古早有一个王國八出一个國王眞有良心。伊對百姓成有疼心。有一日伊講：「望我个子民朗得着喜樂！我卜制定利益萬民个律法！」伊个心思意念是好。不止仔好。
有一工、國王听着幾个作嗇人塊議論：「Pháng 實在有到貴啦！咱作嗇人有到不值！做甲大粒汗細粒汗即有通買伊一塊 pháng！ 」
國王听了眞感慨、伊下令：「對只馬起、一塊 pháng 干礁通賣 1 篐銀、袂用得加。」
百姓夯双手賛成：「咱个國王實在照顧老百姓啦！」
不久一禮拜過去 …
歸个王國煞買無 pháng
做 pháng 个司父共國王解說：「國王啊！我做一塊 pháng 个本着愛 2 篐！今汝限我干礁通賣 1 篐我都愛倒 thap li̍h ！我實在賛袂條愛收担啦！」
國王閣有听着大臣塊議論：「咱王國个苹果實在好食、可惜收了有卡少、無通乎全國个人享用。」
國王愛作嗇人加種苹果。伊共作嗇人講：「恁種愈多苹果樹我會乎恁閣卡多錢。」
作嗇人听了朗眞歡喜、逐个拼勢種苹果樹。不閣無人用心塊栽、苹果樹是那栽那多欉、煞無一欉有生苹果、路尾朗變死欉。
國王閣有听着 kám-á-tiàm 个頭家講、生理朗去乎大間超市搶去。國異議有心卜共 kám-á-tiàm 个頭家鬥相共。
伊下令：「對只馬起、超市个店面袂使卡大一間 khiā-ke。」
一月日過去 …
全國無半間大間超市、一四界个 kám-á-tiàm 朗塊排列、排甲躼躼長。物價逐項起。
囝仔人問講：「價賬那會那來那貴？國王咁不是卜共咱鬥相共？」
有大智慧个經濟學家：「國王限制店面个規模、會乎超市無効率、成本降袂落來、價賬自然着那來那起高。」
國王實在沙朗無、伊用心計較卜照顧百姓、那會顚倒害因那來那艱苦。伊听講經濟學家成有智慧、着請教伊。
經濟學家畫一幅圖、是塊畫一條石頭仔路、石頭逐粒朗眞水、不久路煞 thàng 對火坑去。國王看了問講：「此是省乜路？」
經濟學家：「此是 thàng 對地獄个路、是用好意來鋪成。着凖國王汝有心卜共萬民鬥相共、汝那不八經濟个原理、汝所頒布个律法甲命令、終其尾會去害着汝想卜幇助个萬民。」
國王听了即覺悟、原來伊永過朗是好心做歹代志。自喜工起、國王卜制定任何律法甲命令、朗會斟酌後果、招經濟學家、士農工商、甚至囝仔人來參詳。此後伊成做眞正个好國王。
