#若有台灣教育 希望有心力ê友志通仔來做伙討論

#若有台灣教育 #希望有心力ê友志通仔來做伙討論

對2021今仔日無台灣教育 ê 狀況是真不安,我是無名--ê,希望有心力 ê 友志通仔來做伙討論,今我看現況是無錢無組織,無空間著用線頂--ê,無學生,教材課程先來 chhoân,勿講攏無,ánne 咁是 siuⁿ 了然???

#論社會自然科學到語文等教育理念

我思考教育愛是 siáⁿ款 已經有一站仔,先分享我看著--ê,歷史社會政治科愛廢除選擇題改用論說這種世界正常教育方式,若講著歐洲16世紀宗教改革親像完全無關台灣 soah 根本無人知影全台鄉鎮市攏看有--ê 台灣長老教會就是 Calvinism派-當時宗教改革--ê 新教派,ah 若閣講著18世紀 soah 掠準世界真落後無發展,soah 不知當時美國獨立前殖民地 ê 生活,in 組織讀冊會、做生理、做媒體到法律判決,道理到今攏真仝款--neh,300年後 ê 今仔日咱 iáu 有法透過 in 當時常民式 ê 書寫來了解歷史社會經濟政治到地理文化,這台灣kah當時世界文明 ê 發展到底是差 leh tà,閣有印度/韓國獨立 ê 烈士攏不得已死 leh 台灣 ê 代誌?中殖教育12年內是一節課 tō 無探討了解過,台灣教育無應該延續中殖教育離地 ê 狀況

自然科學科啞無應該用中殖課本單一主題式去教,愛用專案式去學習、意識,透過專案去了解其中原理應用,到實際設計操作,卡贏紙頂出題算題目 ê 無路用,通仔用生活中來出發,親像飛凌機 kah 火箭無空氣 ê 時陣咁閣會飛--lih,是 ánnà?做一隻無帆啞無 motor/engine ê 船咁有可能?啞是講光愛如何透過無透光 ê 固體,若有可能乎伊變化 beh ánnà 創?免講到 hia 看卡無感覺袂著--ê,連 做pháng 算材料比例,了解材料、製程、環境變數、生物生長影響會發生何種反應,如何上大化去產生,用手頭邊有 ê 材料 siàⁿ--ê 到去思考自製方式,狀況發生 ê 思考,這咁不是咱人才應該受 ê 教育(*註1)?

語文學習,課本固定選文咁閣有必要?今通仔看--ê 明明著 hiah chē--ah,啞無一定愛全文字表現--ê,若愛論這頭一步我想咱人愛先了解民間故事,冬節、台灣島沉、清明、五日節、中秋全台各地各時節各族語會有 ê 地方活動到故事,勿閣 leh hia 水餃包一箍,台灣多數過年無這款--ê,有關歷史,咁知影咱地方有紀念抗清起義人士、有紀念日本空軍為村民墜機犧牲、紀念228抗暴受難--ê,ah 免講咱啞不是唯一會 tī 這工過節--ê,咱 ê 故事/民俗 kah 咱厝邊日韓越港中有 siáⁿ精差?Chia--ê文學去 kah 歷史社會政治科結合是真自然,台灣古文來讀啞真好,勸台灣先民做台人 ê 《勸和論》就真有意義,ah 仝時期別位仔日韓越等地 ê 古文咁有這款狀況--leh?世界古文又是 siáⁿ款?Chia--ê mā 攏真好來探討了解,先生通仔用台灣kah世界 ê 例去 引chhōa 主題,乎學生來問來尋資料來書寫

若講語言學習,咱學語言無需要背,無需要單詞冊,啞免單一主題式課文課本, chia--ê 無法度乎學習者感覺有趣味有路用,用英語做例,Bye 這詞有原意?OK--leh?英語一詞講法 幾ā款,伊咁真正是一種「語言」?著是講這教育方法一定愛乎語言有路用,有法學新知識,不是 kanna 學語言,語言是知識 ê 載體,不管是趣味啞是技術--ê,若有 bat he 語文--ê來 引chhōa,資料是多多多,今已經2020年代--ah--neh!

Téngkoân 講--ê 是基本科,其實啞無一定講 siáⁿmi̍h 科 kah siáⁿmi̍h科 愛分 kah 足幼,時到 beh 去 kah 人學閣卡精--ê 啞不是無問題,咱 kanna 是引路人--niâ,我另外想有--ê 基本科目是心理、生理、戰技等,了解社會不是人人好人,身體愛練,防衛愛做,beh ánnà 處理別人到面對反省自身--ê 問題等等。

In 中殖一年教育預算2000幾億--neh,咱乎搶去--ê 尊嚴,無法出聲--ê,不敢、無法去想--ê,乎這系統束縛無法透放ê咱,咱 ê 系統愛建立。

註1:講實在我對數學無真了解,這陣有機會才豆豆仔自學,想起我高中上三角函數ê課,畢業 幾ā年 了後才了解原來這邊角關係是真正有關現實算長度,親像樓梯 siàⁿ--ê,這有影 kah 我當時無真了解,無法意識伊 ê 意義有關係,閣有he"I(maginary number):√−1",我啞是後來才知影伊 ùi 基本上無路用(存在 leh 現實普遍看無 ê 數學維度)到後來發現伊有簡化,實際應用有關波形電學通訊等 ê 計算路用,我想咱著免論 tī 中殖學過/死背起來--ê 化學式、生物原理等等--ah,這叫做教育愛人去無采性命?我真不安。

2 Likes

想起來,講實在若愛論正底 ê 基本科,無論應用生活實際了解,親像無分國界 ê 數學、科學、經濟、資訊等,早 tō 有平台鼓勵人去學--ah,這有影久--ah,咱 kanna 需要 chhoân 文化文學社會歷史地理政治,到藝術、做人這款--ê。