來紹介讀冊機

最近買足濟電子尪仔冊,想欲來紹介我看冊个機器。

電子冊有分平台,我攏是踮 Readmoo 買个,Readmoo 最近个尪仔冊愈來愈濟,前一站仔是線頂冊展,攏總三本 75 折,最近是東立三本 79 折閣會當敆其他个優惠券(到明仔載!),就買閣較濟,有進前看過無買个,嘛有無看過个。其中《咒術迴戰》我有佇線頂看過一點仔,毋過看甲誠慢,彼陣看到交流戰篇,一直相拍个部份感覺較無聊,但是這擺用讀冊機重看,一睏頭隨予我看超過。

我用个讀冊機是 Readmoo 出个 mooink Pro,專工看 Readmoo 買个冊,螢幕 10.3 寸,敆手寫个功能。畫面比一般日本尪仔冊个一頁閣較大,若是兩頁一面來看迒頁就會較細。雖然講畫面放大,嘛袂講袂明,因為日本尪仔冊个單行本本來就比週刊較細,原稿可能閣較大張?一面一面看比無法度看規面个電腦螢幕加較輕鬆,上重要个是會當看迒頁。電腦若欲用大螢幕看,就愛坐佇桌仔前,若欲倒眠床用簿仔型電腦看,毋但較細,嘛較重,讀冊機一台輕輕,mooink Pro 才 240 公克,閣無成電腦遐呢燒,𢯾佇咧身軀若烘爐,熱天个時真正擋袂牢。


原本看《咒術迴戰》感覺看無啥看有个相拍場面,按呢看加外清楚,順順仔看超過原本个進度。可能是第二擺看抑是真正因為畫面較大,一寡進前無注意个細節嘛看著矣。其他親像《大正處女奇譚(大正処女御伽話)》這種我進前就看了个冊,嘛是歡歡喜喜閣看一擺。

唯一較麻煩个是,雖然會當一揤就變雙頁來看迒頁,因為雙頁是共讀冊機提橫个咧看,欲變轉來單頁个時,袂自動變直个,愛加揤一下,若一直提橫个來看,就會比一般个尪仔冊閣較細,失去了伊个優點。

6 Likes

Lí chit tâi kám ē tha̍k hō͘ lí thiaⁿ? Nā bōe , góa kám-kak eng-kai kóng "khoàⁿ-chheh-ki" khah ū lí.

我是袂慣勢用聽个,所以無共研究。

會寫「讀冊」毋是寫「看冊」是家己感覺唸起來較順,平常時咱咧講「讀冊」嘛無一定是會唸出來。

1 Likes