Gún-tau ê chó͘-thoân si̍t-phó͘: Pheng-ke 阮兜ê祖傳食譜：砰雞

日常 Ji̍t-siông 煮食 Chú-chia̍h
1

Tit-beh得欲 kòe-nî過年 ah矣, lâi來 siá寫 chi̍t-ê一个 gún-tau阮兜 chó͘-thoân祖傳 ê si̍t-phó͘食譜, kiò-chò叫做 "Pheng-ke砰雞".
(kî-si̍t其實 góa我 mā嘛 m̄-chai毋知 sī是 tó佗 chi̍t-ê一个 "Pheng", m̄-koh毋閣 chit-ê這个 siōng上 hó-chhiò好笑, to̍h就 soán選 chit-ê這个 :laughing:)
Khòaⁿ看 khí-lâi起來 chiok足 hó͘-lān虎𡳞, m̄-koh毋閣 gún-tau阮兜 tiāⁿ-tiāⁿ定定 chú煮, choa̍t-tùi絕對 bô無 phiàn-lâng騙人, chin-chiàⁿ真正 hó-chia̍h好食--o͘h喔!

Châi-liāu材料:

  1. pak-lāi腹內 sé洗 chheng-khì清氣 ê thó͘-ke-á土雞仔 1 chiah隻 (mài莫 siuⁿ傷 tōa大 chiah隻)
  2. ko-kip高級 cheng-iâm精鹽 1 kong-kin公斤 (1 pau包 15 kho͘箍 hit彼 chióng種)
  3. tōa大 tiuⁿ張 gû-phôe-chóa牛皮紙 1 tiuⁿ張 (mài莫 bé買 tio̍h著 ū有 sok-ka塑膠--ê)
  4. ū有 kòa蓋 ê îⁿ-té圓底 ê tiáⁿ鼎 1 ê个

Chò-hoat做法:

  1. Kā共 tiáⁿ鼎 chhit拭 hō͘予 ta焦, ke-á雞仔 ê si̍t-á翼仔 kah佮 kha跤 áu拗 hō͘予 hó好, khǹg囥 li̍p入 tiáⁿ鼎 lāi內.
    image

  2. Gû-phôe-chóa牛皮紙 tùi對 áu拗 2 pái擺, khàm崁 tī佇 ke-á雞仔 téng-koân頂懸
    image

  3. Kā共 iâm鹽 kui規 pau包 pho͘鋪 tī佇 Gû-phôe-chóa牛皮紙 téng-koân頂懸
    image

  4. Tiáⁿ-kòa鼎蓋 khàm崁 khí-lâi起來
    image

  5. Khui開 ûn-ûn-á-hóe勻勻仔火 khai-sí開始 chú煮, bô無 lōa-kú偌久 ē會 thiaⁿ-tio̍h聽著 iû油 leh咧 phia̍k擗 ê siaⁿ聲.
    Kúi幾 hun-cheng分鐘 to̍h就 tiâu-chéng調整 chit-pái一擺 tiáⁿ鼎 khi敧 ê kak-tō͘角度, hō͘予 bah肉 chīn-liōng盡量 lóng-ū攏有 chìⁿ糋 tio̍h著.
    image

  6. Chha-put-to差不多 15 hun-cheng分鐘 ài愛 phah-khui拍開 péng反 ke-á雞仔 chi̍t-pái一擺.
    Àn按 ke-á雞仔 ê hêng形 chha-put-to差不多 ài愛 péng反 3~4 pái擺.

  7. Múi每 chi̍t一 pêng爿 lóng攏 ū有 lûn輪 kòe過 to̍h就 chú煮 hó好 ah矣!
    image

Iâm鹽 ē-sái會使 siu收 khí-lâi起來 lām濫 bat-hāng捌項 chhài菜.

M̄-chai-iáⁿ毋知影 che這 sī-m̄-sī是毋是 kó͘-chá古早 bô無 hang-siuⁿ烘箱 só͘-í所以 iōng用 tiáⁿ鼎 lâi來 chú煮 tām-po̍h-á淡薄仔 sêng成 hang-ke烘雞 ê liāu-lí料理. :laughing:
Ū有 hèng-chhù興趣 ê lâng人 ē-tàng會當 chhì試 khòaⁿ-māi看覓~

20 Likes
2

Tú-chiah khì mn̄g goán tau Tâi-gí cho͘ tiúⁿ, i kóng pheng i chai-iáⁿ, to̍h sī kán-ná iōng tiáⁿ lâi hang ê kám-kak, kî-si̍t goán tau sī ū teh chò iâm-ko̍k ke, chò hoat mā chha-put-to, tiáⁿ té seng iōng iâm lâi pho͘ kāu-kāu, koh-lâi mā ài lām môa-iû, chhiūⁿ lí án-ne ê hong-hoat lâi kā i pheng hō͘ se̍k, iâm-ko̍k hó chia̍h, ko̍k chhut-lâi bah kài chhiⁿ-tiⁿ, góa chai-iáⁿ ē-sái ko̍k--ê, ū ke kah hî, lóng bē-bái chia̍h.

Góan lāu-bú mā kóng, he to̍h kài-sêng sī bô hang-lô͘烤箱 ê sî-tāi, iōng tiáⁿ khì hang ê kám-kak, m̄-koh kóng sī tó-ūi ê chhài lō͘, i kóng i mā m̄-chai.

Chòe-āu góa ū khòaⁿ tio̍h sìn-bōng-ài ū siu pheng烹, mā m̄-chai iōng chit jī kám tio̍h? Pheng ke, ū-kàu hó chia̍h khoàn, kài hi-bāng ū ki-hōe lâi chia̍h tio̍h chit hāng liáu-lī. ^^

8 Likes
3

He iâm ē thàu chóa? Péng sī kā chóa the̍h khí.lâi, chiah kā keá péng?
：０

1 Likes
4

（Tàuté beh ánnòa hō͘ sû chhinchhiūⁿ chi̍tê hêng ná tha̍k Hànjī ánne, góa iáu bôhoat, tio̍h sī kámkak chia̍hla̍t...Hànjī ok o̍h, ho̍kcha̍p hêng tō hó jīn, aih...? Ia̍hsī hùnlliān bô kàu niâ(?)

Ah, hit ê "hō͘ " kah sû liân chòhóe ah!

5

He iâm ē thàu chóa?

Góa ka-kī khòaⁿ kám-kak iâm tò͘ kòe ê liōng èng-kai chin chió, m̄-koh án-ne chú chhut-lâi ê ke-bah sī ū kiâm ê, góa mā kám-kak chin kî-koài :sweat_smile:

Péng sī kā chóa the̍h khí.lâi, chiah kā keá péng?

Tio̍h ah, to̍h-sī seng the̍h chi̍t-tè tōa pôaⁿ-á, sè-jī lia̍h chóa ê kak kā chóa kah iâm chò-hóe the̍h khí-lâi khǹg, chiah giâ chian-sî lâi péng. In-ūi ū-tang-sî-á ê tiâu-tiáⁿ, mā-sī ài tu̍h chi̍t-ê khah hó péng.

2 Likes
6

Ke-bah hang ê sî ē chhut-chúi, chúi ē thàu chóa, hām iâm lām to̍h piàn kiâm-chúi, tong-jiân mā ē thàu chóa. Che liōng chiâⁿ chió (bô hiah chē chúi ē-tàng kā iâm "chhōa" khì ke-bah hia), m̄-koh hoān-sè tú-á-hó tiâu-bī.

Lēng-gōa, lí chit phiⁿ ē-sái khǹg tī Ji̍t-siông ē-té ê Chú-chia̍h sub-tiâⁿ.

4 Likes