Pháiⁿ-sè, góa khòaⁿ lí ū kúi hāng tùi "bûn-jī" chiok tōa ê gō͘-hōe:
Jī sī jī. Im sī im. "Orthography is arbitrary." Tong-jiân chi̍t ê "bûn-jī hē-thóng" lāi-té ū kui-tēng, m̄ koh he kui-tēng lóng sī lâng lâi tēng-gī.
Nā sī ē hiáu kóng Tâi-oân-ōe ê lâng, put koán siá siáⁿ khoán jī, im tō bē "cháu ·khì." Góa nā siat-tēng chi̍t thò kui-tēng kóng:
-
@
ài tha̍k "phông-kó"
-
#
ài tha̍k "chia̍h"
-
$
ài tha̍k "góa"
-
%
ài tha̍k "ài"
Án-ne góa siá: $%#@
, lí mā liáu-kái. Ah tong-jiân, lán ê bûn-jī hē-thóng siōng hó sī khah ū kui-kí ê "hē-thóng-sèng".
Pe̍h-ōe-jī ê kui-kí, tō sǹg kóng m̄ sī 100% ha̍p-lí ê, lán tio̍h ài khòaⁿ 200 tang lâi ê le̍k-sú tō chai-iáⁿ kóng "siōng bô, ē ēng tit; siōng bô, lán ē tàng liáu kái ·i; siōng bô, tāi-pō͘-hūn ê lâng ē chiap-siū". Che tùi bûn-jī hē-thóng lâi kóng tō choa̍t-tùi ū kàu ·a.
Lán bô su-iàu múi chi̍t ê siōng sè siōng sè ê sè-chiat lóng the̍h lâi chō-hoán. Án-ne tian-tò ē éng-hióng tio̍h Tâi-gí phó͘-ki̍p-hòa ê khang-khòe, in-ūi pa̍t lâng ē khòaⁿ: lín tī teh sak Tâi-gí ê lóng bô it-tì, ah góa beh án-ná chiap-chhiok? Mài chhap ·i khah kui-khì.
Put koán lí siá siáⁿ jī, lâng ài o̍h chiah ē liáu-kái. O̍h liáu, chai-iáⁿ kui-tēng, siá siáⁿ jī lóng bô būn-tê.
"Si̍t-chè im" sī lâng kóng ōe ēng chhùi hoat ·chhuti ê im. M̄ sī jī. "Jī" chit ê mi̍h-kiāⁿ kin-pún tō bô "si̍t-chè-im". (Che sī hō͘ Hôa-jîn sé náu sé kah chiok chheng-khì khah ū ê khài-liām.) Bô lâng ē hiáng kā "jī-hêng ê im" kóng ·chhut ·lâi, in-ūi "jī-hêng" pún-té tō bô "im". (Sī kóng bûn-jī; tong-jiân chhiūⁿ IPA ha̍k-su̍t ke-si ū bô kāng ê tēng-gī.)
Thài ē kā bûn-jī siat-kè hō͘ bē hiáu kóng ōe ê lâng sú-iōng? Bûn-jī pún-té tō sī siat-kè hō͘ bó-gí ê sú-iōng. Bûn-jī sī chi̍t thò "ke-si" niâ. Hō͘ nn̄g ê í-keng ē hiáu kóng ōe ê lâng m̄ bián khui chhùi, bô siaⁿ koh thang ko͘-thong. Tó ūi tn̄g, tó ūi choán tiāu, tó ūi khah thêng, tó ūi liâm chò-hóe, téng téng, che lóng sī bó-gí tho̍k-chiá ê chí-chek.
Lēng-gōa, nā sī beh kā liân oe̍h tàn tiāu, ē sái khó-lū kúi nā hāng soán-te̍k:
- Lóng keh khang
- Ti̍t-chiap lóng m̄ bián siá, hō͘ tho̍k-chiá ka-tī phòaⁿ-toàn.
- Ē séng tit ê liân oe̍h m̄ bián siá, bē séng tit ê kè-sio̍k siá, iā sī ōaⁿ chò
'
.
Thài-gí, Hàn-jī, Ji̍t-gí, Oa̍t-lâm-gí téng gí-giân lóng bô teh hun "gí-sû", mā bē éng-hióng tio̍h bó-gí-chiá ê "comprehensibility"
Koh-chài kóng che góa lóng tông-ì.