用小川尚義『臺日大辭典』漢字寫蔡培火『十項管見』

實驗而已Si̍t-giām nā-niā罔戲bóng sńg不知有着無M̄-chai ū tio̍h bô各家戲看覔Ta̍k-ke sńg khòaⁿ-bāi

頭序

在這臺灣島內、學問是廢𪵪真久喇。自真正久的以前、學問是干乾幾個讀冊人在識、以外大部份的人、就是做生理的、作穡的、也是做工的、一切與學問是差不多攏無關係。更再彼的讀冊人所讀所識的、攏是幾百年前也是幾千年前的人所研究的舊糟粕、較多是攏沒可合時勢。從中卻亦是有彼號不時都是真、到何落都是會合用的好學問、總是俾彼的讀冊人搜盤了已經老老無鋩角。

第一項
我所看的臺灣
美啊。好啊。咱臺灣
嗬啊。臺灣、西洋人讚美你美、稱呼你叫做美麗島(Formosa)、你實在足額會堪得。尚久你老實是真快樂的所在、到額會得俾人愛惜放沒離。嗬啊。臺灣、更再你敢不是阮的搖籃地、俾阮的身高骨肉肥大的鄉里麼。阮的心實在一刻久都難得對你來離開。

1 Likes