aióng:
Kám chûn-chāi?
Chhùi-am tòng pēⁿ-to̍k:
Ka-têng lāi kiám-chió thoân-jiám
Bô͘-gí chē lâng kòa chhùi-am ê èng-hāu
https://onlinelibrary.wiley.com/doi/full/10.1111/j.1539-6924.2010.01428.x
Góa mā bô lóng kui phiⁿ tha̍k, mā sī chhău chi̍t tang chìn-chêng tha̍k ·ê, siông-sè mā bē kì kah chiok chheng-chhó. Bô chò-kòe ū-hāu/bô-hāu bûn-chiong sò͘-liōng, IF ê thóng-kè, kám í-keng hông thui-hoan, téng-téng. Chóng ·sī, nā-sī kan-na hôe-tap "kám chûn-chāi", èng-kai án-ne tiō ē-thang kóng sī "chûn-chāi".
--
Góa ka-tī bo̍k-chêng siong-sìn chhùi-am ê èng-hāu, lí-iû mā chin kán-tan:
Chit-ê pēⁿ khò chhùi-nōa kah phīⁿ-chúi thoân hō͘ pa̍t-lâng + chhùi-am ē-tàng tòng chi̍t pō͘-hūn
→ khah chē lâng kòa, tiō sī kiám-chió kui-ê khoân-kéng lāi-té ê pēⁿ-to̍k
Ta̍k-ke lóng chai-iáⁿ pēⁿ-to̍k sī ùi kám-jiám-chiá ê chhùi-nōa kah phīⁿ-chúi lâi, án-ne i ū kòa bô kòa, phùn pēⁿ-to̍k ·chhut ·lâi ê liōng kah sok-lu̍t kám-kóng lóng bô chha? Chi̍t ê lâng ū kòa bô kòa khó-lêng bô chha hiah chē, chē lâng kám sio-siāng án-ne? Lán lóng chai-iáⁿ m̄-sī tú-tio̍h chi̍t "lia̍p" pēⁿ-to̍k tiō ē phòa-pēⁿ, sī lúi-chek kàu chi̍t-ê khám-chām chiah ē, mā sûi ta̍k lâng bián-e̍k lêng-le̍k ū cheng-chha. Án-ne góa kám-kak khì kiám-chió khó-lêng ê pēⁿ-to̍k exposure sī ha̍p-lí ê chò-hoat. Hiah-ê chhò-si, chí-iàu ē-tàng hō͘ thòaⁿ-khui ê sok-tō͘ khah bān, tiō sī ū góa kî-thāi ê hāu-kó: kā thoân-jiám-pēⁿ chí-sò͘ model ê chí-sò͘ ap ·lo̍h ·lâi. (Chit ê chí-sò͘, chiap-chhiok gōa-chē lâng, thoân-jiám hō͘ tùi-hong ê ki-lu̍t, in ê bián-e̍k-le̍k lóng ē éng-hióng, téng-bīn kóng ê tiō sī "thoân-jiám ki-lu̍t" ê pō͘-hūn.)
Góa sī kā kòa chhùi-am tòng-chò chi̍t chióng hāu-kó khah kē ê ū-hông-siā, èng-hāu m̄-sī tùi kò-jîn, sī tùi chéng-thé. Khó-lêng góa hông òe-tio̍h, chèng-chōng chiok khin bô hoat-kak, tī chit-tōaⁿ ū thoân-jiám-le̍k ê sî-kan, góa ū kòa chhùi-am, tiō khah bē thoân hō͘ pa̍t-lâng. Chit-ê bāng-chām sī teh kóng ū-hông-siā ê goân-lí, chhùi-am kah ū-hông-siā pí ·khí ·lâi, bô-hoat-tō͘ oân-choân chám-tn̄g liân-kiat, m̄-koh ē-sái hō͘ i thòaⁿ khah bān, mā-sī ū network effect. Thòaⁿ khah bān tiō ū sî-kan khì chhōe-tio̍h kám-jiám-chiá (in-ūi thong-siông sī hoat-pēⁿ liáu-āu chiah ē chù-ì ·tio̍h, m̄-koh chìn-chêng tiō ē-tàng kám-jiám pa̍t-lâng), ka keh-lî, chhiat-tn̄g kám-jiám-liān.
Lēng-gōa, m̄-sī kan-na COVID ē thàu-kòe chhùi-nōa kah phīⁿ-chúi thoân-jiám. COVID chèng-thâu kah liû-kám chiah-nī sêng, chéng-thé khì-kńg siong-koan ê pēⁿ khah chió, mā ē-sái hō͘ kiám-giām kah i-liâu ê ap-le̍k mài hiah tāng.
M̄-koh che lóng sī teh cheng-chhú sî-kan tán ū-hông-siā, m̄-sī kú-tn̂g ê pō͘. Ū-thang chù-siā tong-jiân ài chù-siā. Ta̍k chióng chhò-si lóng sī teh tán che.