Éng pái á chò gín á sî, bat chi̍t chām leh hong phah iá kiû, hit chūn 2006 nî, Tâi oân thang kóng choân bîn to leh hong iá kiû, pòaⁿ mê á tiān sī chūn .leh lóng leh khòaⁿ Ông kiàn bîn tâu kiû, kap saⁿ goe̍h siáu má chó͘ ū tè pí, gín á kui tīn ê chio chi̍t thoa to̍h leh ha̍k hāu ūn tōng tiâⁿ phah iá kiû, kiàn nā pài la̍k lé pài, ha̍k hāu lóng choân lâng leh sîn kiû ê, á lâng nā chio ū kàu gia̍h to̍h cho͘ tūi leh pí sài, kúi ā keng ha̍k hāu lóng ánne.
Hit chūn góa to̍h sī ánne, gún chi̍t tīn gín á kò͘ tēng pài la̍k lé pài sio chio tī sūi hong sió ha̍k á hia phah kiû, hit chūn siōng kài kî thāi pài la̍k lé pài koán kàu, beh ài phah iá kiû.
Gún chi̍t tīn gín á to lóng tī ūn tōng tiâⁿ tiong ng hit tè khàng khoah ê chháu po͘ hia phah kiû, á chit chūn to ū chi̍t kóa pháu tō leh sàn pō͘ ê a peh a ḿ lâi leh chak chō, hia ê a peh a ḿ sam put gō͘ sî á to̍h lâi beh kā gún kóaⁿ, bô ài hō͘ gún tām hia phah kiû, kóng gún tām hia phah kiû hûi hiám, kiû ē kā in kiat tio̍h siong.
Taⁿ chhàu tōaⁿ to m̄ bián la̍p sòe kim, he chháu po͘ hiah khàng khoah tio̍h, gún gín á lâng la̍t thâu ā bô tōa, he kiû ná ē kiat ùi pháu tō khì, chún hō͘ lí kiû nǹg ē chhut khì, ûnná to lóng tī thô͘ kha leh lìn niâ, ā bē kā in kiat tio̍h siong , ánne ā beh kā gún kóaⁿ, ū iáⁿ ko͘ khu̍t sí bô lâng.
In ánne sam hoan lióng chhù kā gún kóaⁿ, kóaⁿ lóng kóaⁿ bē tín tāng, in lâng oa̍t thâu cháu gún to̍h koh sûi so̍h toài chháu po͘ phah kiû, bóe .á hia ê a peh a ḿ cháu khì kā siú ūi á tâu, siú ūi á to̍h lâi kā gún kóaⁿ, ûnná kóaⁿ lóng kóaⁿ bē cháu, bóe .á siú ūi á nā khòaⁿ gún giâ bat tah ji̍p lâi .ê, ā sī sa chhiú thò ji̍p lâi .ê, lóng ùi tōa mn̂g to̍h kā gún cha̍h .leh, bô ài hō͘ gún ji̍p lâi sió ha̍k á.
chū ánne gún āu chōa lâi to lóng ùi chhiûⁿ á ka peh .ji̍p .lâi, á kiû phah kah chi̍t pòaⁿ siú ūi á to̍h koh lâi kóaⁿ, gún lóng kà kò͘ it lúi .ê to̍h siòng khòaⁿ siú ūi á lâi ā bē, lâi ā ba̍k bóe to̍h thoa .leh hō͘ gún chai, gún to̍h hó cháu tāi seng, bâng hō͘ siú ūi á chang tio̍h, chū ánne siú ūi á ta̍k chōa kóaⁿ .lâi lóng tng bô gún ê lâng.
bóe .á i chǒa chhut chi̍t ê choa̍t chiau, i lâng ā bē gián lâi kā gún kóaⁿ, i to̍h làu chúi beh ak chháu po͘, hō͘ gún bô táng phah kiû, chit pō͘ ū iáⁿ hiông, á gún m̄ chai tó chi̍t ê thian châi siūⁿ tio̍h chit lō khiáu pō͘, kóng iā thô͘ tui kā chúi khang tū .leh, á thâu téng koh khàm chng á, chū ánne āu chōa siú ūi á làu chúi beh ak, gún chiàu siông phah gún ê kiû.
chi̍t kái m̄ chai ánchóaⁿ, káⁿná siú ūi á chai gún leh pìⁿ sáⁿ mi̍h khang, to̍h kā chúi làu koh khah tōa káng, á gún kiû phah kah chi̍t pòaⁿ, óa pún lúi hit giah ê chúi khang hiông hiông pǒng chi̍t siaⁿ kài tōa siaⁿ, chng á kui tè hō͘ chúi chhèng .khaih, á thô͘ hún á chōaⁿ kah móa sì la̍k kè, pó͘ chhiú kap kòng kiû ê kui seng khu ho͘ chōaⁿ kah choân làm thô͘, ánne tâm lok lok, tâu chhiú to ā khì ho͘ chōaⁿ tio̍h, khòaⁿ he chúi làu gōa hiông to̍h hó, hit chūn tú á tio̍h góa kòng, góa kui seng khu kō kah choân làm thô͘, ta̍k ê ā beh chhiò kah m̄ chai lâng, chit chân tāi chì chín koh ka siūⁿ .khaih ū iáⁿ chiâⁿ sim sek.