家族背景
彭明敏因祖公祖(阿公个阿公)喜緣慰福建泉州来到台灣、定居tī土庫[3]。祖公祖彭慶、tī清嘉慶年間來台灣、有一子一女、子名號做彭根、查某子名號做彭受。彭根(1835-1884) tī 1867年開始塊參與教會活動、而且tī 1871年經過李庥牧師个同意、擔任阿猴教會頭一任个傳道師。彭明敏是彭家徙來台灣个第五代。彭明敏回想着因祖公祖食老个順、足愛加治草擬家譜、當做那塊娛樂、做義讓。m̄-koh彭明敏無興趣走chhōe海峽對岸、唐山喜平ê祖緣、Kan-taⁿ知影老父喜平个祖先是搥福建来个。台灣姓彭个差不多朗全客人卡多、m̄-koh因家族m̄是客人。[4]:11 1865年、台灣基督長老教會開始tī台灣来傳教、相傳彭明敏因祖公祖是早期領受洗禮信基督教ê人。[4]:13
彭明敏因阿公彭吉生(1861-1945)、字士藏、少年ê時綴tī巴克禮牧師个身軀邊塊做廚子、[4]:13尾仔mā成做傳教師。成做台灣人基督敎kho͘-á內成虔誠ê領導人、治基督敎kho͘-á內嗎眞有人氣。m̄-koh kah-ná無正式受封做牧師。[4]:13 1895年、日本統治台灣ê時、彭吉生以經teh為長老教會服務。民政長官後藤新平tī台灣設立台灣總督府醫學校、彭吉生泉仔鼓勵因第三个kiáⁿ彭清靠去台北讀醫學校。[4]:16-17
彭清靠塊讀醫學校个順、tī淡水kah台北熟事未少長老會教會ê教友、包括彭明敏因老母陳金英。根據彭明敏tī自傳所記載个、因老母陳金英喜馬是淡水加那搭教會女子學校ê學生、家族仔定居tī八堵、自馬偕醫生來台設立淡水教會了後、
着成做基督徒。陳金英ê父母是塊做米酒生理个、因有塊kek米酒賣人。[4]:17陳金英ê兄弟陳溪圳是長老教會个牧師、bat塊做馬偕病院个董事長kah台灣北部長老教會大會議長、陳金英因小妹陳金枝嫁hō͘醫生郭天恩、長女to̍h是郭婉容。[5]:333
彭清靠出業了後、tī台北馬偕病院實習二冬、嗎tī只拵来結婚。[4]:18尾仔有治台中大甲開診所、行醫18年、不那做醫生定定、伊閣有袂少田、那喜冬拵个計量單位落去共折、大概仔有40甲以上ê田甲。[4]:18-19
大正十二年（1923年）八月十五、彭明敏出世tī大甲、伊有三个阿兄kah一个阿姊、伊是因兜上細漢个囝仔。
求學時期
彭明敏五歲ê時、因老父bat 𤆬伊去中國。治伊个記池內底、上海是成寒个所在、閣有南京中山陵ê坎á、喜拵仔是彭清靠ê朋友黃朝琴chhōa in塊遊覽南京。[4]:20彭明敏ê兄姊到卜就學讀册个年歲、彭清靠tī台北米國領事館喜搭仔租一間日本式个厝、老母kah gín-á tòa做伙、彭清靠治台中塊開診所、盡量空課有閑个順、着上北含因團圓。[4]:20彭明敏幼稚園讀一冬了、着去考條小學、tī昭和四年（1929年）入去建成小學、含因兄姊做伙讀冊。嗎有bat轉學轉去大甲ê日本人小學、彭明敏相信講伊加治是200个學生內底唯一ê台灣gín-á。二年後、彭清靠決定卜共診所收起來、去日本內地進修。[4]:22彭明敏轉去北蒲小學。彭明敏人tī日本喜拵、以經是標準ê野球迷、Babe Ruth 塊訪問日本ê時、彭明敏bat寫phoe hō͘伊。閣有得tio̍h一張親筆簽名、留做記念来珍藏。[4]:23
昭和十年（1935年）、彭明敏綴因老父tńg來到台灣、因老父tī高雄開病院、彭明敏許拵仔十二歲、轉入去當地个日本人小學、是五年á个學生。伊無甲意寫毛筆字kah畫圖个課、對野球眞熱、伊治球隊是做二壘手。彭明敏回想:「我不是成好ê打擊者、不久我是成好ê二壘手」、伊代表學校野球隊去比賽、得tio̍h全市冠軍。[4]:23
昭和十一年（1936年）、彭明敏讀高雄中學ê時、有四分之一ê同學是台灣人。[4]:24治彭明敏个記池冬中、伊入去中學無gōa久、校長隨着換做紀律嚴格出名ê典型極端愛國主義者（斯當時校長是本田喜八）。昭和十二年（1937年）盧溝橋事件爆發了後、狂熱ê校長kah軍訓教官直直共學生仔灌輸中國人軟chiáⁿ 閣落伍、日本人英明閣勇敢、日本為着中國按呢所做ê自我犧牲種種。學校ê教師mā一个仔一个上前線、學生參加提燈遊行、慶祝皇軍tī中國得着真chē勝利。獨獨因老父iáu廣泛（hoat）閱讀包括中國 ê戰事。hín中學是五年制、第四年讀了、學生有權通參加高等學校入學考試、m̄-koh着愛校長允凖。不離個校長拒絕彭明敏ê申請、彭清靠共伊提醒講學生有權通án-ne做、校長煞要求彭明敏辦退學、為tio̍h án-ne、彭明敏泉仔来辦退學。[4]:24-26
彭明敏先到東京、tòa tī阿姊彭淑媛靴、許拵彭淑媛以經醫校出業、嫁hō͘一个台灣个seng-lí人。彭明敏去仙台參加第二高等學校入學考試煞考無條。最後tī昭和十四年（1939年）轉去接受伊轉入去ê兵庫縣ê關西學院就讀、出業後、彭明敏tī昭和十五年（1940年）去考條慶應大學經濟科kah第三高等學校預科。最後彭明敏選擇卜讀卡自由風氣ê第三高等學校、tòa tī京都ê銀閣寺附近。[4]:28-29彭明敏採取「三高密集學習(略稱:「三高」)」个策略、綿爛治塊研究探討歷史、文學kah哲學、閣去學第二外文法文、逐禮拜四點鐘文法、五點鐘閱讀kah三點鐘會話。[4]:30許拵仔伊對法國ê自由思想成熱心、閣有按算卜專攻法國文學、彭明敏極欣賞Anatole France kah Jules Lemaître 、政治思想嗎受着Renan ê作品个影響。彭明敏治「三高」ê時期着對軍訓kah做兵真厭善、最後个一年kui氣泉仔不愛去報到參加長期野外操演、為tio̍h án-ne致使校方有塊討論咁卜hō͘出業、最後伊ê主任教授替伊辯護有成、hō͘伊ē-tàng来出業。[4]:32喜馬彭明敏kah一位京都帝國大學經濟科ê學生寄宿tī仝一間厝个、十二月有一工、chit位學生tùi樓頂崇落來、大聲塊喝講:「東條只篐唁頭！伊塔會去做只欵tāi-chì。去…去了了啊…」着治只拵定定、伊隻聽tio̍h廣播塊講日本攻擊珍珠港得tio̍h大勝利。Tùi hit工起、校內充滿絕望个氣分、含校外街仔路頂ê提燈遊行kah慶祝活動相比並、袂輸二个世界。[4]:32
日本靜對米國宣戰了後、頭个順、氣勢袂呆、M̄-koh tī昭和十七年（1942年）米軍空襲東京了後勢面呆去、各戰場个戰況朗無樂觀、日本政府泉仔決定全國總動員。政府宣布、高等學校理科照常上課、文科課程着縮短六鼓月。彭明敏tio̍h愛 tī 1942年熱人考條大學、啊那無、着愛去做兵。[4]:34彭明敏雖然對法國文學成熱情、m̄-koh父母苦勸伊為tio̍h前途、應當着去學醫術。法國文學無論tī日本á是台灣lóng無法度通討趁、路尾彭明敏折衷放棄主修法文、去投考東京帝國大學政治科、後改thang做官僚á是律師、伊个父母最後接受伊ê意願。
戰時甲失去手骨
讀東京帝國大學个順、彭明敏熟事着一个同學、小田滋、tī台灣来大漢、尾仔去做國際法院副院長。東京帝大開學無gōa久、大學文科學生緩役ê制度、雄雄去逢取消。彭明敏身軀邊ê少年人一个仔一个搥校園消失去。因為彭明敏是植民地个學生、那法律来講、伊是m̄免去做兵、m̄-koh嗎有權通做志願兵。東大所公佈「志願服役名單」、彭明敏ê名mā tī內中。[4]:35 伊含長崎ê大兄討論了後、決定不愛去志願服役、卜繼續讀册。彭明敏ê名iáu-koh逢貼tī公告枋、名單內底、干礁春伊無去共人志願入伍。彭明敏嗎塊惊去逢點由做號、連上課lóng m̄敢去。好加再日本ê大學上課是無塊點名ê、m̄-koh東京物質mā大欠、烏市四界滿滿是。[4]:35
1943年~1944年、日軍戰況jú來jú bái、彭明敏離開東京去到松本、因隔腹小弟彭明雄tī 靴塊讀高等學校。六鼓月後、顧慮着戰爭个時機、經濟困難、彭明敏kah因大兄決定一家伙仔卜帶做伙、靜待時局个演變。[4]:36斯當時因大兄是tī長崎ê一个漁村、為石、靴个公立診所塊食頭路。四月、彭明敏去長崎、卜去因大兄所帶个漁村靴尋伊、不離過治路途个冬中、伊所坐ê喜隻船仔去乎米軍轟炸、伊个倒手無抵好去乎炸一下泉仔殘廢去（尾仔kui世人朗鬥假手）。許拵是去hō͘因阿兄ê同學、眼科醫生楊友香發見、赶緊送去長崎醫大附屬病院来治療、是醫生古屋野宏平共伊操刀截肢、美厚出身ê醫生陳新賜負責共thīⁿ伊个空嘴啊閣有續落來手術後个觀察、過程冬中嗎有四位長崎醫大ê台灣留學生寄付O型个血。[6]
彭明敏tī長崎大兄因兜塊療傷喜斬、抵仔去當着米軍bok原子彈。八月初九、伊親目周去看tio̍h米軍治長崎共原子彈bok落去。
彭明敏治《自由ê滋味》有寫着只段(原文是中文):
原子彈磅去了後ê後果、實在oh得描寫。有个彼焢龜李起个建築物看塊iáu好好、 khiā治靴、m̄-koh、內面所有个木料kah其他个易燃物、目一哖仔、朗總化做烏有去。聽講治學校教室內底、tùi整齊排列ê白火灰、通看着死亡个瞬間、坐tī冊桌á邊ê所有个學生。燒甲隻哖雄。大部分醫科个學生lóng總罹難、包括四位bat送血hō͘我ê台灣留學生。In寶貴个性命泉仔按呢来犧牲去、我煞iáu閣活條teh、此真正是悲劇ê運命。