頂擺轉名間，有聽著一寡較特殊个台語講法，
有个是別所在較少咧講个，有个連教育部詞典攏無收。
下爿寫个，無一定遐个人攏按呢講，但是攏是我有聽著个。
名間這个地名，在地人講湳仔(lám-á)，塗跤湳湳个意思，
省講sénn，兩，有聽過nōo，言念gân，啥人講tsiâ，
真濟別个腔念个iong、iok字，佇遮念iang、iak，像約就念iak，
念iang佮iak韻母个字，是照韻書个。
嘛有袂少om、op韻母，
像tsa̍p-tsa̍p-叫 講tso̍p-tso̍p-叫、
欱(hap)講hop、
籠仔(lam-á)講lom-á、
𨂾(làm)講lòm等等。
南投大部分漢人是幾百年前對漳州移民來个，
頂懸遐个大部分攏是漳州腔个特色。
因為名間是我認同个故鄉(hiang)，
我學台語時，會刁工學遮个腔。
遮个可能較罕得聽著个講法，佇遮佮逐家分享(hiáng)。
Kám sī Làm-á?
henn，我寫毋著啊XD
華語个「蚯蚓、蝌蚪、蝙蝠、壁虎、胳肢窩」佇台語內底有誠濟款个講法，
所以我只斗特別去問遮个詞佇阮兜按怎講。
「蚯蚓」是「杜蚓」tōo-kún，阮阿公講个時無講「仔」。
「蝌蚪」是「肚胿仔」tōo-kuai-á。
「壁虎」是「蟮尪仔」sîn-âng-á。
「胳肢窩」是「胳胴跤」kueh-lang-kha。
前三項攏佮教育部辭典寫个「台中偏漳腔」無仝。
阮阿公閣共我講，是按怎「壁虎」叫sîn-âng-á，是因為鄭國姓（tēnn-kok-sìng）咧拍台灣个時，半暝荷蘭人卜共伊拍，是sîn-âng-á大聲叫共伊警告个，後來因為只種動物看起來成「神」个「尪仔」，所以叫亻因「神尪仔」。毋過，佮鄭成功有關个詞源傳說，我攏無啥相信。
「蝙蝠」，我問阮阿公台語講法，伊講是「蝙蝠」pián-hok，我閣問是毋是閣號做夜婆，伊講夜婆號做密婆，蝙蝠佮密婆無仝，毋過是佗位無仝，許陣我無繼續問。
隔日拄著厝邊講著只項代誌，伊講：「台語講个蝙蝠應該是講一款蝶仔，足大！比手較大！」「是毋是『鳳蝶』？」「有可能。」伊閣講著「蝙蝠（華語）」个台語講法，對話過程中，「夜婆」、「密婆」、「日婆」三種講法攏有講著，毋過我感覺在地人上捷講个是密婆，日婆排第二。
閣來，有一寡別位个台語詞是阮阿公聽無个。阮阿公捌離鄉讀冊，工作經驗閣濟，眼界真闊，伊若無聽過，應該佇伊个生活環境內，遮个講法真少出現。
我講蟲豸（thâng-thuā）佮娘仔觳仔(niû-á-khok-á)，伊聽無。對後者，了解意思後，伊講遮个人攏講娘仔包（niû-á-pau）。
嫁唸文言音kà，意思是「共啥乜物件當做嫁妝」。
pháng，意思是「共田塗掘予鬆」。
chhiang-á，是一款農具，是一枝用來插塗予鬆、撬石頭个鐵枝。
我本來想即个詞佮chhiam意思有合，是毋是應該唸chhiam？
但是當地人講个應該是「chhiang」，尤其是佇後壁佮「仔」連音个時陣。
手紗，紗唸文音sa亦是白音se攏有咧講，是工地手套个意思。
即四个講法佇佗一本詞典攏揣袂著。
露唸lò͘，佮別位講lō͘ 無仝。
閣有一寡非常罕見个白話音：
中白話音teng，假若是只要是口語內个「中」，攏會使唸即个白話音。
共kēng，佇「共產黨」即个詞有按呢唸。
隆lêng，佇「乾隆」即个詞有聽著。
茸jêng，佇「鹿茸」即个詞按呢唸。
毋知有人嘛有聽過遮个講法，亦是家己、家己厝內就是按呢講个無？