Tò-tńg--lâi su-liām ê kò͘-hiong
Ka-kī 1 chiah ko͘-chiáu bô phōaⁿ
Sòe-hàn-sî ū a-chek-á chhōa góa
Sì-kè chhit-thô ê lâm-koán chhī-tiûⁿ
Tăⁿ
Mā í-keng léng-léng-chheng-chheng
Mn̄g liáu chhù-piⁿ 1 keng koh 1 keng
Ū se̍k-sāi gún a-kong ê saⁿ sì keng
Bông-bông-biáu-biáu sa-bô, siūⁿ-bô
Phû-phû-tîm-tîm kha ta̍h bōe-si̍t
Khí-khí-lo̍h-lo̍h ê lāu-tiān-thui
Iûⁿ-sek ê kū kóng-kò khăng-páng
A-chek-á lí bô--khì ê chhù-téng-tiâⁿ
Chù-seng-niû-niû ê Hiuⁿ-hóe eng-ia
Chù-tiāⁿ sîn-pì bī-ti ê ūn-miā
Bô-khì ê lí, ko͘-sin tńg--lâi ê góa
3 lâu choân phâ-chhìn-koh ê iû-lo̍k-keng
Góa chhin-chhiūⁿ 1 chiah
Tī chháu-po͘-á chhit-thô ê pe̍h-lēng-si
Tòe oⁿ-oⁿ-kiò ê koah-chháu-ki-á thó-chia̍h-mih
Chia̍h-pá ah, tō beh koh lâi--khì
M̄ chai kám iáu ē-kì--tit āu-pái
Tò-tńg-lâi siàu-liām lí.