Chòe-kīn nā khòaⁿ-tio̍h ū siá Tâi-bûn ê tiàm lóng ē ka hip--khí-lâi.
Hi-bāng āu-pái tī lō͘--nih lú-lâi-lú-chia̍p khòaⁿ-tio̍h Tâi-bûn!
-
Formosa Tê
Bē lim--ê
Chiâⁿ kah-ì Formosa Tê iōng lô-má-jī chhin-chhiat koh súi-khùi. Bô-chhái hit-ji̍t in leh hioh kòe-nî, lēng-ji̍t chiah khì ka kau-koan--chi̍t-ē!
-
Chí Ū Hún Îⁿ
Bē lim--ê
Siáⁿ-mih óaⁿ-ko to ē-tàng lām hún-îⁿ ê liâng-tê-tiàm. Tē 1 piàn khòaⁿ-tio̍h ka-pi a̍h leh lām hún-îⁿ! Góa bô kah-ì lim kah pá-tu-tu, khì 2 pái lóng lim âng-tê lām hún-îⁿ, hó͘, chiâⁿ-si̍t ē sòa!
-
Koeh Niau
Bē sò͘-si̍t ló͘-bī, phí-chah, mī-thng, ke-nn̄g-ko
Tī chia thâu-pái chia̍h-tio̍h hiah-nih hó-chia̍h ê sò͘-si̍t. Kôaⁿ--lâng chia̍h chi̍t-óaⁿ in ê tho͘-má-toh mī-thng, kúi-ê-lâng to sio-hut-hut.
-
Chhōe Chá Tǹg
Bē chá-tǹg
Seng-lí hó kah ta̍k-put-sî to chhah-chhah-chhah, hioh-khùn-ji̍t nā bô khah chá peh--khí-lâi koh chia̍h bô! Ba̍k-chiu kheh-kheh chhìn-chhái chù-bûn to hó-chia̍h, soah m̄-chai beh o-ló tó chi̍t hāng. XD
-
Sam Liâng Jī Niû
Bē Thài-kok ka-lí-pn̄g, chhá-mī
Kan-na 4 khóaⁿ liāu-lí, bē-hiáu koat-tēng ê lâng mā bô-thang siūⁿ kui-po͘ (Chán!).
Lâm-iûⁿ-chhá-mī kiâm-tiⁿ-kiâm-tiⁿ chu-bī chin hó, ū ha̍h Táⁿ-káu-lâng kháu-bī. Ka-lí-pn̄g liāu chē koh phang, chiok sòa-chhùi.