【瞈望奇蹟】

昨昏虎豹潭个意外是真無奈、朋友問我這有咁有塊按算、我誠實不知影。
拜六早起時天氣都世界好、乎人只个熱天上尾一工宿困日个感覺;雨無相借問着潑落來、嗎不知因當時決定卜翻頭上扞。我原底嗎是卜去溪仔邊、閣按算過冥、不閣氣象報氣溫降10度着準抵煞啊。
都是按呢个精差但定、阮無欠只擺出門𨑨迌、落雨天个野外外艱苦我知知、我着誠在意續落來个歹天。不閣對真多家庭來講、拜六禮拜是外哖仔寶貴、野外活動个時間是靴哖啊難得。
治只个囝仔無後山通走、無庄頭溪仔田邊圳溝通耍、無海埔通掠毛蟹个時代、咱野外个活動朗是塊生份个所在探險。汝若有閒𤆬囝仔去野外、若有甲意个所在、着卡 chia̍p 去咧、乎伊變做恁兜个後山、恁庄仔邊个溪溝、海墘。乎只卦所在做恁上熟事个後園、按呢若有省乜變化、嗎卡會凍感受卡會赴反應。
另外、裝備愛攢無一定愛用、共裝備甲野外活動箍做伙、干礁會變做專門个人即會當𤆬/耍野外活動、這甲親近大自然咁會愈行愈倚?

2 Likes