（Chit篇有刊佇台文通訊BONG報內底）
頭擺po文，毋知敢會當khǹg散文QQ
「萱neh，來kā阿公報到，愛記得講家己的名！」
逐擺轉阿媽in兜，阿媽攏會講這句話。
阿公過身到taⁿ已經十偌冬ah，阿媽講ê「kā阿公報到」其實就是拜阿公的神主牌仔。
阿公過身的時陣我才九歲爾爾，坦白講，我對伊誠實是無啥印象，我甚至已經無法想起伊的聲是懸是低，mā無法想起我徛佇伊邊仔的時，我的身懸到in身軀的佗位；毋過伊猶是有時陣會出現佇我的夢中；夢中的伊坐佇客廳看報紙，阿媽坐佇邊仔揀菜，就親像伊koh在世的時仝款。
我會記得阿公過身彼工，阿媽是偌堅強，堅強甲毋願哭出聲。
阿媽是足愛阿公ê。
一般來講，拜祖先是燒金紙就好，毋過因為捌有親情夢著阿公來kā伊講無錢通開，所以無論是清明、重陽抑是做忌，阿媽一定會拗足濟金元寶，交代阮遮的做孫ê提去燒予阿公。十規冬過去ah，阿媽猶原咧拗金元寶。
「萱neh，阿公食飽ah。」
阿媽若是講出這句話，就表示伊跋著象桮，Mā代表阮欲準備去燒金紙kah金元寶ah。
坦白講，燒金紙這件代誌是足無聊ê；熱天免講，已經熱甲欲害，Koh愛忍受彼个火咧燒，真正是會燒甲懷疑人生；有時陣就算是寒天，mā有可能拄著落雨天，這个時陣就愛覕佇簾簷跤，猶是加減會沃著雨。
我捌問過媽媽，阿媽欲拗金元寶拗甲當時？
「Mài按呢問，這mā是阿媽的一个寄託。」
我mā有問逐擺攏kah我做伙去燒金紙的苦主，阮小妹。
「檢采會一直到阿媽轉去的彼个時陣。」
我mā是按呢想neh。
頂擺轉阿媽in兜的時陣，阿媽看起來足歡喜ê，伊一直kah我講小學同學會的代誌，我koh叫是阿媽今年有轉去伊的故鄉，彰化二水。
「阿媽你是當時去同學會ê？」
「二十冬進前ah，彼當時是恁阿公開車載我轉去ê。」
我捌聽過一个講法，人若食老，就會開始越頭看家己的青春。我感覺這是足合理的代誌，畢竟人生干焦一擺爾爾，精彩ê通常攏佇少年時代。
阿媽的青春，十頁內底，十頁攏會使揣著阿公的形影。
阿媽mā定定提出一寡古早的相片，予阮臆佗一个是阿公。
「恁阿公少年的時陣有緣投無？」
雖然阿媽是喙笑目笑，mā無法度kā伊的思念掩崁起來。
彼年，阿公確定得著癌症的時，已經是尾期ah。詳細的情形我是毋知，毋過阿公敢若早早就kā家己的後事鋪排好勢，mā一定有kah阿媽參詳；我會按呢感覺是因為阿公的塔位是「雙人房」。
是neh，in已經代先kā阿媽的塔位買好ah。
聽起來是一件會予人起毛管的代誌，但是阿媽從來毋捌對「死亡」表現出一屑屑仔驚惶。
阿媽是足愛阿公ê。
逐擺去靈骨塔的時，阿媽攏會攢兩个十箍的銀角仔當做是桮。
我一直攏有看著阿媽的眼神，伊跋桮的chi̍t-ba̍k-nih-á，伊的期待，Kah跋出來是笑桮的無奈，無桮的失望，koh有象桮的心滿意足。
愛用跋桮的方式才有法度kah親愛ê講話，這款代誌我真正猶無法想像。
阿媽是偌堅強，堅強甲從來毋捌大聲哭出來。
我koh記得阿公過身的前一工，其實阮攏知影阿公的時間已經差不多ah，除了阿媽。阿媽規工無歇睏，伊就坐佇阿公邊仔，按怎攏無願意放棄急救。雖罔阿公人已經無意識，三魂七魄mā攏歸天ah。
講再見，彼是偌痛苦的代誌；我毋知阿媽彼當時咧想啥，毋過「阿媽的青春」這本冊，過了彼工，就袂koh看著阿公的形影。
我是毋知影阿媽kah阿公的愛情故事，雖然彼个年代應該是相親，無就是爸母叫你結婚就結婚，是無法選擇ê。
順紲講一下，因為彼个年代的人攏較早結婚，所以我到這个年歲猶未結婚對阿媽來講已經是足老足毋通ah。
「萱neh，你當時欲結婚？阿媽的時間已經賰無偌濟囉！」
毋過這馬就是按呢，我koh咧讀大學，Koh咧寫這篇文章，除了燒金紙以外koh有足濟足濟代誌欲做；阿媽mā猶是會繼續思念阿公，繼續拗金元寶，繼續叫阮遮的做孫ê去燒金紙kah金元寶予阿公。
阿媽會按呢過生活，一直到伊欲轉去的彼一工。
「袂lah！阿媽你一定會食百二lah！」