世間言語數千種、上無六千種、有國家機器通倚靠个無到一百个、大部份个語言朗是無國之語。總是無國之語無必然朗總是中小語言(語族人口無到千萬人)、有真成多是語族人口上千萬(eg.台灣話)、甚至上億个嗎袂少(eg.福建話、廣東話)。
自按呢、咱不免為着台灣話是無國之語來悲觀、世間夭閣有 99.9% 个話語是甲咱立仝平个。
咱當然想卜成做有國家機器通做腹俱个語族、總是此袂强求得、不是咱付出外多个精神、也是氣力、着穩凍會照咱个瞈望來成。
咱愛按算講、台灣話永世無國家機器通倚靠(上無愛有按算咱只世都看袂着)、不久閣通做到國家機器部份上介要緊个功能、着是傳授基礎學科甲新智識、啊閣有重要理論、對新事物有號名个才調。卜做甲按呢來是無輕可、總是做會來、咱那付出有到額、必定會凍照咱个瞈望來成。咱各人聽好通做个、上介簡單、成本嗎上介低、着是用聖經做教材、倚靠台灣話來學日本話(學別个語言嗎好、總是我感覺學日本話上介理想)。
語言學習是按盞興旺語族?
語言學習不那趣味、對無國之語个人、語言學習是豐富本族話語个活路。透過語言學習个過程、無國之語个人通用本族个話語、來學別个有國家機器通做倚靠个語言、學乎徹了、會凍用喜个語言來學本族話語夭閣欠缺个智識甲學問、路尾隻閣共靴个智識甲學問轉換、內化、成做本族話語个智識甲學問、通達成豐富本族話語个目的。卜愛完成只項目的、要緊着倚靠本族个話語來學別族个話語、語言學習个過程、那無倚靠本族个話語來學、終歸尾是袂凍豐富本族个話語、着干焦是做義量、學心適、學一下趣味个娘。
聖經是按盞成做語言學習上介理想个教材?
聖經是語言學習上介理想个材料、內容掽派閣快得、對無國之語个人、閣卡要緊。有國家機器通做腹俱个語言、資源卡富足、凡世無欠聖經只項資源、不閣對無國之語个人、聖經凡世是因唯一个倚靠。
我講聖經內容掽派閣快得、原由是按呢：
1.掽派：聖經故事多閣完整、對話(會話)嗎豐富。
2.快得：聖經是去逢翻譯了上介透底个册、是去逢翻做上介多語个册。
興旺台灣話是按盞上介理想着學日本話?
日本話卜對譯做台灣話有二項優勢、着是日本製个漢字語詞・和製漢語、會凍泉仔讀做台灣話、凖做是新台灣話(中文漢字語詞技術的來講云那有只項个優勢、不利過中文个智識体系不比日本話靴頂眞、完備、不是台灣話卜「取經」个好對象、啊那漢文、漢文所記載朗是舊時个智識、有真成多以經朗退時、落伍啊、綴袂着時代、綴袂着時勢、綴袂着潮流、云那不是台灣話卜「取經」理想个對象)、閣一項優勢、着是日本製个外來語、7、8 成个都合朗通凖做是台灣話、閣春个喜 2、3 割、小可改良嗎是通做台灣話、上要緊是只二項優勢在治台灣話接觸日本話到今以經有百外冬个歷史、過去台灣話着享受着只二項優勢所帶來个紅利、到今夭閣塊享受、未來嗎愛繼續受着致蔭。立帶興旺台灣話个立場、日本話以外、無甲一个語言是只二項優勢朗樵着、所以學日本話是上介理想、卡贏世間任何个語言。
發展「台日智識交換体系」、用台灣話來学日本話、搭閣用日本話來学逐種學科个智識、無論是基礎个學科、數學、物理、化學、生物 ... 云云、也是法律、財政、金融、工程、醫學、美學、媒体傳播 ... 種種、共者个智識、對譯做台灣話、壯大台灣話、豐富台灣話个內才。