怎？」知來越頭。
「彼號……」惜惜毋敢看知來的目睭，「拄才講日本人看咱袂起，然後人攏看番仔……」
「啥物人閣叫你番仔？」
知來雄雄歹一句，惜惜驚甲攑頭，看伊面色足恐怖，緊應講：「無，無代誌。」
知來看惜惜烏青的喙䫌，吐一聲大氣。
「你是林家的人，袂當放予人欺負，若拍袂過就愛講，知莫？」
惜惜頓頭，隨細聲講：「我來提布去予夫人。」
猶袂等知來應話，惜惜就斡入去後院。
.
聽講五月初五公學校會放煙火，這个消息傳出來，逐个查某仔攏咧查看彼工是舊曆的當時，相招欲去看。
當然無人招惜惜，毋過伊嘛是逐工算日子，到了初四彼下昏，共暗頓的碗盤洗了，平歲的幾个查某囡仔踮前埕開講，惜惜小倚過，怹就停落來，惜惜越頭欲轉去房裡，拄仔好鑑青行來門口。
鑑青看著厝內查某仔攏佇遮，煞問講：「恁敢有看著二兄出門？」
前埕的查某囡仔攏幌頭，一个較大漢的講：「暗頓時看二少爺食了就走，也無等老爺佮四少爺，若彼陣就出去，阮嘛毋知。」
「是喔。」鑑青看起來誠煩惱，越頭閣轉去厝內。
惜惜本來欲入去，這馬煞改做出門。
天頂已經烏暗，月娘若光若無，惜惜一个提燈也無，行慣勢的路嘛是真緊，經過人的芭蕉園，閣挽兩片葉仔落來，插佇咧衫仔襟內的橐袋仔。
但是行到公學校大門前，惜惜停落來。
四界無人，惜惜跍落來，輕輕仔「咪」一聲。
「咪——」一雙金目仁對烏暗中行出來，行來惜惜跤腿邊。
「乖。」惜惜正手挲烏貓的頭殼，挲挲咧就共目睭掩起來，倒手掩家己的目睭，踅踅唸講：「balan、balan，dauik、dauik，aitana、aitana——」
唸了兩支手仝時放開，烏暗隨光起來。
惜惜毋捌入去過公學校，一面斡，一面四界看，無外久就聽著有人咧喝：「掠賊仔喔！」
三、四个查埔人攑提燈走過，無看著惜惜徛佇烏暗中，惜惜綴佇怹後壁，看怹咧逐一个穿烏衫的少年人，走出學校，其中一个走甲誠緊，強欲掠著的時，少年摔落去溝仔內。
「好啊，看你閣欲走佗位？」
惜惜目睭瞌瞌，看著彼暝的血色，細漢時的惜惜予攬牢牢，跍佇咧屎礐邊仔，外口伊叫阿爹的彼个查埔人猶閣咧嚷：「看你閣欲走佗位？」」
「惜惜，阿娘對不起你，無法度閣共你保護矣。」
阿娘的白衫胸坎紅紅紅，共惜惜的面嘛染澹去，伊放開惜惜，共惜惜捒入去屎礐，惜惜驚甲哀哀哭，但是伸出來的手予阿娘撥轉去，頭頂的板仔隨崁起來。
「兩刻就好，乖乖覕咧，會記得從到今仔共你教的，踮遮咒誓，現此時開始永遠會孤、貧、夭，用這世人的親緣、富貴、囝兒，換來pakuyu的本事，自今瞑開始成為daxe。」
惜惜已經哭甲無聲，落尾聽著阿娘講：「阿娘欲來去矣，煞來就靠你家己。」
彼暝了後，惜惜毋捌變做daxe。
惜惜擘金目睭，兩个查埔覆佇咧溝仔邊，親像彼暝欲共惜惜搝起來的阿爹，但是遮已經無阿娘矣。
惜惜共芭蕉葉仔夾佇兩爿胳下空。
「mahabaha、mahabaha……」
芭蕉葉踮伊的身軀頂若鴒鷥展翼，予這个查某囡仔毋但飛起來，閣衝來到溝仔內，踮逐家面頭前共內底的少年搝起來。
「搝予絚。」
聽著惜惜的話，少年隨出力共伊的腰攬牢牢，一面攑頭，毋過也是無法度看著伊的面。
「多謝，請問你是？」
惜惜無講話，既然決定欲出手，早慢愛予伊知，但是惜惜希望愈慢愈好，聽伊無講話，少年嘛恬落來。
風吹過面，微微仔寒，干焦予攬牢的所在燒熱甲，濫起來拄仔好。
惜惜的貓目共下跤規个庄頭看甲清清楚楚，知新上課的公學校、做醮搬戲的廟埕、幫夫人買物件的街仔市，然後是一片青綠，圳溝若烏蛇趖過田園，彎入一條水龍，流往天地之間一線烏水溝，雖然強欲看無，惜惜相信彼就是伊頭一擺看著的海。
惜惜想欲閣飛落去，毋過已經有夠遠矣，驚到時欲行轉去行傷久，伊揣一个四界無人的園仔，共少年囥落來。
烏衫少年攑頭，看著惜惜的面，細聲仔講：「是你。」
「二少爺……」惜惜目睭內酸酸，莫怪知來無意外，庄內除了這个番仔婆，猶閣有啥人咧？
「你的目睭是按怎？」
惜惜越頭，無欲予知來看著金色的目仁，幼聲講：「彼毋是我的，等咧就共還轉去。」
「我攏毋知影你遮呢厲害，按呢啥人敢共你欺負？」
惜惜共喙抿絚絚，半晡才講：「就是按呢人才會……」
知來的笑容蔫去，然後伊講：「做番婆鬼有番婆鬼的路用，驚家己毋捌的代誌，煞顛倒共笑做前，就是豎仔。」
惜惜想著彼日無講出喙的問題，但是目睭對著知來，話煞講袂落，伊無想著講知來完全毋驚番婆鬼，按呢伊顛倒驚知來的回答會予伊這馬擾亂的心沉落去。
「按怎？」知來看惜惜毋講話，閣問：「我講的有理吧？是你家己講，我講的攏准算喔。」
聽著這句，惜惜微微仔笑起來。
「好啦，咱緊來轉去，今仔有夠見笑，猶未行入去倉庫就予人發現，好佳哉有你。」
惜惜聽甲一箍面燒燙燙，毋敢攑頭，目睭看著知來欲徛起來的跤跛一下。
「少爺！」惜惜緊伸手共扞，「請你小坐咧。」
「無要緊，拄才跋落溝仔摖著爾。」知來搖手，但是惜惜看著伊規个跤腿烏青兼流血。
「少爺，予我幫你糊藥仔吧。」
惜惜用貓的目睭四界看一下，隨挽著青葉仔，踮喙裡哺哺咧，一面唸阿娘教的字句，了後呸佇咧手裡。
「會豉喔。」惜惜講了隨糊落去，知來規个面勼起來，閣毋敢喝聲，等惜惜糊了才「呼——」一聲。
「多謝。」知來徛起來，發現行路袂痛矣，血嘛無閣流，「你這啥物遮厲害？」
惜惜踮後壁偷偷仔笑。
「若是做番婆鬼就予你知影。」
知來轉去林厝，惜惜先去還目睭，伊共烏貓說多謝，閣答應明仔載一定提魚仔來予伊。
轉去到林家的時，看著前埕光光，感覺有啥物代誌發生，惜惜趕緊入去。
門口徛足濟人，惜惜對兩三个長工的肩胛頭看著知來跪佇老爺面頭前，老爺手頭提一支長尺，鑑青徛遠遠咧看。
「鑑青攏共我講矣，你猶閣有啥物話莫？」
「無，伊講的是事實。」
老爺勒目眉，閣問：「聽講你跋落溝仔了後，隨無去，猶閣有人講啥物看著你飛起來，敢是啥人咧共你鬥相共？」
惜惜驚一下，但是看著知來隨搖頭。
「我干焦共三弟講過，伊無愛幫忙，我就家己去矣，無看著啥物咧飛。」
老爺直直共知來看，知來嘛直直共看轉去。
落尾是老爺先開喙：「你家己閣講一擺，暗時仔摸入去公學校內，到底是想欲創啥？」
「我欲共明仔暗用的煙火全淋予澹。」
「是按怎欲按呢？」
知來大聲共應：「講啥物運動會，落尾嘛無正經咧比賽，干焦想欲宣傳日本人有偌厲害，上好莫辦。」
「人臭彈一下你就袂爽，怹咧欺負做穡人、販仔的時，你人佇佗位？敢是徛踮怹面頭前阻擋？」
知來無講話。
「你有才調就保護全台灣的漢人莫予日本人欺負，無你就恬恬，毋管是學武犯禁抑是學文亂法，做會到攏隨在你。」
知來猶閣無應，邊仔人嘛攏無聲，老爺吐一聲大氣。
「覆咧，褪褲。」
惜惜目睭瞌瞌，雙手共耳仔崁起來，毋過長尺摃佇皮肉，嘛哀佇咧心肝，煞尾伊越頭行出去。
前埕暗落去，惜惜閣行入時，已經無人佇埕裡，惜惜徛佇門口想一下，閣行出去，斡對西爿過，西護龍上後壁彼間猶閣光光，惜惜踮窗仔外「咪」一聲。
無反應。
「咪——」
到第三聲，窗仔雄雄掀開，知來探頭出來。
「你盍會佇外口？」伊看著是惜惜，細聲共問，「遐晏矣，毋緊入來？」
惜惜無隨應，過一陣才攑頭，踮知來的耳孔邊輕聲講：「多謝。」
「啊？」知來規个戇神。
「少爺你……無共我講出去。」
「喔，這是當然。」知來笑一下，「而且按呢我就有你這个靠山矣。」
「哎？」
「講正經的，你感覺阮阿爹講的敢有理？」知來無等惜惜講話，就家己應，「我知影家己無路用，但是會當做的代誌嘛是愛做啊！親像阿爹遐呢有錢，彼敢有做啥？就是彼攏聽日本人的話，我才……」
知來停落來，伊看著惜惜直幌頭。
「按怎？我……講的毋著呢？」
惜惜欶大氣，然後講：「你有徛佇阮的面頭前，阻擋共阮欺負的人，你……毋是無路用。」
知來無隨應，惜惜嘛毋敢共看，伊足想欲來走，毋過做人的查某仔袂當按呢。
「我就講咩。」知來雄雄講話，「啥物代誌若應當做的就愛隨做，欲等甲啥物人有才調來共日本人趕予走，這馬咧艱苦的遮人就放隨在伊呢？」
惜惜毋知影知來講的敢有理，也毋知影若無日本人，做番婆鬼敢就毋會較快活，但是伊看著知來的目睭，就干焦希望伊一切的眠夢攏會實現。
這是一个註定一世人孤、貧、夭的少女，唯一的願望。
