【散文】解夢大師

夢,真正是一个足神奇ê物件;Bat聽講人佇眠夢ê時陣魂魄會暫時離開你ê身軀,你所夢著ê其實就是你ê魂魄拄著ê代誌;Mā有人講會眠夢干焦是你「日有所思,夜有所夢」爾爾;無論原因到底是佗一種,這攏毋是我有能力研究ê範圍,所以我當然毋是beh討論遮ê。
像阮媽媽就認為,夢是一種預言,是神明kah祖先想beh提醒伊愛注意啥物代誌;所以阮兜有幾若本kah「解夢」有關係ê冊,媽媽有時陣睏醒ê頭一項代誌就是掀開遮ê冊來看,ná看ná lek目眉,看著伊按呢就知影伊一定是koh夢著啥奇奇怪怪ê物件。
是講媽媽伊有一个足神奇ê講法,就是講若是夢著khah無好ê夢,顛倒會發生好代誌。

「按呢,若是我夢著美夢neh?」
「若是美夢,就袂去查解夢ê冊lah!」因為你睏醒了後,干焦會記得彼个足爽快ê気持ち,根本袂想著愛去看冊。
若是按呢想,人生其實就是一直揣理由來予家己過了khah四序。

細漢ê時,我bat有一擺夢著阿公過身,彼當時阮阿公koh leh蹛院,所以我是驚醒ê;雖然有意識著這攏是夢,我猶是趕緊kah媽媽講,就是這个時陣,媽媽kā我講「夢攏是顛倒ê」,而且伊mā𤆬我去病院,看阿公koh好好仔佇遐食飯,我就安心ah。
猶毋過這个安心,才維持五工爾爾。
過了五工,阮爸爸媽媽就佇半暝接著病危通知,隔轉工,阿公就轉去ah。
彼擺了後,若是夢著有人死去,我就會緊張kah胃疼koh無法度安心落眠;毋過我掀開阮兜遐ê「解夢大全」,攏講夢著有人死去是好代誌,會有錢財入來,雖然一直到這馬我攏毋知影錢財佇leh佗位lah。

按呢講來,到底是夢著美夢khah好,猶是惡夢khah好?

我kah阮小妹定定講這个耍笑:「你就好好仔睏,夢內底啥物攏有。」
是lah,好ê䆀ê,夢內底攏總有;若無,至少你leh睏ê時陣,就會使暫時放捒現實生活中彼寡ak-chak ê代誌。

猶毋過,遐ê美夢mā無一定永遠是美夢。

就佇舊年年底,我夢著我小學ê代誌。
我kah小學ê同學做伙leh耍,足歡喜ê,而且逐家攏是我記持中,12歲ê面容,包括我家己mā是;耍到一半,我hiông-hiông發現這一切攏是我leh眠夢,我就開始哭,12歲ê in就圍佇我ê身軀邊kā我安慰、kā我惜惜,In問我為啥物leh哭,我干焦一直搖頭,因為我知影in攏是我ê夢,阮攏無法度轉去彼个時陣ah。
然後我就清醒ah。
我摸一下我ê喙䫌,有小可仔澹澹,原來我lah眠夢ê時陣是真正leh哭。
因為我知影阮攏無法度越頭倒轉去,干焦會當一直向前行。

啥物是美夢?啥物是惡夢?
夢著快樂ê回憶,猶毋過彼攏是過去ê代誌;夢著有人死去,猶毋過敢有啥人會當永遠活leh袂死去?
照按呢想,其實mā無啥物美夢kah惡夢ê區別ah。

定定聽著人講:「歡喜mā是一工,悲傷mā一工。」
這个講法我是同意,因為毋管阮做啥物代誌,毋管阮気持ちê好䆀,攏無可能干涉時間ê運行。時間對每一个人攏是公平ê。
死亡mā是。

「既然毋知影家己當時會死,就kā每一工攏當做最後一工leh活。」
阮攏無法度確定家己一定koh有明仔載;活到beh 23歲,Mā看過足濟新聞報導,逐工攏有人因為意外過身,敢有可能後擺就是我?這攏真歹講。

「若是無小心koh看著明仔載ê日頭,就是趁著ah。我一直攏有這種想法。」

「人生ah,敢毋是一直揣理由來予家己過了khah四序?」

順紲宣傳一下,我後個月會kā我ê散文集印出來
若是對我寫ê散文有興趣,會當傳訊息予我,我才kā你講詳細~

4 Likes