我細漢个時陣，予厝內播个大話新聞啟蒙台灣意識，自許時就一直卜學台語 ，但是過十外冬，攏無學著啥乜名堂，而且iáu敢若咧退化!
因為我許當時毋知影按怎學台語，干焦學會曉台羅、學一寡rainbow台語是khēng、giraffe是麒麟鹿（新聞定定用即款詞考路人），就感覺家治誠𠢕，到愛佮序大講話个時煞無半撇，悲哀。
可能誠濟厝內母語是台語个少年人嘛佮許時个我仝款，叫是家治「已經會曉」台語啊，其實家治个台語能力有真大个破空，而且會隨一直無咧講个時間退化。
學生時代逐家攏愛學英文，許時个方式是記規千个單字、鼓勵加用英語（當然，暗記單字是足無效率个方式，但是重點是詞彙量愛濟）。到大學攏讀畢業啊，我才想著共即个方式推廣到用來學台語，加用台語，佇厝干焦講台語，佇外口盡量揣人講，電視、youtube攏看台語，頭殼內底嘛換用台語思考，用台語想到khê-khê時就發現著袂曉个詞，著愛連鞭掀字典。自按呢學一年，佮人溝通攏誠紲拍啊，偆四字俗語、孽譎仔話即款个媠氣个講話，iáu需要累積時間來學。
學台語成功个經驗予我誠有成就感，即馬咧想卜用即个方式共英語學好，因我我以前讀英文是干焦應付考試爾，無用即套方式認真學到好。
）只馬レ打字嗎是那打那查。