[Í-hā lóng-bô kóng tio̍h kio̍k-chêng 
]
Pêng-iú ū-tang-sî-á chò pian-chi̍p ê khang-khòe,
mā ē hō͘ chhōe khì sím-cha chok-phín,
chòe-kīn i sím chi̍t-pún Pe̍h-ōe-jī ê ang-á-chheh,
sím liáu to̍h kā chheh sàng hō͘ góa tha̍k.
Che sī góa thâu-chi̍t-pái tha̍k Pe̍h-ōe-jī ê ang-á-chheh,
lāi-té sī Hàn-lô--ê,
tha̍k khí-lâi chin khin-sang.
Kóng--ê sī chi̍t-ê khó-kó͘ ha̍k-ka ùi bī-lâi cháu tńg-khì kòe-khì,
kah Má Ngá-kok bo̍k-su, Pa Khek-lé bo̍k-su, Tēⁿ Khe-phuàn bo̍k-su, Chhòa Pôe-hóe sian-seⁿ chit-kóa lâng se̍k-sāi,
mā khóaⁿ-tio̍h in án-chóaⁿ thui-sak Pe̍h-ōe-jī ê kò͘-sū.
In-ūi sī Tâi-oân bûn-ha̍k-koán chhut-pán--ê,
pún-lâi siūⁿ-kóng lāi-iông ê chiok bô-liâu,
m̄-koh pí góa siūⁿ--ê chhù-bī chin-chē,
chí-sī kám-kak siūⁿ-beh kóng tio̍h ê mi̍h-kiāⁿ siuⁿ-chē,
kiat-kó ū--ê kio̍k-chêng an-pâi kah khah bô chū-jiân 
Khòaⁿ liáu góa chiah thâu-chi̍t-pái khì chhōe "Tâi-oân-chhùi-chhìn" lâi thiaⁿ,
khak-si̍t chin hó-thiaⁿ,
che sī góa chhōe-tio̍h siu-im khah hó ê pán-pún,
ū hèng-chhù ê lâng ē-tàng thiaⁿ khòaⁿ-māi:
Nā-sī siūⁿ-beh bé chit-pún ang-á-chheh lâi khòaⁿ,
ē-tàng chham-khó pán-koân ia̍h téng-koân ê chu-sìn:
