Ē-hiáu 看台文以後，kap bē-hiáu ê 時-chūn 有1 ê 上大 ê 差別 to̍h sī：會使去看 pa̍t-人 寫 ê 文章，這和ka-tī chham 厝邊隔壁，親情五十 teh 開講，sī 全然無 kâng ê tāi-chì。
Tē 1，一般 nā teh 開講，所用 ê 字詞，lóng khah 粗淺，罕得 ē 講1寡 khah 深 ê 字句，真 chē khah súi ê 詞一般 sī bē 講--tio̍h，beh ǹg望 ùi teh 交談 ê tang 中，去聽 tio̍h khah súi khùi ê 物件，koh 會使 ka 記起來，不如直接去看一寡好 ê 作品，直接吸收，Che 學習 ê 速度 sī 天差 leh 地。Koh 再講，有 ê 人 ê 生活環境內底，根本 to̍h bô siáⁿ-mih 人台語講 liáu 會好 sè！
Tē 2， 舉1 ê 例，有一寡khah無 teh 用 ê 物件，咱日常 mā bē講--tio̍h。有1 pái，我讀冊去讀 tio̍h 草絪，去看註解，原來 sī 用 ta 稻草 cháng ho͘ 1束1束，beh the̍h 去灶--ni̍h hiâⁿ火 ê 物件，我 to̍h 去問阮 tau ê 台語組長(goán老母)講：「恁 khah 早 kám bat 用過草絪？」伊應講：「有 ā，thài 會 bô？」Ah 我to̍h ka tiuⁿ 講：「Ná 會 lóng bô kā 我教？你看！Che 我 iû-koh bē-hiáu！」阮老母 to̍h 笑講：「Chín sī beh 去 tó-位 thang 講草絪--lah？我生你進前，to̍h lóng teh 用 gah-suh--ah，我 sī beh án-chóaⁿ 有法度去叫你講，去絪1絪草絪來 hiâⁿ 燒水 lah？」To̍h sī án-ne，我當然 sī 1世人 m̄-bat 聽過草絪 chit 2 字。Koh 親像醃缸這種物件，mā sī kāng 款 ê 意思，nā tòa tī 都市，ta̍k-ke lóng 有水塔，nā khah 庄腳--sió-khóa-á-eh，mā sī 用大 kha 塑膠桶 teh té 水，sī beh 有啥物時機 thang 來講醃缸這2字？真 chē 物件 nā bô 寫--lo̍h 來，beh kan-nā 靠chhùi 講，失傳正經 sī 必然 ê tāi-chì。
而且，有讀 sī 真真正正有效--ê，有 1 工我 tú 好 teh 和阮小弟開講，我 hiông-hiông puh 1 句講：「Tāi-chì 你 sī 緊早慢ài 面對--eh！」，我講--出來 ê 時 chūn我 ka-tī mā 驚 1 tiô，心內 ĕ 1聲！我口語 lóng 慣勢講早慢 niâ，bô hit 字「緊」，我彼工讀 tio̍h 緊早慢 ê 時chūn 我 to̍h 感覺講，án-ne 講有影 sī khah súi-khùi neh，bô 想 tio̍h 講，過--幾日á，我自然 to̍h án-ne 講出 chhùi，che 證明講，這 ê 詞 í-keng hō͘ 我吸收入來--ah，hit 時確實 sī hō͘ 我真大 ê 衝擊，有讀，sī 真正有效，m̄ sī teh 讀心酸--ê！
會 sái bat 字，會 sái 讀冊，正港 sī 一件真 chán ê tāi-chì，各位 nā 有機會，mā 會 sái 加減去鼓舞身邊會-sái 接觸 tio̍h ê 人，pun-tiuⁿ chit chióng 歡喜 ê 心情！
