看着多多人 chit 二日專工去食起家鷄閣 hip 相發文、袂輸足驕傲足歡喜个...tiō 感覺 HĂᴺ？？實在是看無。
統神 mā 不是頭一工做 pùnsò ah neh、伊平常時仔 ê 言論 tiō 有多多正相關 ê 線索。
起家鷄甲 pùnsò 合作、一直到伊踏着某一條社會公論爆炸 ê 底線 chiah 停止、到底有 siáⁿmih 通好特別去交關鼓勵个？?
想 beh 食鷄肉 chìⁿ 無別間店通選 ah nih？
莫怪 bat tǹg 乎中國黨 ê 人出來 hoah 講支持 318 / 太陽花得着上多 phok-á 聲上多資源、kahná in 比一世人反中國黨 ê 鐵枋深綠閣卡有價值 。（*留話一）
莫怪台湾人 hoah 台湾獨立建國介偏激、49 仔 hoah 台湾獨立建國 tiō 介高尚。
莫怪 kanta 上台仔頂 chiah 講台語亜是上班 chiah 寫台文 ê 人 teh 指教台語台文比 24/7/365 講寫讀听 lóng 全台湾話生活 ê 人閣卡大聲 soah 不知愛歹世。
問題不是「bat tǹg 乎中國黨 ê 人支持 318」．「49 仔 hoah 台湾獨立建國」．「上台仔頂 chiah 講台語」．「上班 chiah 寫台文」….
浪子回頭、知返、重新做人…tiō 算 kanta 踏出一脚步 mā 好 lah。
問題是無適合 mā 無應該乎 in 變做代言人、chit ê 社會 soah 足打拼 kā 代言權送到 in ê 手裡。
Hia ê 自頭到尾 lóng 做出正確 ê 判斷．正確 ê 選擇、不 bat 做不着代志 ê 人、chit ê 社會顛倒當做無看見。
「我 kanta beh 相信 bat 食過屎 ê 人講 he 是屎、不 bat 食過屎 ê 人講个我無 beh kā 伊信斗 (｡ì _ í｡)！」
結果 tiō 是逐个繼續食屎 
後一 pû 屎以經傳便便 teh hia 等 ah。
無限輪迴、萬劫不復。
食屎食甲飽、子子孫孫相連續食 (｡ì _ í｡)
Phô͘ hia ê「bat 食屎个 / 歸化个」phô͘ 甲 siuⁿ 超過；同時、soah 不愿承認行 tī 頭前 ê 先知先覺者確實存在。
不知疼不知惜。不知好 bái。
Ánne 不過換一个方式、繼續 ùi 根本 teh 排斥正確 ê 價值、teh 否定咱 katī、teh 拒絕行向好 ê 未來。咱心內其實不相信咱正經 ē 出頭天。
咱 hông 植民 siuⁿ 久 ah、心內有針、chit 欵集体心理狀態咱 beh 面對無？
有才調想像 ê 代志、chiah 做 ē 到。
面對、接受、改變 tiō 開始。做伙来做魔法使、好不好？ (｡ì _ í｡)
