Hō͘ 朋友招去 se̍h 台灣一禮拜外，阮講是第二屆民主旅行，真正多多所在愛有經過才知影有存在，感覺頂禮拜前 ê 生活已經是真久以前 ê 代誌。我 tú 開始是 tòe 人行，kanna 頭幾站去 愛麵子客家風味館 尋前輩開講啞是 台灣聖山生態教育園區 有志工前輩卡有 kah 在地--ê 講--tio̍h，聖山志工閣 kā 阮寫一篇＊註1，去 煲底 bodium 有讀著講是頭一本港語口語出版寫 ê 雜誌 ，ah 春 ê 時間卡多是趕路，學會曉無測速通超速，知影100公里 ê 感覺、看日出失溫、去海邊仔浸，去 #泰源監獄 講泰源起義，經過二七部隊台人228抗暴中殖 #烏牛欄戰役 紀念碑，開講食飯食酒，最後西部有意外我 tō 決定無 beh 趕路 tòe 因
阮有去小琉球，我治 小琉球樓仔厝 知影因 ê 廢棄物問題是卡會乎人煩惱（啞有食冰卡貴，病無法醫--ê 愛去屏東 siàⁿ--ê）ah 去旗津 戰爭與和平紀念公園 主題館，有了解展覽館不足，展覽內容 ê 和諧問題啞是平平受文化部管有卡無受重視 ê 現實，Tâioân人今 tō 無平等教育 ê 權利--ah，教育 beh 講台灣老兵今真正是當作無看--著，免講台灣無分男女有萬人騙往中國內戰百人回 ê 這段，最後若有活--leh 有法返啞已經是40年後--ah，阮五伯公 tō 無去--ah
到 1959古早味冰品- 前源記冰品 ia̍h 才知影頭家台文羅馬字是無講真會曉，啞不知有《台文Bóng報》通讀，伊啞是下性命乎店內有台文通讀。閣來暗時趕去台南，暗時 beh 半瞑 ê 台南車頭對我有一種真生份 ê 感覺，落雨，車歹停，soah 有人關心，車倒去是隨有人來鬥腳手．．．
去嘉義 #台灣圖書室 知影因 leh 想 beh ánnòa 卡穩定，雖然空間是免煩惱，啞是愛想辦法乎人卡會來啞是卡會支持（治 hia 是頭一改看著自由時代雜誌正本）ah 去雲林斗南石龜 台語老厝 Tâi-gí tshù 是有意識著卡多社區營造 ê 代誌，mā 有 kah 在地 ê 示大講--著，宜蘭對斗南 ê 石龜啞不是完全生份 ê 所在，阮啞有思考台灣劇是 beh ánnòa 做，tòa hia 乎我卡認真 leh 想一 ê 空間 ê 力量，另外，台語老厝有1979美麗島雜誌最後一刊，內容是有民生政經校園國際分析批判人權救援，有寫著中殖講公開演講造成社會不安是前所未有，雜誌引用日殖時文協公開演講內容資料來批判不是前所未有，是這三十年未有，ah 原來高雄美麗島遊行前，台中服務處成立是已經有一場＂和平＂ ê 暗會，啞有寫--tio̍h 陳菊記空難 ê 友志．．．
車停 台語老厝 Tâi-gí tshù 轉火車去 ＃台南府城舊冊店 ，見著因為 家私—工具圖書館＠台中市藍興里 熟sāi ê 友志．．．了後頭一改認真讀舊冊店 ê 冊，看著時代，舊冊店 mā 有自由時代雜誌，閣掀著三本911時代 ê 冊，這段我12歲前 ê 人生，論真講外口 ê 世界除去中殖教育，卡大會看網路廢片、線頂遊戲 ê 公會啞是家庭出遊外基本上是攏不知，好--lah，彼陣電視閣會看 Discovery系列 到 50台系列，電影（？）我啞是會講 he 是我人生 ê 空白。
Mā 意識著看舊冊若是系列--ê（manga--lah）愛查伊 ê 評價後來狀況 ánnòa，是無買，風格圖水做參考，另外發現台灣 bat 有過 ê 台灣成人雜誌，內容是在地為主，雖然女性是主要賣點，內底啞是有當時女性對肉片探討 ê 專文，尾仔查上新是到 2016，到今 iáu 有--ê 別刊類似主題 soah 已經是以日本等外國為主，會對這有意識是聽過身軀邊有人講想 beh 創成人雜誌，乎我掠準台灣今是無
總--是我認真想，2021--ah，若是愛單純探討討論網路是有真多所在，tī 這 ê 時代出版品可能真正愛有伊 ê 定位 kah 網路無法取代，啞無一定愛出版，著用別款方式來注文？今想有--ê kanna 最近「台灣好色」 ê 計畫 niâ（翻新舊台灣色情廣播劇、台灣色情出版表演相關歷史日曆），這陣發現我新 kah意 ê 作品 ê 作家原底是 tī 海--lih，今上岸，有影乎我卡認真 leh 想色情色圖色色這到底是 siàⁿ，sīánnòa 伊會特別，冊單是有兩本《成人漫畫表現史》、《成人漫畫研究史》leh 等我去圖書館借，台中公共資訊圖書館借有．．．好我知影認真想我這陣是卡無時間來研究 chia--ê
最後台中往台北愛赴彼陣 ê 中殖開庭 tō，thiám，加哉無 siáⁿ 雨，趕路用相片記錄卡多，半暝暗時無 siáⁿ 人通講，若愛講創 siàⁿ 愛講228，不得已行這步愛去乎中殖審判，kanna 一句，台灣啞未自由（後改若有必要我絕對袂閣選會乖乖 hông 掠 ê 行動）ah beh 返宜蘭時有經過八堵車頭 ê 228受難紀念碑，通講是台人赤手拚中殖失敗，和平島 #島上有冰 tú好有在地展覽，看著店員 ê 笑神是有暖--著，ah 行--過才知濱海公路 ê 湧足大．．．寫 kah chia thiám--ah，詳細有見面才講，有影有事故險仔死--去，這改啞有做各地青草(仔)茶考查．．．
－－－－－－
宜蘭（北宜公路） - 菜寮 - 中壢 - 台中 - 南投 - 花蓮 - 台東 - 東港 - 小硫球 - 高雄 - 旗津 - 台南（官田 - 林鳳營）- 嘉義 - 斗南 - 台中（卓蘭 - 三義 - 銅鑼 - 頭份） - 菜寮 - 台北高等法院＊註2：Tâioân人反抗殖民無罪 - 基隆 - 和平島 - 福隆 - 大里kán - 宜蘭
－－－－－－
Chia--ê 是這改路線 kah 卡有印象停落來 ê 所在，有影趕，後改有機會愛卡慢卡有計畫卡有準備--leh，有影有經過所在袂赴看袂赴去--ê，親像有經過這陣我才知 ê 舊香蘭遺址．．．
註1：聖山記事 20210908（台獨青年重機環島民主景點）
註2：多謝恁。閣有多多無 tī 相片 nih ê 台湾人。行動到今 3 冬半、法律程序總算到一个階段。台湾人 ê 行動是 beh hō͘ 台湾社會交帶、不是 kā 中華民國法院交帶。所以愛 kā 逐家報告、mā 足想beh 知影逐家看着 siáⁿ。感恩。9/18 拜六 20:00 青年独派2018228慈湖潑漆行動進度報告/討論會(2)：Redirecting...