有一塊碗粿、伊是天所揀選卜賜阿榮能量、元氣飽足。阿榮透早食只塊碗粿。
碗粿代先入去嘴空、TÚ 着嘴齒共 PŌ͘、 PŌ͘ 甲 IÙ MI-MI。嘴空 ·LIN 有 CHHÙI-NŌA、CHHÙI-NŌA 有一種 KÀᴺ-SÒ͘、伊講：「我是 TIĀN-HÚN-KÀᴺ、將 TIĀN-HÚN 分解做卡幼个糖。」 對只拵起、碗粿以經開始乎阿榮个身軀消化啦。
續落嘴舌打信號：「KO̍P--LOEH」碗粿着 LIU 落去 SI̍T-TŌ。SI̍T-TŌ 云云仔共伊 CHEK 落去 ー CHEK 落去 ー CHEK 落去 ー 只个過程号做 JÛ-TŌNG、JÛ-TŌNG ŪN-TŌNG。」
碗粿 LIU LOEH SI̍T-TŌ THÀNG 到胃。胃个外圍是 KĀU PIH-PIH 个 KIN-BAH-PIAH、MÁ-SO͘H MÁ-SO͘H、号做 ŪI-PIAH。胃 ·LIN 有 IÂM-SNG、IÂM-SNG 會幇助 KÀᴺ-SÒ͘ PHE-PHÚ-SÍN 起作用、只个 KÀᴺ-SÒ͘ 講：「我 PHE-PHÚ-SÍN 將 PHÛ-LÓ͘-THÍN 分解做 PHE-PHÚ-TÁI。」
ŪI-PIAH 共碗粿 LĀ 落去、那像洗衫機塊絞。碗粿浸治 IÂM-SNG 甲 KÀᴺ-SÒ͘ PHE-PHÚ-SÍN ·LIN 絞幾點鐘仔久着成做 KO-KO 个 MÔE-SÁI、此着是屎个原形。
MÔE-SÁI LIU 落去 SIÓ-TN̂G、SIÓ-TN̂G 躼躼長、大約仔有 6 米（公尺）長。總是代先着經過 CHA̍P-JĪ-CHÍ-TN̂G、CHA̍P-JĪ-CHÍ-TN̂G 是無閑 CHHIH-CHHAH 个控制中心。
CHA̍P-JĪ-CHÍ-TN̂G：「我 CHA̍P-JĪ-CHÍ-TN̂G 接收對胃來个 MÔE-SÁI、HUN-PÌ 逐種 HO͘-LÚ-BÓNG、促進肝、CHŪI-CHŌNG（IO-CHHIOH）在內个消化器官 HUN-PÌ 逐種 KÀᴺ-SÒ͘ 甲消化液、來甲 MÔE-SÁI 超超攪攪レ。閣再治 SIÓ-TN̂G 消化、吸收營養分。」
救世英雄肝甲 TÁᴺ-LÔNG 來到位。 肝是 GÂU 閣大、會運送青色个藥水、号做 TÁᴺ-CHIAP、將 CHÍ-HÔNG（肥油）共 IÛᴺ 做 SÈ-KA TIH-Á 个油滴。TÁᴺ-CHIAP 是肝所 HUN-PÌ CHIAH KHIĀM TÒA TÁᴺ-LÔNG ·LIN。肝講：「我無才調通消化 CHÍ-HÔNG。我干礁將伊 IÛᴺ 做卡細、通乎 KÀᴺ-SÒ͘ 卡 KHOÀI 消化。」
了後 CHŪI-CHŌNG 司父 KŌAᴺ 一 KHA 工具箱、HÍN 內家私頭仔有多多 KÀᴺ-SÒ͘：
CHÍ-HÔNG-KÀᴺ ー 分解 CHÍ-HÔNG
CHHU-LIP-SÍN 甲 KHÁI-MO͘H-CHHU-LIP-SÍN ー 分解 PHU-LÓ͘-THÍN
TIĀN-HÚN-KÀᴺ ー 分解 TIĀN-HÚN
(HE̍K-)HU̍T-SNG-KÀᴺ ー 分解 (HE̍K-)HU̍T-SNG(DNA/RNA)
CHŪI-CHŌNG 司父：「阮卜將者个營養閣再分解。」
TAᴺ 碗粿以經 HÔNG 分解做幼幼个營養素：A-MÍ-NÒ͘ SNG、 PHÛ-TÔ-THN̂G、CHÍ-HÔNG-SNG、BÎ-TAH-BÍN、甲 KHÒNG-BU̍T-CHIT。碗粿 MÔE-SÁI NǸG 過九灣十八越个 KHANG-TN̂G 甲 HÔE-TN̂G、有幾十億个 JIÔNG-MO͘ 夭閣每一个 JIÔNG-MO͘ 頂面幾百萬个 BÎ-JIÔNG-MO͘ 塊共伊欵待。
者个 JIÔNG-MO͘ 甲 BÎ-JIÔNG-MO͘ 袂輸 TIĀN-KHIP-Á、將營養素對腸仔共吸收入去治血路 ·LIN、CHIAH 行血路運送去身軀頂頂下下朗總个細胞、供應能量。
衆 JIÔNG-MO͘ 甲 BÎ-JIÔNG-MO͘ 同齊喝：「魯力 O͘H! 阮會將汝个營養素朗總送去阿榮歸身軀！送去阿榮个腦！送去阿榮个筋肉！送去阿榮个心臟！送去阿榮逐位有需要能量个細胞！賜阿榮元氣飽足！健康活潑 GÂU 大漢！」
到者碗粿所有个營養朗送入去阿榮个體內。所春落來个廢物續落去來到 TŌA-TN̂G。TŌA-TN̂G 專塊吸收水分、將廢物 KHĂN-SÓ͘ 乎乾。
腸仔內 BÎ-SENG-BU̍T-CHÂNG 有好菌帶治靴
衆好菌歡呼：「阮卜將廢物 HOAT- KÀᴺ 變成 BÎ-TAH-BÍN、 親像 BÎ-TAH-BÍN K、BÎ-TAH-BÍN B …」
水分 KHĂN-SÓ͘ 了、廢物變固體。者个固體着是屎。
經過一切个營養素吸收、腸仔內个細菌嗎有鬥做工、水分吸收、碗粿終其尾變成屎。
屎眞有自信講：「我个空課着是共廢物安全送出去。我不是省乜 CHHIA-IĀᴺ 个大人物。M̄-KÚ 我是眞要緊。」
屎閣 CHIᴺ 來到 TI̍T-TN̂G 打一个信號、PÙN-KHÁU 打開、屎着放出來、離開阿榮个身軀。
屎極歡喜大聲歡呼：「CHIÂᴺ ·LO͘H！任務圓滿！感謝阿榮所有參與有着个 CHŌNG-KHÌ 甲 KÀᴺ- SÒ͘！魯力 ·LAH！」
