科學个運行是「否定不着个假說」、也着是號做「反証」、「駁倒」、「反駁」(disprove)。科學無通証明(prove)假說。科學不是卜証明假說。科學無才調通反証世間个一切、所通反証是極有限。親像講、「世間有上帝」、只條論述無塊反証。科學袂使共只條論述駁倒。袂使反証、無代表通証明。
假那科學袂凍証明假說(hypothesis)、按呢假說卜按盞成做學說、理論(Theory)、甚至是定理、定律(Law)。
1.理論上、科學無定律、干礁假說娘。
2.咱那掠卡「濶」个定義塊講、譬論「Newtons law」、意思是「經過幾那百/千冬夭未去逢駁倒、閣有足大足大个影響力」。
實在講、「Newtons law」嗎是無影。因爲 Einstein 後來發明一般相對性理論(general relativity)。Newtons law 是「大概」娘。
按呢潭仔所講「世間有上帝」、只條命題不着無塊反証?
無不着。事實上帝無治塊「世間」內、不隻受世間限制个科學無通共伊反証甲証明。
世間咁有「証明」个法度、因爲咱講科學干礁通反証、那按呢証明着倚靠省?
着看卜証明到省乜坎鏨。「明仔載咁會出日頭?」、「日頭咁會落山?」總是、咱無需要 100% 數學性个証明、夭有法度用理路思考。
那卜講咁通証明明仔載出日、黃昏時落山、此是無塊証明。不閣伊按呢運行 45 億冬去、所以講明仔載仝欵是有理、不是無理。干礁無通証明娘。
所以科學乎咱有才調反駁眞多代志、春个「有可能」个代志、咱着用理路(reason)甲經驗(experience)加治想。不久咱由原着代先倚靠科學、共一切無可能个代志排除在外。因爲咱个理路甲經驗嗎無到靴利。
原來科學不是証明事理个家私、是共事理駁倒个家私、是反証事理个法度。又閣世間無有純然的个証明、彼干礁治塊數學个世界隻有存在。世間無正港个定律甲定理、咱所稱做定理甲定律个、不過是經過千冬、百冬夭袂去逢駁倒个假說。理論、學說个本質嗎干礁是假說、卡堅固个假說娘。夭閣因爲科學袂凍証明任何个事理、咱除了倚靠科學、閣着倚靠理路甲經驗隻通彌補科學个不足。
理路甲經驗、幫贈咱倚近証明事理个真相、總是袂凍成做「正港」个証明。也咱嗎不免正港个証明、獨獨通乎咱有斷定个根據着有到額。
所以咱那按呢看、不隻有「民主」个基礎。科學乎咱个社會一个基本个、逐个通做伙倚靠个根基、不閣因爲彼無塊「証明」、逐人着用加治个理路甲經驗來做加治个生活。
按呢共看、假說隻是主角。那無人提出假說、只出科學金光戲着免搬啊。假說是人對某乜現象觀察來提出。觀察个過程、常常不是單純觀察。定定着配合設計實驗、測度个方式。所以講實驗个設計、測度个方式那無合宜、生出个假說着立袂條。
親像講、咱卜知海吝有外多海翁。咱設計按呢个實驗。用茶甌仔做測量个容器、舀海水起來、算茶甌仔內有幾隻海翁。咱共只个實驗做十萬改、發見茶甌仔內參一隻海翁都無、生出海底無海翁个假說。咱現不打着知只个假說不着。因爲伊是對無合宜个實驗設計甲測度方式來産生。