開放性關係敢是進步價值?

Children Roast Polyamorous Woman youtu.be/Pr_0Gi780tc

開放性關係毋是進步價值,彼干焦是起𪁎發嬈爾爾。家己發嬈人袂當講,無著是嬈婊侮辱ê理路有影真奇怪。在我看這干焦是欲正當化家己無站節ê概念。

而且像影片按呢佮5歲ê囝仔講這款話題實在是無適合。進步價值咧時行,一寡奇怪ê概念mā咧時行。我提醒家己著愛斟酌聽,毋好落尾失去判斷,成做無道德ê人。

5 Likes

先講,影片無看了。

來討論一下仔「道德」,
我想逐个人有無仝的看法。

就我來講,
若無去傷害著別人,
有何不可?

是按怎倆个人行鬥陣,
就一定愛綁牢牢?
佮仝一个對象約會?
對仝一个對象起𪁎?

佇開放式關係內面的當事人,
佮意欲佮 siáng 創啥,
人對象 óo-khe 就好。

按呢做,
並無傷害著任何人,
我袂感覺有任何無道德。

8 Likes

本來就無道德問題。

開放式關係有隻ê必要ê大前提:信任,koh有互相尊重。

遮tsah是真正ê開放式關係。

欺騙、偷食, 奚tsah是有道德問題。

7 Likes

Kám-siā nn̄g ūi pêng-iú kah góa chò-hóe thó-lūn.

Hó, án-ne khó-lêng góa khah pó-siú phí-sio̍k. Kò-jîn chū-iû tong-jiân sī sûi-chāi in.

M̄-koh lán chioh chit ê ki-hōe lâi thó-lūn chı̍t-kóa būn-tê:

Hó-pí kóng cha-bó͘-lâng ū-sin cha-po͘-lâng cháu--khì, a̍h-sī gín-á tī khai-hòng-sèng koan-hē chi-tiong tōa-hàn kám bē chiâⁿ-chòe siā-hōe būn-tê?

Khai-hòng-sèng koan-hē kám sek-ha̍p hō͘ gín-á chai-iáⁿ? Tang-sî khah thò-tòng?

Chòe-āu, lí nā-sī ū gín-á lí kám ē kā i kóng che mā sī chı̍t chióng soán-te̍k?

M̄-nā ē, jî-chhiáⁿ ài siông-sè kóng, thiah ho͘ bêng, bô to̍h-ē chhiūⁿ @CteaX55 kóng ·ê, kā khi-phiàn, thau-chia̍h tòng-chò khai-hòng-sek koan-hē.

Kî-si̍t góa kám-kak khai-hòng-sek koan-hē lūn-chin ài ûi-chhî kài khùn-lân. Kò͘ chi̍t ê lâng ê kám-siū to̍h bô kán-tan ·ah, góa ka-tī sī bē koh giâ-kê, m̄-koh góa chun-tiōng siūⁿ-beh án-ne seng-oa̍h ê lâng.

Só͘-tì, kēng-ka èng-kai hō͘ gín-á chai-iáⁿ, keng-êng khai-hòng-sek koan-hē ài hù-chhut ê khùi-la̍t. Kî-si̍t m̄-nā khai-hòng-sek, thoân-thóng nn̄g lâng ê koan-hē mā-sī án-ne, chí-iàu ū khan-liân pa̍t-lâng, to̍h su-iàu chhú-lí lâng chi-kan ê būn-tê. M̄-koán tó chi̍t chióng koan-hē, tùi koan-hē hū-chek-jīm, chīn-liōng mài hō͘ lâng thòng-khó͘, lóng sī pit-iàu ê. Khai-hòng-sek koan-hē kan-na sī tùi "hù-chek-jīm" ê tēng-gī m̄-sī sèng hong-bīn ê tiong-cheng niā-niā, koan-hē lāi ê lâng ê kám-siū iáu-sī ài kò͘, bô sī bô-khó-lêng kú-tn̂g ê.

Nā-sī chi̍t ê lâng ē-tàng chhī kiáⁿ, che to̍h m̄-sī būn-tê. "Cha-po͘-lâng cháu ·khì" to̍h-sī khi-phiàn. In-ūi góa nā koat-tēng seⁿ kiáⁿ koh siūⁿ-beh ûi-chhî khai-hòng-sek koan-hē, góa to̍h-sī phah-sǹg ka-tī chhī kiáⁿ. Án-ne to̍h bē kóng "cháu ·khì", to̍h-sī "hām phōaⁿ hun-khui", in-ūi pún-lâi to̍h bô iau-kiû i tio̍h tàu chhī-kiáⁿ.

Koh ū chi̍t chióng chōng-hóng: ûi-chhî koan-hē chò-hóe chhī kiáⁿ, m̄-koh hō͘-siong bô iau-kiû tùi-hong tī sèng hong-bīn tio̍h tiong-cheng. Án-ne "cháu ·khì" mā sī khi-phiàn (kóng hó bô beh koán lí kah siáⁿ khùn, m̄-koh ài chò-hóe chhī-kiáⁿ), hām khai-hòng-sek bô-tī-tāi.

1 Likes

To-siā hun-hióng.

Góa tông-ì só͘-iú ê koan-hē lóng su-iàu hù-chhut sim-le̍k lâi keng-êng. Gín-á chhut-sì bô it-tēng ū kè-ōe, khó-lêng sī ì-gōa ū gín-á. Góa chiah ē ū chı̍t-kóa gî-būn.

Koh ū, chı̍t ê gín-á tōa-hàn, siāng hó sī ū kò͘-tēng ê chiàu-kò͘-chiá, tùi i ê jîn-keh ióng-sêng khah-hó. M̄-koh phōaⁿ-lū lâi-lâi-khì-khì kám sī hó-tāi?

Chòe-āu, nā lí ê kiáⁿ koat-tēng beh kah lâng ū khai-hòng-sèng koan-hē, lí kám chàn-sêng?

1 Likes

Góa sī kám-kak nā ì-gōa chhut-sì ê gín-á, m̄-koán tī tó chi̍t chióng koan-hē lóng bē hó-sè...

Nā chi̍t ê lâng chhī, to̍h hām it-poaⁿ ko͘-chhin ka-têng kāng-khoán. Kám kóng in lóng bē koh chhōe sin ê phōaⁿ? Sin ê phōaⁿ èng-kai mā bô sǹg sī chú-iàu chiàu-kò͘-chiá. Án-ne kî-si̍t sī siang-chhin/ko͘-chhin ê būn-tê. Nā kóng che, góa se̍k-sāi tī ko͘-chhin ka-têng tōa-hàn ê lâng, hām siang-chhin ka-têng kāng-khoán, ū kòe-liáu chin hó ê, mā-ū chiâⁿ thòng-khó͘ ê. Khó-lêng iáu-sī khòaⁿ lâng teh kòe.

M̄-koh, nā ì-gōa lī-iân, che tōa-bīn m̄-sī hó-tāi (ia̍h-sī su-iàu sî-kan tiâu-chéng). Nā-sī khí-thâu to̍h koat-tēng ka-tī chhī, he chōng-hóng to̍h bô-kâng. Góa siūⁿ bô siang-chhin/ko͘-chhin tùi gín-á pún-chit-tek ê éng-hióng (chhin-chhiūⁿ "ē hông kî-sī" to̍h m̄-sī pún-chit-tek). Chit-ê būn-tê oh tap, in-ūi éng-hióng ê in-sò͘ siuⁿ-chē, m̄-sī kan-na siang-chhin/ko͘-chhin.

Góa kî-si̍t bô jīn-ûi góa ū koân-lī chàn-sêng ia̍h-sī hoán-tùi i ê soán-te̍k lah. Nā-sī ū hó-hó-á kā i kà, hō͘ i liáu-kái ài chù-ì ê tāi-chì, i iáu-sī beh "giâ-kê" (chāi góa khòaⁿ ·khí ·lâi), i ka-tī hū-chek to̍h-hó, m̄-bián góa chàn-sêng. Kî-si̍t hām lâng tàu-tīn pún-chiâⁿ to̍h ke-kiám sī giâ-kê, khòaⁿ lí tit-tio̍h ê hó-chhù (cheng-sîn-tek ê, bah-thé-tek ê, bu̍t-chit-tek ê lóng sī) kám ē-hô niā-niā. Góa kan-na hi-bāng i chò tùi ka-tī "ē-hô" ê soán-te̍k, mài khì siong-hāi pa̍t-lâng, án-ne to̍h hó. I sī thàu-kòe tó chi̍t chióng seng-oa̍h hong-sek lâi ta̍t-sêng, hām góa bô-tī-tāi.

3 Likes

To-siā hôe-tap.

Ē khui chit-ê ōe-tê chú-iàu sī góa hoán-tùi khai-hòng-sèng ê koan-hē, jî-chhiáⁿ góa ka-kī hi-bāng í-āu kiat-hun seⁿ-kiáⁿ, chóng-sī ē tú-tio̍h ài kà gín-á tāi-chì ê sî-chūn, mā hòⁿ-kî pa̍t-lâng ē án-chóaⁿ siūⁿ.

Kóng chàn-sêng a̍h-sī hoán-tùi sı̍t-chè siōng mā bô hoat-tō͘ chó͘-chí gín-á ê soán-te̍k.

1 Likes

Tńg-lâi khòaⁿ lí ê phiau-tê, “khai-hòng-sek koan-hē kám-sī chìn-pō͘ kè-ta̍t?” Góa jīn-ûi m̄-sī, m̄-koh chun-tiōng ta̍k-lâng ê soán-te̍k, góa kám-kak chiâⁿ chìn-pō͘. Le̍k-sú siōng chē-chē pek-hāi lóng sī bô chun-tiōng pō͘-hūn lâng ê soán-te̍k. Ka-tī hoán-tùi, bô kah-ì sī bô-iàu-kín, hām lí ê phōaⁿ ū kiōng-sek, mā chun-tiōng pa̍t-lâng to̍h hó.

M̄-koh góa tú khòaⁿ liáu iáⁿ-phìⁿ, hoat-hiān chia ū chi̍t-kóa gō͘-hōe:
Iáⁿ-phìⁿ kî-si̍t sī kóng polyamory, sī chē-lâng koan-hē, m̄-sī khai-hòng-sek koan-hē (open relationship). (M̄-koh lán chia bo̍k-chêng ê thó-lūn èng-kai iáu-sī ha̍p-ēng.)

  • Chē-lâng koan-hē, sī kóng "kho͘-á" tī 2 lâng í-siōng.
  • Khai-hòng-sek koan-hē, sī "kho͘-á" lāi ê lâng bô iau-kiû sêng-oân tio̍h choân-bīn tiong-cheng. Khah "sang" ê koan-hē.

Chit 2 hāng sī thó-lūn kám-chêng koan-hē ê bô-kāng hong-bīn.

Kî-si̍t nā koh chhim-siūⁿ khai-hòng-sek koan-hē, góa hām goán phōaⁿ tàu-tīn, soah iû-goân ē hām pêng-iú tan-to̍k kìⁿ-bīn, lim-chiú, ia̍h-sī pâng-keng chioh lâng keh-mê hioh-khùn, goán phōaⁿ lóng chai mā bē koán. Che tī 100 tang chêng (sīm-chì kin-á-ji̍t chi̍t-kóa lâng gán-lāi) hoān-sè mā "kài khai-hòng, bô kàu tiong-cheng". Kài-sòaⁿ lóng sī sûi lâng teh siat teh sóa ·ê. (Tong-jiân chit-má kóng "khai-hòng-sek koan-hē" tōa-bīn sī ēng sèng-hêng-ûi chò kài-sòaⁿ.)

Lēng-gōa góa mā ū khì khòaⁿ goân iáⁿ-phìⁿ, nn̄g pêng kóng ê ōe lóng chin hàm. Sè-chiat to̍h seng mài kóng, bô, tio̍h siá kài tn̂g. Kán-tan kóng hêng-sek to̍h būn-tê chē-chē ·ah: hui thoân-thóng koan-hē tī taⁿ khah chió lâng liáu-kái, tiāⁿ-tiāⁿ ū phian-kiàn, kái-soeh hō͘ gín-á chai chin hó, m̄-koh kám tio̍h bú kah án-ne nn̄g pêng tùi-li̍p ê khoán? Bē-su teh mn̄g “lí chi-chhî kāng-sèng-loân ia̍h-sī ī-sèng-loân”. Soán tó chi̍t-ê kám ū iàu-kín? Án-chóaⁿ tùi-thāi kah lí soán bô-kāng pêng ê lâng chiah tiōng-iàu, mā-sī chiah èng-kai hām gín-á thó-lūn ·ê. Góa kám-kak che khí-thâu to̍h siūⁿ-beh "tùi-khòng" ê thāi-tō͘ tùi kiám-chió siā-hōe ê phian-kiàn bô siáⁿ-mih pang-chān.

2 Likes

社會問題是出置家長無教,抑是教無好,佮開放式關係無甚直接ê關係。

即馬社會面頂未少出問題ê儂,in ê 家庭mā是一般家庭(所謂真㩼儂認為ê「正常家庭」)。

以我身軀邊ê經驗來講,未少諸母儂因為無注意結果有身,就感覺「囝仔愛有隻ê爸爸」,所以就結婚,結果遮結落去就害ah,因為諸父hit旁是隻ê漚tah ê儂,譬如講:無責任、拍bóo、拍小孩、豪簙梟、酒狂。按ne對囝仔敢有好?

歧視是隻ê社會、教育問題,所以tsah會真複雜,mâ無好處理、解決。真需要時間佮教育,甚至政府介入。

毋是+1。開放式關係無甚物「進步」抑是「無進步」ê問題。就像我較早講的:尊重、誠實佮信任,遮tsah是開放式關係ê本質。

1 Likes

góa kám-kak ì-gōa chhut-sì ê gín-á ū hun 2chióng,1chióng sī lí bô ài i lâi i soah lâi á,tē 2chióng sī lí bô àn-sǹg i ē chia chá lâi.
Khah-su sī tē1chióng chōng-hóng,án-ne góa to̍h ū tông-ì lí só͘ kóng ê,m̄-koh ná sī tē 2chióng he to̍h bô-kâng á

góa jīn-ûi tan-chhin hām siang-chhin,tùi gín-á lâi kóng sī chiaⁿ iàu-kín ê,in-ūi í lâng lâi kóng,cha-bó͘-lâng hām cha-po͘-lâng sī hui-siông bô-kâng ē 2chióng tōng-bu̍t,só͘-pái hāu-seⁿ ài tòe lāu-pē o̍h án-chóaⁿ chò chi̍t-ê cha-po͘-lâng,cha-á-kiáⁿ ài tòe lāu-bú o̍h án-chóaⁿ chò chi̍t-ê cha-bó͘-?Aalâng,tông-sî, gín-á mā ē tùi sī-tōa-lâng ê koan-hē tang-tiong,khì ha̍k-si̍p ài án-chóaⁿ keng-êng chi̍t-tōaⁿ koan-hē.

1 Likes

Nā siuⁿ chá lâi, chîⁿ iáu-bōe khiām kàu-gia̍h, sim-thài iáu-bōe tiâu-chéng hó-sè, kāng-khoán sī pi-kio̍k.

Tong-jiân ū chha-pia̍t, ài chù-ì ê tāi-chì mā bô kâng. M̄-koh m̄-sī ko͘-chhin it-tēng bái, siang-chhin to̍h choa̍t-tùi hó. Ū chiok chē gōa-chài in-sò͘. Nā-kóng án-chóaⁿ chò cha-po͘ ia̍h-sī cha-bó͘, che sī tì-sek kám ū kàu ê būn-tê, m̄-sī tiāⁿ-tio̍h ài tó-chi̍t-ê sèng-pia̍t chiah kà ē hó-sè.