Kin-á-ji̍t chhut-mn̂g tú-á-hó ū sî-kan,
to̍h siūⁿ-kóng beh khì the̍h chit kò goe̍h ê "Tâi-bûn thong-sìn BONG pò" lâi khòaⁿ.
Chhâ liáu hoat-hiān lî góa siōng kīn ê sī "Lo̍k-thiòng chhin-chú kiōng-ha̍k khong-kan".
In-ūi khòaⁿ khí-lâi to̍h-sī góa bô-hoat-tō͘ siau-hùi ê só͘-chāi,
chin hoân-ló nā-sī cháu khì the̍h chi̍t-pún cha̍p-chì to̍h cháu kám-ē chiok pháiⁿ-sè……
m̄-koh seng khà tiān-ōe khì mn̄g khòaⁿ-māi.
Kiat-kó in kóng bô būn-tê, góa to̍h khì ah.
Kàu-ūi í-āu thâu-ke pang góa khui-mn̂g,
I sī chi̍t ūi chin kó͘-chui ê lú-sèng,
the̍h cha̍p-chì hō͘ góa,
koh kóng kì-jiân lóng lâi ah,
I to̍h kài-siāu chit-ê só͘-chāi hō͘ góa thiaⁿ.
Goân-lâi I sī chū sè-hàn to̍h tòa tī hia ê Tâi-pak-lâng,
tùi chāi-tē ê le̍k-sú bûn-hòa lóng chin koan-sim,
ū gín-á í-āu hoat-hiān Tâi-gí chin-chiàⁿ beh bô lâng kóng ah,
chit-má jīn-chin beh choán chò bó-gí ka-têng,
chit-ê só͘-chāi mā put-sî ū pān Tâi-gí oa̍h-tāng,
tāi-pō͘-hūn lòng-sí chhōa gín-á chò-hóe o̍h Tâi-gí--ê,
tû-liáu chin-chē ē hō͘ gín-á hoaⁿ-hí ê siat-si,
mā ū ka-tiúⁿ thàn gín-á leh chhit-thô ē-tàng lim chi̍t poe ím-liāu sió chhoán chi̍t khàu khùi ê ho̍k-bū.
Tong-jiân mā ē-sái sòe in ê tiûⁿ-tē,
in ê tiûⁿ-tē m̄-niā ē-tàng siōng-khò kah sǹg,
koh-ū chi̍t-ê siat-pī chiok chiâu-choân ê chàu-kha mā ē-sái sòe lâi pān chú-chia̍h ê oa̍h-tāng o͘h!
In pān ê oa̍h-tāng ē-tàng tī bīn-chheh khòaⁿ-tio̍h:
https://www.facebook.com/lesecondfloor/
Gmap ê ūi-tì tī chiah:
https://g.page/lesecondfloor?share
Góa kin-á-ji̍t kiâⁿ m̄-tio̍h hāng-á só͘-í tah chi̍t-ê tē-tô͘:
In to̍h tī Tâi-pak chhia-chām piⁿ-á, kau-thong chin lī-piān.
Thâu-ke kóng hoan-gêng khì in hia the̍h BONG pò cha̍p-chì o͘h!
Chiok kú bô tú-tio̍h lâng kā góa kóng chiah Tâi-gí ah, góa chiok hoaⁿ-hí.
Hi-bāng ta̍k-ke ū ki-hōe mā ē-tàng khì kau-koan~ 
