雖然今年个選舉夭袂結束，不閣眞多政黨个地方候選人，以經開始發表有關本土語言个意見唖。
蔡英文政府治只段時間，推出「國家語言發展法」、「雙語國家」...等等語言政策，有好个嗎有呆个。
以下着對幾个政黨，發表我加忌个看法。（有 
个圖是借阿華師个，不是我個人个評價）
民主進步黨
我對因上袂爽着是：「英華雙語國家」政策。
治本土語言强卜死去个只馬，閣想卜用兩種强勢語言來壓縮資源。若是卜講英語程度，台灣治亞洲，除了韓國以外，以經是「非英語殖民國家」第二賢唖。放捒台灣文化、全面英語化服務英語人（外國人不是全講英語），這敢不是加忌乎人殖民？閣再講，學校朗必修英語唖，大學閣有畢業門坎。是嫌台灣英語補習班無夠多是不？
再來，我感覺政黨票頓乎大黨，是眞打算个代志。中國黨滅亡了後，總愛有一个政黨來監督民進黨，問題是我不知愛選叨只个 
時代力量
兩个候選人治昨昏發表个言論。看了直接戇去，只欵反本土派用到爛去个借口，到今閣能凍看着，實在是...
另外邱顯智前年有對雙語政策做批評，不閣主要是講英語教學个部份，無講着本土語言。
台灣基進
雖然有講着母語，夭是束縛治英語迷思內底。因主張愛是本土語言+英語个雙語國家，只點甲阿華師个觀點相同。英語不等同國際化，這我治頂高有講着。
而且我看因FB，十篇有九篇レ罵中國黨，無法度認同因有監督民進黨个能力。
社會民主黨
FB無省レ活動，簡那歸个政黨春一个人。查苗博雅FB，嗎無看着雙語政策相關个，可能因爲是市議員定。卡歹判斷。
--
愛尋一个甲我立場相仝个政黨眞無簡單。以上是我加忌个看法，希望逐家能凍交流一下，乎我治2024前有一个想法，感謝 