問答・𤆬路・規矩

此是省欵網站？

此是一个公共討論平台（留話枋、英語：FORUM）乎做【食飽未！】。咱主要是愛保持一个有人情味个台語環境。請尊重者个平台規矩甲其他个使用者。

按盞使用只个平台？

汝那八用別欵留話枋、【食飽未！】對汝來講應該足面熟。咱夭是建議逐家新來个朋友先看只鋪文塊解說平台个基本功能等等：平台基本使用說明・指導

我會曉講台語、但是者我朗看無！

來！汝那八講加治會曉講不閣袂曉寫台語、無問題。歡迎觀覽、尋汝興个埕來慢慢仔讀。那卜恰深來了解台文按盞寫、按呢用電腦甲手机仔打字等等、咱有整理各種自學資源乎汝恰利便共台文入手。

關於台語文字

咱無排斥任何（有規矩个）台語文字。各種羅馬字・漢字・片假名云云、朗在汝寫。愛會記得、不是逐个人朗看有所有个台語文字。請逐家乎相鬥相共。仝一篇鋪文嗎會使寫羅字版、漢字版等等。

者咁干焦治塊學台語定？

無！當然、咱誠歡迎逐家來學台語。不閣咱主要是卜保持台語个環境、無限制治塊學台語定。任何題目、只要是合法・合平台規矩、朗會使！

我興〇〇、尋無〇〇个埕！

汝那尋無恰適合个埕、請先直接鋪治夭未分。咱豆豆仔做伙增加恰多埕來使用。想卜討論網站个構造、請治本平台埕來鋪文。

甲別人無仝看法？

有冬時仔會𫔘着甲咱無仝个看法、凡世咱有冬時仔想卜答復、辯論等等。【食飽未！】支持逐个人个言論自由不閣咱那辯論个時、請注意：針對想法做評論會使得、針對人絕對袂使。請避免罵人等等个行爲。

糞掃鋪文按盞處理？

揷旗仔。

咱那𫔘着犯規行爲、像罵人个・糞掃鋪文・也是來作怪作乱个TROLLS、請勿回應、揷旗仔着好。咱那答復、因有理由繼續作乱。旗仔揷了、埕長會收着通知、趕緊來處理。

平台規矩

【食飽未！】通看做一種公共空間。咱个基本原則着是足簡單个「黃金規則」：映望別人按盞對待咱、咱着按呢對待別人。

愛：

  • 尽量寫規矩个台文
  • 保持善良个大度
  • 乎相鬥相共
  • 話題鋪治適合个開講埕
  • 答復愛共人話題有相關、無、着起新个話題
  • 市甲意恰嬴答復孤一字「賛！」
  • 那有出大志、不免回、揷旗仔着好

勿：

  • 罵人・鋪糞掃・作乱云云
  • 猪哥圖・影片（pornography）全面禁止！
  • 反着別人个版權也其他知識產權、包括文字・圖・影片云云
  • 違法行爲

汝个平台

【食飽未！】雖然有管理員甲埕長來整理、**主角着是汝！**汝那看着任何須要進步个所在、請共汝个建議甲想法直接鋪治咱个本平台埕、咱來做伙討論。那是有緊急狀態、請送電批甲管理員个信箱。

服務契約

服務契約夭無翻譯做台語。目前使用英語條款代替。歡迎有志願个網友來翻譯。

By using this service, you agree to abide by our Terms of Service.

Būn-tap, chhōa-lō͘, kui-kí

Che sī siáⁿ khoán bāng-chām?

Che sī chi̍t ê kong-kiōng thó-lūn pêⁿ-tâi (lâu-ōe-pang, FORUM), hō chò 食飽未 Chia̍h pá ·bē. Lán chú-iàu sī ài pó-chhî chi̍t ê ū jîn-chêng bī ê Tâi-gí khoân-kéng. Chhiáⁿ chun-tiōng chia ê pêⁿ-tâi kui-kí kap kî-thaⁿ ê sú-iōng-chiá.

Án-chóaⁿ sú-iōng chit ê pêⁿ-tâi?

Lí nā bat ēng pa̍t khoán lâu-ōe-pang, Chia̍h pá ·bē! tùi lí lâi kóng èng-kai chiok bīn-se̍k. Lán iáu sī kiàn-gī ta̍k-ke sin lâi ê pêng-iú seng khòaⁿ chit pho͘ bûn teh kái-soeh pêⁿ-tâi ê ki-pún kong-lêng téng-téng: Pêⁿ-tâi ki-pún sú-iōng soat-bêng, chí-tō

Góa ē hiáu kóng Tâi-gí, tān-sī chia góa lóng khòaⁿ bô!

Lâi! Lí nā bat kóng ka-tī ē hiáu kóng m̄ koh bē hiáu siá Tâi-gí, bô būn-tê. Hoan-gêng koan-lám, chhōe lí hèng ê tiâⁿ lâi bān bān-á tha̍k. Nā beh khah chhim lâi liáu-kái Tâi-bûn án-ná siá, án-ná ēng tiān-náu kap chhiú-ki-á phah jī t.t., lán ū chéng-lí kok-chióng chū-ha̍k chu-goân hō͘ lí khah lī-piān kā Tâi-bûn ji̍p chhiú.

Koan-î Tâi-gí bûn-jī

Lán bô pâi-thek jīm-hô ū kui-kí ê Tâi-gí bûn-jī. Kok chióng Lô-má-jī, Hàn-jī, Phian-ka-bêng, u.u., lóng chāi lí siá. Ài ē kì tit, m̄ sī ta̍k ê lâng lóng khòaⁿ ū só͘ ū ê Tâi-gí bûn-jī. Chhiáⁿ ta̍k-ke hō͘-siong tàu-saⁿ-kāng. Kāng chi̍t pho͘ bûn mā ē sái siá Lô-jī pán, Hàn-jī pán téng téng.

Chia kám kan-na tī teh o̍h Tâi-gí niâ?

Bô! Tong-jiân, lán chiâⁿ hoan-gêng ta̍k-ke lâi o̍h Tâi-gí. M̄ koh, lán chú-iàu sī beh pó-chhî Tâi-gí ê khoân-kéng, bô hān-chè tī teh o̍h Tâi-gí niâ. Jīm-hô tê-bo̍k, chí-iàu sī ha̍p-hoat, ha̍p pêⁿ-tâi kui-kí, lóng ē sái!

Góa hèng ___, chhōe bô ___ ê tiâⁿ!

Lí nā chhōe bô khah sek-ha̍p ê tiâⁿ, chhiáⁿ seng pho͘ tī Á bē hun. Lán ta̍uh-ta̍uh-á chò-hóe cheng-ka khah chē tiâⁿ lâi sú-iōng. Siūⁿ beh thó-lūn bāng-chām ê kò͘-chō, chhiáⁿ tī Pún pêⁿ-tâi tiâⁿ lâi pho͘ bûn.

Kap pa̍t lâng bô kâng khòaⁿ-hoat?

Ū tang-sî-á ē tú tio̍h kap lán bô kâng ê khòaⁿ-hoat, hoān-sè lán ū tang-sî-á siūⁿ beh tap-ho̍k, piān-lūn, téng-téng. Chia̍h pá ·bē chi-chhî ta̍k ê lâng ê giân-lūn chū-iû, m̄ koh lán nā piān-lūn ê sî, chhiáⁿ chù-ì: chiam-tùi siūⁿ-hoat chò phêng-lūn ē sái ·tit, chiam-tùi lâng choa̍t-tùi bē sái. Chhiáⁿ pī-bián mē lâng téng-téng ê hêng-ûi.

Pùn-sò pho͘ bûn án-chóaⁿ chhú-lí?

Chhah kî-á.

Lán nā tú tio̍h hoān kui hêng-ûi, chhiūⁿ mē lâng ·ê, pùn-sò pho͘ bûn, iā sī lâi chok-koài chok-loān ê TROLLS, chhiáⁿ mài hôe-èng, chhah kî-á tō hó. Lán nā tap-ho̍k, in ū lí-iû kè-sio̍k chok-loān. Kî-á chhah liáu, koán-lí-oân iā sī tiâⁿ-tiúⁿ ē siu tio̍h thong-ti, kóaⁿ kín lâi chhú-lí.

Pêⁿ-tâi kui-kí

Chia̍h pá ·bē! thang khòaⁿ chò chi̍t chióng kong-kiōng khong-kan. Lán ê ki-pún goân-chek tō sī chiok kán-tan ê “n̂g-kim kui-chek”: ǹg-bāng pa̍t-lâng án-ná tùi-thāi lán, lán tō án-ne tùi-thāi pa̍t lâng.

Ài:

  • Chīn-liōng siá kui-kí ê Tâi-bûn
  • Pó-chhî siān-liông thài-tō͘
  • Hō͘-siong chun-tiōng, tàu-saⁿ-kāng
  • Ōe-tê pho͘ tī sek-ha̍p ê khai káng tiâⁿ
  • Tap-ho̍k ài kā lâng ōe-tê ū siong-koan; bô, tō khí sin ê ōe-tê
  • Chhi̍h kah-ì khah iâⁿ tap-ho̍k ko͘ chi̍t jī “chán!”
  • Nā ū chhut tāi-chì, m̄ bián hôe, chhah kî-á tō hó

Mài:

  • Mē lâng, pho͘ pùn-sò, chok-loān, u.u.
  • Ti-ko tô͘, ti-ko iáⁿ-phìⁿ (pornography) choân-bīn kìm-chí!
  • Hoán tio̍h pa̍t lâng ê pán-koân ā kî-thaⁿ tì-sek sán-koân, pau-koat bûn-jī, tô͘, iáⁿ-phìⁿ, u.u.
  • Ûi-hoat hêng-ûi

Lí ê pêⁿ-tâi

Chia̍h-pá ·bē! sui-jiân ū koán-lí-oân kap tiâⁿ-tiúⁿ lâi chéng-lí, chú-kak tō sī lí. Lí nā khòaⁿ tio̍h jīm-hô su-iàu chìn-pō͘ ê só͘-chāi, chhiáⁿ kā lí ê kiàn-gī kap siūⁿ-hoat ti̍t-chiap pho͘ tī lán ê Pún Pêⁿ-tâi tiâⁿ, lán lâi chò-hóe thó-lūn. Nā sī ū kín-kip chōng-thài, chhah kî-á bô kàu, chhiáⁿ sàng tiān-phoe kah koán-lí-oân ê sìn-siuⁿ.

Ho̍k-bū khè-iok

Ho̍k-bū khè-iok iáu bô Tâi-gí hoan-e̍k. Bo̍k-chiân sú-iōng Eng-gí tiâu-khoán tāi-thè. Hoan-gêng ū chì-goān ê bāng-iú lâi hoan.

By using this service, you agree to abide by our Terms of Service.