無論恁卜信也不、台語絕對有未来。此卜改說乎透、會凍寫做一本册。我簡單交代着好。(交代 = 交帶 = kau-tài)
講台語个族群有到大、不是小族群、卜「絕種」、强卜通講無可能。恁講「强卜」娘、不是「絕對」。好、按呢我閣共恁講、振二十一世紀、有科技来助陣、講台語个族群又閣有到大、台語絕對有未来。
台語絕對有未来、咱搭有通共伊復興。無論恁卜相信我个理論也不、恁那卜映望台語會閣復興、恁着愛相信台語絕對有未来、勿閣講「喜句話」甲「喜欵失志个話」啊、我塊講省、恁知知塊。那無、恁治靴打拼、朗是塊無彩工。
台語生成着成普及、甲振嗎閣成普及、永擺仔啊閣卡普及。台語愛復興、不免推廣。不通閣講「推廣台語」。本成無普及个物件不搭塊推廣。台語生成是普及个、振嗎啊閣成普及、咱卜共伊復興搭是頭路。台文不搭着推廣。
復興台語。推廣台文。
理路着、目標有明、搭来打拼。
講着台文、現主時、無論台灣漢字、也是白話字、朗夭無法度通得着共識。
台灣目前基本的来講是漢字社會無不着、台灣漢字照講會凍得着共識。不龜、台灣漢字生成夭有介多技術性个問題愛解決、成多語詞夭無才調通用台灣漢字来寫、也是講有才調通寫、不龜夭無相對固定个寫法。(親像「Iăn-jín」勉強通寫做「沿仁」、總是只个寫法、相對来講、夭無固定、目前干焦八治一本册 khoàiⁿ 只欵寫法、喜本册着是「囝仔王子」、3/1 金石堂、誠品、… 各大册局着有塊賣啊、拜托咱逐个去共買一本。)那卜用台灣漢字来得着共識、着愛解決技術性个問題。
白話字基本的来講、以經解決所有个技術性問題。不龜、唯一个問題、着出治台灣目前基本的来講是漢字社會、白話字無到普及。那卜用白話字来得着共識、着愛共台灣改造做白話字社會。
「共台灣改造做白話字社會。」、「解決台灣漢字技術性个問題。」、只二條路 toeh 一條行會通、咱不知、朗共拼看邁。
治夭無共識進前、變通个方法、着是羅漢濫做伙寫、利用羅馬字暫時解決台灣漢字技術性問題、利用台灣漢字暫時改善白話字無到普及个問題。羅漢濫做伙寫、彼是變通娘、無代表會解決問題。伊是解決台灣漢字技術性問題無不着、不龜無解決白話字無到普及个問題、羅漢濫塊寫、白話字个額那略仔卡高(30%着有到啊)、治現主時个社會着「破局」啊。
台文啊未有「結論」、無論台灣漢字、也是白話字、二條路朗拼上實在、上無有二種可能个結論。干礁拼一條路、塊孤著、着干礁一種可能个結論。那行未通、着努戌啊。二平塊著上安全。
囝仔王子羅漢朗拼、有全白話字板、嗎有全漢字板。按呢着是上實在个實踐。
我塊講个漢字、是台灣漢字、不是台閩字。台閩字不是頭路。台閩字个代表是「中華民國教育部推薦字」、不龜不那「中華民國教育部推薦字」是台閩字娘、咱不是卜反中華民國搭來反台閩字、咱是卜反一切無台灣基礎个字、宅來寫台語(台灣自來朗有親中智識分子、含日本時代刀朗有、有个台閩字是因先歹子𤆬頭个、不龜靴个字咱也是愛共判做無台灣基礎、因根底上来講、是卜借中文个字理来寫台語、無台灣基礎。)