Kòe-khì nî gōa, góa ê Bí-kok, Au-chiu ê pêng-iú seng-oa̍h tio̍h chiok kan-khó͘.
Ta̍k-ke mā khòaⁿ tio̍h Tâi-oân, hì-iām bô kóng kài giâm-tiōng, ke-kiám ē chia̍h chhò͘.
Tû-liáu hì-iām í-gōa, lán khòaⁿ tio̍h kok kok, kok tē bô kāng chhiú-tōaⁿ kap chèng-chhek, teh chīn-liōng pó-hō͘ bîn-chiòng. Ū ê tō hā-lēng ài kòa chhùi-am, pó-chhî siā-kau kū-lī, ha̍k-hāu koaiⁿ tiāu, seng-lí m̄-thang chò, téng téng. Koh ū ê só͘-chāi siáⁿ mih lóng m̄ chò.
Lán mā ū khòaⁿ tio̍h sin-bûn ûn-ná teh pò sò͘-jī, kin-ná-ji̍t kúi lē, kúi sí. Tâi-oân mā án-ne chò. Án-ne it-ti̍t pò, bîn-chiòng tong-jiân ē kiaⁿ.
Hì-iām sī chi̍t ê chiok giâm-tiōng ê būn-tê, ū iáⁿ. Hiah che lâng kòe-óng, lán m̄ thang khòaⁿ i khin. M̄ koh, lán chiam-tùi chit khoán būn-tê ê hoán-èng, hoān-sè ē koh khah tiōng-iàu.
Lán chit-má piàn chò, lán nā bô tông-ì chèng-hú ê chhiú-tōaⁿ, ā sī lán nā hoâi-gî jīm-hô chi̍t ê sò͘-kì, lán tō bē ēng tit kong-khai kóng. Siā-hōe bē ēng tit thó-lūn būn-tê, tàu-té sī beh án-ná kái-koat hia ê būn-tê?
Tō sī kóng, lán tit-tio̍h ê chu-sìn, nā bô iáⁿ, á koh ta̍k-ke kiaⁿ kong-khai thó-lūn, lán beh nah ē chai?
Góa kí kúi ê á lē:
Chhùi-am kám ū lō͘-iōng? Chit ê būn-tê lán beh nah ē chai? Lán kám ài seng liáu-kái chit ê būn-tê beh án-chóaⁿ gián-kiù, khòaⁿ ū siáⁿ khoán sò͘-kì. Ā sī kám ē kóng: "kho-ha̍k-ka kóng ê tō chún-tú-soah"? Ah hia ê kho-ha̍k-ka sī kí siáⁿ mih lâng? Nā ū nn̄g ê kho-ha̍k-ka khòaⁿ-hoat bô kâng, lán beh án-ná phòaⁿ-toàn?
Ā sī góa nā mn̄g kóng, hì-iām ê hong-hiám kám tùi ta̍k-ke lâng lóng kāng khoán? Gín-ná-lâng, siàu-liân ê, a-kong a-má, kám lóng kāng-khoán ê hong-hiám? Iā sī tōa-kho͘ ê kap sán ê, ū sim-chōng-pēⁿ ā bô, ū thn̂g-jiō-pēⁿ ā bô. Hì-iām kap che kám ū koan-hē?
Ā sī lán kám ē mn̄g kóng: kin-nî tio̍h hì-iām sí kúi ê lâng, nā bô hì-iām it-poaⁿ nî-á sí kúi ê lâng? Che kám ē sái tit chò pí-kàu? In-ūi góa ē kì tit, chìn-chêng he liû-kám-pēⁿ ū ê nî-á mā kài giâm-tiōng, m̄ koh hit chūn-á lán tō bô kā kui ê siā-hōe lōng kah beh kiaⁿ sí. Lán khòaⁿ sin-bûn pò sò͘-jī, in kám ū pò chit khoán sò͘-jī? Ah in pò ê sî-chūn, kám ū chi̍t kóa "thóng-kè chhiú-tōaⁿ" hō͘ hia ê sò͘-jī piàn-chò in siūⁿ beh kóng ê chèng-kù? Che ûn-ná mā oh chai.
Góa khah chá kap pêng-iú kóng, Tâi-oân chit-má bô kài giâm-tiōng, kám ū iáⁿ sī hó tāi? Hì-iām kám ū khó-lêng éng-oán tō ji̍p bē lâi lán chit lia̍p tó-sū? Ā sī kóng, lán bī-lâi lóng m̄ thang chhut kok, gōa-kok ê lóng m̄ thang ji̍p lâi?
THBK chèng-hú kám pí só͘-ū kî-thaⁿ chèng-hú koh khah gâu? Pēⁿ-to̍k ji̍p lâi ê sî-chūn (in-ūi góa khòaⁿ, chá-bān i tō beh ji̍p lâi), i kám ē chhú-lí khah hó?
Lán kám ē chhiūⁿ Sūi-tián hia, m̄ bián kòa chhùi-am, m̄ bián pó-chhî siáⁿ-mih kū-lī, pēⁿ-lē khah bē hiah chē. Ā sī lán beh chhiūⁿ Ka-chiu, kui-tēng chiok giâm-tiōng, ta̍k-ke lóng m̄ thang chhut mn̂g, tian-tò hì-iām koh khah giâm-tiōng?
Nā góa, góa khòaⁿ tio̍h siuⁿ chē chu-liāu. Tāi-pō͘-hūn ê lóng ē hō͘ góa siūⁿ kóng chia ê chhùi-am-á, chia ê siā-kau kū-lī, chia ê ū ê bô ê kui-chek, sī bô sáⁿ lō͘-iōng. Kiám-pûi, ūn-tōng, pha̍k-ji̍t, án-ne tō hó. Lāu ê (7~80 í-siōng) hoān-sè ài kóaⁿ-kín khì chù-siā bô m̄ tio̍h. M̄ koh lán siàu-liân ê pún-té tō bô hiah gûi-hiám. (Sī kóng, liû-kám mā ū gûi-hiám, hóe-chai, chhia-hō, tio̍h gâm, ...... lóng ū gûi-hiám. Lán tō bô hoat-tō͘ ta̍k kang kan-na khòaⁿ gûi-hiám niâ.)
Ah góa m̄ chai che ū iáⁿ ā bô, m̄ koh góa 100% khak-tēng ê sī, lán nā bô hoat-tō͘ kong-khai thó-lūn, tō bô lâng chai. Che m̄ sī lán tùi "Bîn-chú" ê ǹg-bāng? Lán ài ū hoat-tō͘ kā siā-hōe siōng chhim ê būn-tê kong-khai thó-lūn, khah ū ki-hōe kái-koat.
Góa khòaⁿ, kòe-khì nî gōa, tāi-pō͘-hūn ê kok-ka jú sêng Tiong-kok chè-tō͘: koaⁿ kóng ê, peh-sèⁿ m̄ thang hoâi-gî, m̄ thang mn̄g, m̄ thang kong-khai thó-lūn.
Chit nn̄g chióng Tiong-kok lâi ê pēⁿ-to̍k - chi̍t ê hì-iām, chi̍t ê ui-khoân chèng-hú - hoān-sè sī āu chiá khah tōa tiâu.
