歡迎、請來坐！食飽未？
觀覽
主葉會使照幾那項安排模式看文：
照埕（恰濶个「分類」）、看新添个、也是恰銃个話題、在汝揀。入站了、系統嗎會注汝夭未讀个鋪文。
安裝 APP
Android 甲 iOS 朗有【食飽未】个專用 APP。汝頭擺入站會看着者个看板：
市落去直接安裝！
看板那看袂着、請照下脚个圖來安裝。
專用詞庫
留話枋有一卦專用語詞、夭閣無固定个台語講法。只條話題有收集恰樵全个詞庫。者有一卦恰重要个平台專用語詞：
話題
一條話題着是一个對話、多人同齊開講个欵。逐條話題會分甲一片埕、閣會注一个標題甲幾那通留話治內。
鋪文
一條話題內底、逐份話号做一鋪文。那人鋪个文甲話題無合、管理員會鬥相共共伊遷甲恰適合个話題叱去。
頭文
一條話題个頭一鋪文。話題个主題甲標仔朗對頭文來決定。
埕
人集會个所在、那親像廟埕个欵。逐條話題个主要分類。一片埕嗎通分恰幼个專題埕、嗎通設定無仝權限。汝那無興其中一片、會使共伊換做靜音模式、變做看袂着。
標仔
話題次要分類。一條話題會使標幾那項、乎使用者恰利便尋有相關話題。
使用者
上介重要个角色、因爲着是汝！觀覽者那無口座嗎看會着公共个埕。那卜參加个人、愛先登記加治个口座即變做使用者。
登記・入站
阮云那建議用社交口座（Google・面册・推妥）來登記・入站。不免記暗号會恰利便、嗎恰安全。那卜用加治電批、設暗号、嗎會使得。登記時、愛添汝个「用者名」甲「名姓」。請注意：
- 「用者名」是別人共汝点名个時拵用个（例：@abeng）
- 「名姓」在汝寫、無一定愛寫加治个本名
- 用者名甲名姓朗公開顯示
註：電批絕對袂公開顯示、請汝不免煩惱。
口座設定
口座設定有幾那項、在汝調整：
成員坎斬
新來个使用者有一卦限制、像鋪文甲答復个速度。恰熟手了後、汝个成員坎斬會豆豆仔升級。
- 新手權限：送私批・揷旗仔・寄附件・編輯鋪文朗袂用得
- 青角（一坎）權限：送私批・揷旗仔・共別人靜音
- 主顧客（二坎）權限：做群組・編輯加治个鋪文；愛差不多二礼拜
- 司父（三坎）權限：共話題換埕・刣兆糞掃鋪文・創標仔・創wiki文；愛差不多三個月
- 頭人（四坎）權限：編輯所有鋪文个內容（系統會留記錄）、共話題關兆・刣兆・pín起去等等；管理員愛加忌設定、只坎袂自動升級
鋪文甲編輯仔
鋪文・答復个時、汝會看着輸入文个所在、号做編輯仔。編輯仔个功能不止仔多、輸入系統号做「markdown」。者有一个自學網站（英語个）。下底說明恰基礎个功能：
-
**粗**→ 粗 -
*斜*→ 斜 -
[尋](google.com)→ 尋 -
{chù-bêng|註明}→ chù-bêng -
# 標題,## 次標題, ... -
`程式語言 <html>`→程式語言 <html> -
[details="点者看恰內容"] ... [/details]→
点者看恰內容
內容治者！
寄圖・檔案、直接拖來編輯仔叱放着會使得。
平台規則
請看只葉：平台問答・規矩。
Hoan-gêng, chhiáⁿ lâi chē! Chia̍h pá ·bē?
- Koan-lám
- An-chong APP
- Choan-iōng sû-khò͘
- Teng kì, ji̍p chām
- Kháu-chō siat-tēng
- Sêng-oân khám-chām
- Pho͘ bûn & phian-chhip-á
Koan-lám
Chú-ia̍h ē sái chiàu kúi-nā hāng an-pâi bô͘-sek khòaⁿ bûn:
Chiàu tiâⁿ (khah khoah ê hun-lūi), khòaⁿ sin thiⁿ ·ê, iā sī khah chhèng ê ōe-tê, chāi lí kéng. Ji̍p chām liáu, hē-thóng mā ē chù lí iáu bē tha̍k ê pho͘ bûn.
An-chong APP
Android kap iOS lóng ū Chia̍h pá ·bē! ê choan-iōng APP. Lí thâu pái ji̍p chām ē khòaⁿ tio̍h chia ê khăng-páng:
Chhi̍h ·lòe ti̍t-chiap an-chong!
Khăng-páng nā khòaⁿ bē tio̍h, chhiáⁿ chiàu ē-kha ê tô͘ lâi an-chong.
Choan-iōng sû-khò͘
Lâu-ōe-pang ū chi̍t kóa choan-iōng gí-sû, iá koh bô kò͘-tēng ê Tâi-gí kóng-hoat. Chit tiâu ōe-tê ū siu-chi̍p khah chiâu-chn̂g ê sû-khò͘. Chia ū chi̍t kóa khah tiōng-iàu ê pêⁿ-tâi choan-iōng gí-sû:
- Ōe-tê: Chi̍t tiâu ōe-tê tō sī chi̍t ê tùi-ōe, chē lâng tâng-chê khai káng ê khoán. Ta̍k tiâu ōe-tê ē pun kah chi̍t phiàn tiâⁿ, koh ē chù chi̍t ê phiau-tê kap kúi-nā hāng lâu-ōe tī lāi.
- Pho͘ bûn: Chi̍t tiâu ōe-tê lāi-té, ta̍k hūn ōe hō chò chi̍t pho͘ bûn. Nā lâng pho͘ ê bûn kap ōe-tê bô ha̍h, koán-lí-oân ē tàu-saⁿ-kāng kā i chhian kah khah sek-ha̍p ê ōe-tê hia khì.
- Thâu bûn: Chi̍t tiâu ōe-tê ê thâu chi̍t pho͘ bûn. Ōe-tê ê chú-tê kap phiau-á lóng ùi thâu pho͘ lâi koat-tēng.
- Tiâⁿ: Lâng chi̍p-hōe ê só͘-chāi, ná chhin-chhiūⁿ biō-tiâⁿ ê khoán. Ta̍k tiâu ōe-tê ê chú-iàu hun-lūi. Chi̍t phiàn tiâⁿ mā thang hun khah iù ê choan-tê tiâⁿ, mā thang siat-tēng bô kāng koân-hān. Lí nā bô hèng kî-tiong chi̍t phiàn, ē sái kā i ōaⁿ chò “chēng-im” bô͘-sek, pìⁿ chò khòaⁿ bē tio̍h.
- Phiau-á: Ōe-tê chhù-iàu hun-lūi. Chi̍t tiâu ōe-tê ē sái phiau kúi-nā hāng, hō͘ sú-iōng-chiá khah lī-piān chhōe ū siong-koan ōe-tê.
- Sú-iōng-chiá: Siōng kài tiōng-iàu ê kak-sek, in-ūi tō sī lí! Koan-lám-chiá nā bô kháu-chō, mā khòaⁿ ē tio̍h kong-kiōng ê tiâⁿ. Nā beh chham ka ê lâng, ài seng teng kì ka-tī ê kháu-chō, chiah pìⁿ-chò sú-iōng-chiá.
Teng kì, ji̍p chām
Goán ûn-ná kiàn-gī ēng siā-kau kháu-chō (Google, Facebook, Twitter) lâi teng kì, ji̍p chām. M̄ bián kì àm-hō ē khah lī-piān, mā khah an-choân. Nā beh ēng ka-tī ê tiān-phoe, siat àm-hō, mā sī ē sái ·tit. Teng kì sî, ài thiⁿ lí ê “iōng-chiá miâ” kap “miâ-sèⁿ.” Chhiáⁿ chù-ì:
- Iōng-chiá miâ sī pa̍t-lâng kā lí @tiám miâ ê sî-chūn ēng ·ê.
- Miâ-sèⁿ chāi lí siá, bô it-tēng ài chù ka-tī ê pún miâ.
- Iōng-chiá miâ kap miâ-sèⁿ lóng kong-khai hián-sī.
Chù: tiān-phoe choa̍t-tùi bē kong-khai hián-sī, chhiáⁿ lí m̄ bián hoân-ló.
Kháu-chō siat-tēng
Kháu-chō siat-tēng ū kúi-nā hāng, chāi lí tiâu-chéng.
- Kháu-chō: Ōaⁿ iōng-chiá miâ, miâ-sèⁿ, tiān-phoe, kháu-chō ang-á, téng-téng.
- Kò-jîn chu-liāu: Thiⁿ lí siūⁿ beh kong-khai hō͘ pa̍t ê sú-iōng-chiá khòaⁿ ē tio̍h ê chu-liāu, chhiūⁿ chū-ngó͘ kài-siāu.
-
Kài-bīn: Ōaⁿ kài-bīn sek-chúi (chhián-sek, àm-sek), jī ê chhùn-chhioh, kap kài-bīn gí-giân (Hàn-jī, Lô-jī, Eng-gí).
Sêng-oân khám-chām
Sin lâi ê sú-iōng-chiá ū chi̍t kóa hān-chè, chhiūⁿ pho͘ bûn kap tap-ho̍k ê sok-tō͘. Khah se̍k-chhiú liáu āu, lí ê sêng-oân khám-chām ē ta̍uh ta̍uh-á seng-kip.
- Sin chhiú: sàng su-phoe, chhah kî-á, kià hù-kiāⁿ, phian-chhip pho͘ bûn lóng bē ēng ·tit.
- Chheⁿ-kak (1 khám) koân-hān: sàng su-phoe, chhah kî-á, kā pa̍t lâng chēng-im
- Chú-kò͘-kheh (2 khám) koân-hān: chò kûn-cho͘, phian-chhip ka-tī ê pho͘ bûn; ài chhau 2 lé-pài
- Sai-hū (3 khám) koân-hān: kā ōe-tê ōaⁿ tiâⁿ, thâi-tiāu pùn-sò pho͘ bûn, chhòng phiau-á, chhòng wiki bûn; ài chhau 3 kò goe̍h
- Thâu-lâng (4 khám) koân-hān: phian-chhip só͘ ū pho͘ bûn ê lōe-iông (hē-thóng ē lâu kì-lo̍k), kā ōe-tê koaiⁿ tiāu, thâi tiāu, pín ·khí ·lih, téng-téng; koán-lí-oân ài ka-kī siat-tēng, bô chū-tōng seng-kip
Pho͘ bûn & phian-chhip-á
Pho͘ bûn, tap-ho̍k ê sî, lí ē khòaⁿ tio̍h su-ji̍p pho͘ bûn ê só͘-chāi, hō chò phian-chhip-á. Phian-chhip-á ê kong-lêng put-chí-á chē, su-ji̍p hē-thóng hō chò “markdown.” Chia ū chi̍t ê chū-ha̍k bāng-chām (Eng-gí ê). Ē-té soat-bêng khah ki-chhó͘ ê kong-lêng:
-
**chho͘**→ chho͘ -
*chhoa̍h*→ chhoa̍h -
[chhōe](google.com)→ chhōe -
{chù-bêng|註明}→ chù-bêng -
# Phiau-tê,## Chhù Phiau-tê, ... -
`thêng-sek <html>`→thêng-sek <html> -
[details="Tiám chia khòaⁿ lōe-iông"] ... [/details]→
Tiám chia khòaⁿ lōe-iông
Lōe-iông tī chia!
Kià tô͘, tóng-àn, ti̍t-chiap thoa lâi phian-chhip-á hia pàng tō ē sái ·tit.
Pêⁿ-tâi kui-chek
Chhiáⁿ khòaⁿ chit ia̍h: pêⁿ-tâi Būn-tap & Kui-chek.
