Chit phiⁿ góa kài kám-tōng, Lîm siăn-pái chin chiàⁿ sī ūi-tio̍h lán ê bó-gí hù-chhut it-chhè!
台文通訊
期：27
頁：11
標題：林錦賢來批
作者：林錦賢
內容：
陳雷兄：
真多謝你來批提起我，寫這幾年來賣台語冊ê經過，hō͘咱台語界朋友了解。
對我來講，這幾年來我是kā賣台語冊參其他推展台灣文化運動ê冊，當做是一種社會改造運動teh看待，尤其我是特別注重推展台語文運動工作。
本來我ê職業m̄是teh賣冊，我是teh路邊擔仔賣衫褲，做喝場 [hoah-tiûⁿ]ê生理，彼[hit]時為著beh修改別人ê喝場術語，我著bat 思考過台語文字ê問題。七年外前，無意中tī冊店買著一本向陽「土 地ê歌」，對彼時起我才正式行入台語ê研究。我是一個真激進性ê行動者，我走去買真chē台語冊來看，我ê目的有想beh發表「喝場」ê書面文字，其間洪惟仁先生自費出一本「回歸鄉土，回歸傳統」ê冊 ，我一暝著kā看了矣！第二、三工，伊提册出來賣ê時，我ka講我已經看過矣！伊驚一tiô。對台語册我bat一四界ê册店去 chhōe，對書目去chhōe冊mā chhōe 無啥冊通買，加上彼時我對報紙雜誌有收集參台語相關ê語言問題，對台語投入相當chē ê精神去 研究，像去自立晚報所辦ê台語實用班，受著李鴻禧教授鼓勵，我講：「政治運動是每一個人攏會當去參與，但是做台語文運動著愛受過相當訓練，m̄是一般人有法度做會來ê.......」
前後我有記錄鄭良偉教授ê演講稿，寫一篇記錄感想，發表「喝場」，寫辯論雙語kap台語文ê文章。
五二0農民運動「雙和聯誼會」ê同志去hō͘國民黨掠幾仔個，我對政治運動有一點仔失落感，我開始行向文化改造運動ê一個抉擇點，了後參加洪惟仁所開ê台語研究班做夥研究。洪先生ê目的是beh招一寡人參伊做代誌。一年了後，就是四年前，我殘殘結束賣衫褲，mā結束阮牽手ê衫褲代工業，全心全力kā「台語文摘」扛[kng]起來；另外，我一面全力賣台語册。
當然，tī這段全力投入推展台語運動工作ê中間，我多少ê投入，有無形中產生一寡初期整合ê作用，另外一點是無形中改變一寡人對台語哀哀怨怨ê心態，多少有促成互相交流行向互相競爭ê局面。
這幾年來我一直堅持一個原則，我是teh追求做一個有自主文化尊嚴ê台灣人。
我相信這mā是大家認真beh追求ê物件。
祝 台語文大發展
弟 林錦賢 10/13/93
註：林錦賢是目前台灣唯一專門賣台語冊、各種台灣
話資料ê人。
台文通信三十年
數位化欠志工
Ū-chhú-bī hoan-gêng kah góa liân-lo̍k