伊行甲比平常時閣較慢，細膩共手頭的碗捀咧，寬寬仔踅過庄仔尾彼欉老榕仔(tshîng-á)樹，阿川的厝就佇頭前毋偌遠。
日頭拄欲落山，四界人兜攏是婦人人(hū-jîn-lâng)煮飯的芳味，伊的腹肚嘛小可仔枵矣，伊驚阿川等久袂堪得枵，跤步趕緊，行對怹(in)兜門跤口。
拄欲共喝，阿川就對內底雄雄走出來，伊驚一趒，險寡仔規个碗攏捙去。
阿川伸手共扞咧，「哎喲！阿青！你是咧趕狂啥？險仔共你挵落去。看你半工猶袂來，我拄欲來揣你呢。啊你手提彼啥？」
「花啦。」
「閣提花來喔？」阿川手佇阿青肩胛頭搭兩下，共消遣：「你真正誠文雅呢，定定按呢送花來予我，比人咧送查某囡仔閣較骨力。」
伊心肝搐一下，面上猶是笑笑，「無啦，啊就門跤口有種，無送人嘛是放予蔫去，就想講提來送……」
阿川越頭行入去內底，順紲(sūn-suà)共阿青手內捀的碗提過去，囥佇桌頂，「你會當提去送佮意的姑娘仔啊。」
碗內貯(té)半碗水，兩蕊茄仔色的煮飯花浮佇水面，半開半合，微微仔清芳。
阿青略略仔笑一下，手去弄花蕊，「你就知影我無啥物佮意的查某囡仔。」
阿川看伊無啥愛講，無閣加共詼(khue)。阿青人緣投閣骨力，對待朋友嘛袂窮分(khîng-hun)，毋過就䆀佇傷頇顢講話。真濟人想欲幫伊講親情，伊攏推辭講無著急揣某，逐家落尾就攏袂來佮伊囉嗦這。
阿青看阿川恬落來，趕緊代先講話，攑頭四界看，「你衫仔閣囥規堆無去洗。」
「我就無閒啊，普渡咧欲到矣，逐位攏咧叫米，廟仔幾若間咧叫，日本人遐嘛愛送，送米攏送袂赴矣，轉來就忝甲隨睏去，當陣仔乎，連飯攏無通好食。」
「按呢哪會用得？！」阿青目頭隨結起來，「顧佮你講話，煞袂記欲來揣你食飯，咱緊來，轉來你較早睏咧，衫仔我才共你提來洗衫窟仔洗洗咧——」
阿青話猶袂講了，阿川隨笑出來，「你真正有夠賢慧呢，我看你毋免揣某啦，啥人娶著你，啥人就有福氣。」
若按呢，你敢欲娶？
你敢欲娶？
阿青毋敢共看。伊驚若這馬佮阿川相對看，這句伊佇心內毋知影講過幾擺的話就會旋(suan)出去。
伊袂用得講。伊嘛毋免講。
就親像門口細欉仔生的煮飯花，毋免旋枝出牆圍，恬恬仔開，素素仔媠。
「莫佇遐練痟話，腹肚袂枵呢？緊來食飯啦。」
阿青越頭先行出去，若像咧覕(bih)。阿川無隨綴出去，向頭看彼碗水內的花，學拄才阿青用手去弄花蕊。
「創啥？毋緊來食飯？」
阿川應聲，綴阿青行出去，雄雄講一句：「阿青，多謝你送我花。」
「啊毋是嫌甲？」阿青目睭反白仁，做伊先行對進前去。
「若像你講的，放咧予蔫嘛是拍損，提來加減鼻芳嘛袂䆀。」
阿青越頭共看。佮平常時的阿川仝款，猶是啥物攏毋知的阿川。
阿青嘛佮平常時仝款，微微仔笑。
「好啦，有我才閣挽來。」
外口的天色烏去半爿，一半猶是柑仔色、青色佮茄仔色，若像天公伯仔偃倒染料，色水潑滿天。厝內的煮飯花共伊的色水嘛𪐞(tòo)予碗內的水，素素仔媠，恬恬仔開，微微仔清香。
Fin.
ps. 紫茉莉，台灣人古早叫做煮飯花、胭脂花。
逐家好，頭一擺佇台文的板po文，不止仔緊張。這是一篇「BL(Boy's Love)」的小說，也就是仝性戀愛的文類，這種小說佇文學創作內面真少人寫嘛真少人看，毋過若是寫著角色講台語，我一定用羅馬字抑是正漢字來表示。有讀者佮我講，因為看著我的文章用台文，而願意來接觸、學習，我感覺這嘛是一種推捒台文的方式，予我有動力繼續來寫。
這篇文章是因為聽著詹雅雯老師的〈煮飯花〉這條歌寫出來的，我的台語寫作嘛無蓋厲害，那寫那學，若是有用詞無正確，也請各位先進指教，勞力！
