中華民國个國文課、名義上是國文課、事實課本共掀、10 課課文有 9 課是漢文、干焦一課是中文(中華民國正港个國文)、只課閣無一定會教、老師定定朗嗎共籠過、所以事實因是「漢文先生」隻着。
中華民國个漢文先生嗎不八共咱品明講、因所教个是漢文、因朗講彼是「文言文」也是「古文」、有無。續落去有足多老師閣會加一句講：「原則上、咱上課干焦會去教『文言文』也是『古文』、『白話文』搭請各位加治返去讀着好。」
各位啊、中華民國个漢文先生講只段話、事實是塊共咱洗腦、此是一種真恐怖个認知作戰。因將「漢文」稱做是「文言文」(「古文」)、閣將「中文」號做「白話文」。只號意思着是講、「文言文」(「古文」)甲「白話文」朗是仝一个語文、風格無仝、是文白个爭差娘。
此冥角着治者、中文用中國話來傳授是天公地道、絕對袂重 tâⁿ、妥當个道着。今只馬食力啊、「漢文」去乎因凖做是「中文」、只聲因着是塊共咱暗示講、漢文用中國話來傳授是天公地道、絕對袂重 tâⁿ、妥當个。
不久問題出治漢文甲中文事實着是無仝个語文、者个「漢文先生」事實因對漢文無內行、因是將「漢文」共當做是「中文」、啊因本身對中文是有內行無不着。所以講因用中文个觀點來解說漢文个文意、脚頭于想嗎知、決定會去抵着重 tâⁿ、解說袂通。
咱永擺仔做學生、「國文」个考試朗會出「漢文」个閱讀試驗題目、啊一般的老師那塊教只欵題目、朗會𤆬咱讀只篇漢文、啊開拆伊个文意、啊不久咱定定朗會抵着一欵現象、着是講、只篇漢文、老師用只套說帖來解說文意、咱用只套說帖卜來套治別篇漢文、煞又閣解說袂通啊、換做別篇漢文、老師嗎綴塊換一套說帖、說帖是那講那多套、啊逐套說帖所合用个時機閣袂按算得、老師加治嗎交帶袂清楚、此問題着是出治講老師所精通个語文是中文、不是漢文、不閣伊閣共漢文凖做中文卜來解說、卡講嗎全問題了了。
咱那胡途去相信講「漢文」甲「中文」是仝一个語文、當然嗎會去信「中國歷史」也是「中華歷史」有 3-5000 千冬只欵嬲話、因爲漢文治東亜大陸有 3-5000 冬个歷史。
漢文治東亜大陸有 3-5000 冬个歷史、漢文不是一種語文、伊是一類語文个通稱娘(只類語文原則上是「書面語」个型式)、漢文下底有幾那種分類、逐時代个漢文朗是獨立个語文。